Jobe 40
40
1A to xamula kambe Mkoma ka Jobe, a txi khene:
2Ina mwendo kulwa ni wu wa Mtamo-wotshe ngu gondisa kani?
Awu a kanetisanako ni Txizimu, a na xamule timhaka tiya.
Xamulo yo khata ya Jobe ka Txizimu
(40:3-5)
3Sekoko Jobe a to xamula ka Mkoma, a txi khene:
4Wona taku kha ni nga wa txilo,
ni na kuxamula txani ani kani?
Ni tsiva txisofu txangu ngu dianza dangu.
5Ni wombile kumweko, kha ni na mbi xamula kambe;
mwendo kambe kumbidi, kha ni na mbi ya masoni.
Xamulo ya wumbidi ni kugwita ya Txizimu ka Jobe
(40:6--41:34)
Ina mtamo wako wu nga dinganiswa ni wangu kani?
6Sekoko Mkoma a to xamula ka Jobe ngu mu ka txihuhuri, a txi khene:
7Tsanisa txiwunu txako, u ku wamwamna;
ani ni na ku wotisa awe, se awe u na ni xamula.
8Ina mwendo u nga eyisa ditshuri dangu
mwendo u na ni kona, u txi ti basisa kani?
9Mwendo u ni diwoko do nga da Txizimu,
mwendo u nga bhonga ngu dipswi nga da txona kani?
10Ti bombise koko ngu kuenela ni kuguleka;
u txi ti ambeka kuthaviseka ni wudhumo.
11Tshakunuta txiviti txa kuhenya kwako,
wonisisa votshe va kutikulisa, u txi va veka hahatshi.
12Wonisisa votshe va kutikulisa u txi va veka hahatshi,
kambe peka vaonhi makhaloni kwawe.
13Va sise votshe amu ka lithulu;
va sunge tikhohe txihunjani.
14Sekoko nani ni na kholwa kwako,
taku dianza dako da txinene di ku thxatxhisile.
I mani waku a nga ñola Behemonte#40:14 Behemonte: Ti wombako ku nvuwu. yo thisa kani?
15Wonisisa konkuwa, ni vangile nvuwu ni va nga awe,
yi dyako mwasi kufana ni homu.
16Wona taku mtamo wa nvuwu wu txiwununi ka yona,
se mtamo wa kona wu ka mrumbu wa yona.
17Yi txi ndiwita mkila wa yona, ngu nga mkedhari;
misiha ya minenge ya yona, yo nga yi to lukwa.
18Marambu a yona ma fana ni mipopi ya suku;
marambu a yona mo nga tiphande ta tisimbi.
19Yona nvuwu mthumo wo khata wa Txizimu;
awu a nga yi va nga, a yi ningile matxhari a yona.
20Kha ditshuri, sakudya yi si mana mimangoni,
emo sotshe sihari sa txitinga si hungalako.
21Yi otela hahatshi ka mindonga ya mitsudi,
yi sisala simovani ni mu ka madhaka.
22Mindonga ya mitsudi ya yi tsivela ngu mitsudi ya yona;
yi randelwa ngu mwasi wa txinambwana.
23Wona taku mnambo wa thekelela, kambe yona kha yi tutumi,
hambi Jordhani a txo wulela mkanani ka yona.
24Ina mwendo va nga yi ñola yi txi va wona,
mwendo kuhulela mkhalo thonvuni ka yona kani?
Currently Selected:
Jobe 40: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
