Jobe 10
10
Ni na phofula
1Dihika dangu da swihala ngu wutomi wangu;
ni na laphisa mbimo ni txi ti tsetsa,
ni na womba-womba kupandisekani ka muhefemulo wangu.
2Ni na khani ka Txizimu: U nga ni sunge;
ni gele ati ulwako ni nani ngu tona.
3Ta kudingana kha kwati ku ni xanisa,
u lamba mthumo wa manza ako
u woningeta txitimwi ka dibanza da vo biha kani?
4Ina u nga va ni maso a nyama kani?
Awe u wonisa tonti a wonisako tona m'thu kani?
5Ina masiku ako mo fana ni masiku a m'thu kani?
Mwendo malembe ako ma fana ni malembe a m'thu,
6kuva u ziva wubihi wangu,
ni kuxola sionho sangu kani?
7Awe wa tiziva ngu kumweko taku, ani kha ni nga m'bihi;
kambe kha nga ho ni wammweyo wa ku ni thavisa manzani kwako.
U na ni maha niva lithulu
8Manza ako ma ni vangile, me ni rendeleta;
kambe ona ma ni fuvisa.
9Ni kombela taku u alakanya tito, ngako ni ku dibumba, u ni rendeletile,
ni ti to u na ni tshumeta ni ya lithuluni.
10Ina eko khwa ni kutula kufana ni masi,
ni ku ni bangisa nga tximbwanda kani?
11U ni ambekile ngu nyama ni didhowo,
se ngu marambu ni misiha u ni tsanisile.
12U ni ningile wutomi ni tithomba;
kambe wumbilu wako wu xayisile moya wangu.
13Aniko totshe tiya u ti sisile mbiluni kwako;
ani na tiziva kha kwati taku, totshe tiya ti ti ti kwako.
14Ngako ni txi onha, awe wa ni wona;
ka wubihi wangu, khu na mbi ni divalela.
15Ni di muonhi, dikhombo kwangu!
Ni di mlulami, kha ni na mbi guleta msungo;
ni taletwe ngu tingana, se na wona wusiwana wangu.
16Nguko ni txo guleta msungo,
awe wa ni xota ku nga ngonyamo ya tshofu,
wa tshumela u maha sixamaliso so ni wukela.
17Awe wa lotela tifakazi tako ku ti txi ni wukela,
kambe wa engetela txiviti txako kwangu;
wa wuyeletela ku ni xanisa.
Awe Txizimu, ni leke ngu kuthutha!
18Ngu kutxani koko u nga ni humisa mndani ka mame kani?
O! I tiku moya wu ti ko ni ninga tito,
ni maso ma sa ni wona!
19Sekoko ti mahekisile ku nga kha ti zivi kumaheka;
se nga ni ti khukhete mndani ni ya dithithani!
20Ina masiku angu hi nga madotho kani?
Ema koko, u ni leka,
kasi ku ni na mana kuhumula ka kudotho;
21ni sanzi kutsula do gwita, da kuva ni si wuyi kambe,
mafuni ka txidema ni mtsudini ka lifo;
22mafuni ko kidiva nga txidema txipune, mafu a mtsudi wa lifo,
kambe ma singako ni txhatxhameto ni ya yimweyo, emo liwoningo li fanako ni txidema.
Currently Selected:
Jobe 10: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
