Jobe 4
4
Kuwombawomba ko khata ka Elifazi
( Sipimo sa 4 ni 5)
Yi hokile mbimo yako yo xaniseka
1Sekoko Elifazi, Mutemani, a to xamula, a txi khene:
2Ngako hi txi duketa ku kugela, ina u na henya kani?
Aniko i mani a nga sikotako kumita mapswi kani?
3Wona taku u gondisile votala
kambe u tsanisile manza o karala.
4Mapswi ako ma wusile vale va nga wiswa,
kambe u tsanisile mazolo o karala.
5Sekoko kata kwako kukarala;
ku txi ta kugwesa, ka kuxanisa.
6Ina hi nga kuthava Txizimu i kuthemba yako,
ni kuverela kwako hi nga tinzila tako ta tinene kani?
7Alakanya konkuwa:
Ngu wihi wamnene a khalako kulova kani?
Niku ngu hani va nga khundumuswa vavanene kani?
8Ani ni khala kuwona vale va dimako wubihi,
ve phaya wubihi ni kutshumela ve elula.
9Va loviswa ngu kuhefemula ka Txizimu; kambe va hetwa ngu kufuteta ka kuhenya ka txona.
10Kubhonga ka ngonyamo,
ni dipswi da ngonyamo ya tshofu,
ni makwasa a singonyamwana ma funyekela.
11Ya lova ngonyamo yo kumba
nguko kha ku nga ni txo txi daya,
ni vanana va ngonyamo ya makati, va hangalakela.
Ku nga maneka wo lulama masoni ka Txizimu kani?
12Ni getwe dipswi ngu malengo;
se tinzeve tangu ti zivile txihunja txa kona.
13 # Wona ni ka: Job. 33:15. Mndani ka kupimisa ngu siwoniso sa wusiku,
mbimo yile vavamna va manwako ngu wukohe wo tshima,
14ni tetwe ngu kuxamala ni kudhudhumela,
se otshe marambu angu ma to nguda-nguda.
15Sekoko moya wokari wu to pinda ngu masoni kwangu;
wu vhivhinikisa misisi ya nyama yangu.
16Wu to ema, aniko ni si zivi zumbelo ya wona;
ku ti ti woneka txokari masoni kwangu;
aha ni nga malala, ni pfite dipswi di txi kha dona:
17Ina m'thu a ngava i di wo lulama ngutu kupinda Txizimu kani?
Ina wamwamna a ngava a ti sawulekile kupinda M'vangi wakwe kani?
18Txizimu kha txi thembi tingelozi ta txona,
kambe txa mana tingelozi ti di xangile.
19Ngutu-ngutu vale va zumbako ka tinyumba ta ndope,
makhato a kona i ku lithulu,
va sikotako kuphwaraselwa kufana ni sumba!
20Va phatulelwa kukhukhela mixo kala minova;
se ve loviswa ngu ha ku si gwitiko,
ku si nga ni mhaka ngu tona.
21Ina kha va lovi nawo wudhundo wawe kani?
Vafa, aniko va si nga ni wutxhari.
Currently Selected:
Jobe 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
