Jobe 39
39
I mani a nga va nga sihari ni zumbelo ya sona kani?
1Awe wa yi ziva mbimo yile timhoti ti ku ni simhotyana,
mwendo u woni kulumwa ka timhoti ta mikati kani?
2U nga balela mitxima ya kuverela ka tona,
mwendo u ziva mbimo ya kuveleka ka tona kani?
3Tona ta khizama ti veleka simhotyana,
se kupanda ka tona kutsula kule.
4Simhotyana sa kona sa tsana, si kulisa ku nga fulaho,
si txi khukha kha si wuyi kambe ka vamame va sona.
5I mani a nga txhatxha mbongola ya txitinga e yi leka,
niku i mani a nga txhatxha txhini ka mbongola ya txigevenga,
6ayi ni nga yi veka txiwulani kuva m'tini ka yona,
ni kuzumba ka makhalo a mnyu kani?
7Yi sekiswa ngu diguwa da didhoropa;
kha yi pfi diguwa da m'gadhi wa yona.
8Asi yi si tumbulako mimangoni, ngudya ka yona,
se yi tsimbila yi lavetetela sotshe so nakana.
9Ina nyari yi na ti lava ku kuthumela,
mwendo yi na zumba ka txibala txako kani?
10Mwendo u nga jokela nyari ka digejo ngu ngoti,
mwendo yi nga kubhandela misele kani?
11Mwendo u nga themba nyari, ngu mtamo wa yona wa hombe,
mwendo u nga yi ninga mthumo wako kani?
12Mwendo u na yi themba kuya teka siyalo,
se a txi si tisa mu u hulako kona kani?
13Mbuwu yi zuza tibhapi ta yona yi di tsakile,
mitenga ya kona nga ya nyawukolwe;
14yi veka manda a yona ha mafuni,
yi txi ma futumeta ngu lithulu.
15Yi divala taku mkondo wokari wu na ma ganyata,
hambi kukuletelwa ngu sihari sa txitinga.
16Mbuwu yi xupha vanana va yona, nga hi nga va yona;
yi thuma walo, kha yi thavi kuluzekelwa.
17Nguko Txizimu txi yi toni wutxhari,
kambe kha txa yi ninga mapimo.
18Ngu mbimo ya kona yi gulekela txitimwi;
yi txi seka dihantxhi ni m'gadhi wa dona.
19Mwendo awe u nga ninga mtamo dihantxhi,
mwendo u nga fenengeta mkolo wa dona ngu mthiva kani?
20Mwendo u ngadi dhukisa nga bhandala kani?
Kuhefemula ka tithonvu ta yona ka thisa.
21Da kela-kela mafu di tsakela mtamo wa dona,
se di txi huma di hingeta vale va nga xoma.
22Di seka va dizowa, kha di thavi,
kambe kha di tshumeleli msana ngu kuwona ditxhari.
23Tingove wuketxeketxe ti txi lava dona,
mseve wa simbi wa phatima, kumweko ni txiholoma.
24Di maha wujalajala, di tutuma-tutuma, di txi kela-kela mafu,
kambe kha di nga ni mhaka ni diguwa da mpundu.
25Mbimo yi ku pfalako mipundu, di kha dona:
Ti nave! Se ngu kule di nungetela yimbi,
ni ku diguwa da vathangeli ni tshodi.
26Mwendo nyamatate a purumiswa ngu wutxhari wako,
a txi gwimba tibhapi takwe eya wuphemba kani?
27Mwendo digama di londeta kuruma kwako,
ni kuveka txitimwi txisaka txa dona kani?
28Di zumba marigwini di hanya kona;
titshokani ka marigwi, ni makhalo o tsana.
29Di wona so dingana ku si ñola di ti koneyo;
maso a dona ma si wona si di ngadi kule.
30 # Wona ni ka: Mat. 24:28; Luk. 17:37. Mavhondo a dona ma ndinda mnoha;
kambe aha ku ku ni sirumbi, di koneho.
Currently Selected:
Jobe 39: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
