Jobe 8
8
Kuwombawomba ko khata ka Bhilidhadhe
(Txipimo txa 8)
Wuya ka Txizimu
1Sekoko Bhilidhadhe, M'suwita, a to xamula a txi khene:
2U na womba to nga eto kala yihi mbimo kani?
Ditshuri da txisofu txako di na komba wuhi moya kani?
3Ina txi ndi na sanula madingano Txizimu kani?
Niku wa Mtamo-wotshe a ndi na sanula wululamo kani?
4Ngako vanana vako va ti mu onhete,
nene a va tshotshile manzani ka wuhambunyeti wawe.
5Aniko ngako ngu mabimbi-kutxa u txi xota Txizimu,
ni kukombela wumbilu ka wu wa Mtamo-wotshe,
6ngako u ti wo sawuleka ni kululama,
ngu ditshuri, Txizimu txi na kualakanya ngu kukuluveta,
txi na wusa wukhalo wa wululamo wako.
7Makhato ako ngu ditshuri ma nave madotho,
aniko zumbelo yako yo gwitisa yi na anda kala titshokani.
Themba ya vo biha kha yi vhuni txilo
8Nguko ani na ku kombela, wotisa konkuwa
ka tihunzu ti ti nga pinda, ti lulamisele kuwotisela vatate vawe.
9Nguko athu hi va nyamnova, kha hi zivi txilo;
nguko masiku athu txitimwi ka mafu, ma fana ni mtsudi.
10Ina marambu kha ma na mbi kugondisa, kha ma na mbi kugela,
ngu mbiluni kwako kha ma na mbi maha ditshuri kani?
11Ina tiwungu ti nga deluka ti si nga ni ndope kani?
Mwendo kuhanya liwungu ku si nga ni mati kani?
12Ti txi ngadi ti nakana, ti si se wilwa,
ti maneka ti txi oma, hahanze ka wumwani mwasi.
13Ti mahisa toneto tinzila ta vale va divalako Txizimu;
se themba ya mkanganyisi yi na lova.
14Tthemba yawe yi na thidhela,
se themba yawe yi na nga txisaka txa nyazombe.
15A na tshikila ha nyumbani kwakwe, aniko kha na mbi ti manela kutsana;
a na m'hiketela, kambe kha na mbi ema;
16a wuna di si se huma ditambo,
mazokoro akwe a maphya, ma huma thembweni kwakwe;
17mikoloti yakwe ya hoka txisimani;
yi maha txiduko ka marigwi;
18a txi mwalala ha wukhaloni kwakwe,
ti na kanetwa va txi kha vona: Kha ni zivi ku kuwona;
19wona taku litsako la nzila yakwe,
se vamwani va na humelela ngu lithuluni.
20Wona taku Txizimu kha txi na mbi nyenya wo lulama;
kambe kha txi va ñoli ngu diwoko vamahi va kubiha;
21kala kuza mkanani kwako kutala ngu maseko,
ni txisofu txako txi tala ngu kudhumisa.
22Vaxamukisi vako va na ambala pfilu-pfilu,
hambi ditenda da vo biha kha di na mbi vaho kambe.
Currently Selected:
Jobe 8: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
