Jobe 3
3
MABHULO O KHATA
Kutilaya ka Jobe
(Txipimo txa 3)
1Msana keto, Jobe a to tula txisofu e ruketela ditshiku da kuvelekwa kwakwe. 2Se Jobe a to womba, a txi khene:
3Di na loviswe ditshiku dile ni nga velekwa ka dona!
Ni wusiku wule ku nga wombwa to kha vona:
Ku ni txirumbu txa wamwamna!
4Di nave txidema ditshiku dile!
Se Txizimu kona txitimwiyo txi nga ve ni mhaka nado,
kambe ku nga maneke ni liwoningo ka dona!
5Di na tshakelwe ngu txidema ni mtsudi wa kufa;
ma na zumbe ka dona marefu; di na xamalise ngu kutuvika ka dona ko nzihala!
6Txidema txi na teke wusiku wule,
ku nga tsakwe mndani ka masiku a dilembe,
ku nga balwe mtengo wa mitxima!
7O! Wusiku wule wu nave wa txiwunda,
ku nga wulele ka wona kuembelela ka kutsaka!
8Va na di ruke avale va zivako kuruka masiku,
va nga ti lulamisela kuhangalasa huwa ya kona.
9Ti na timeke tinyeleti ta tshonyana;
ku na verele kuwoninga, ku ngate;
kambe yi nga wone mikohe ya maso a wuronga!
10Nguko kha da seka matimba a mrumbu
kambe kha da sisa kukarala ka maso angu.
Ngu kutxani ni nga mbi velekwa ni di fite kani?
11Ngu kutxani ni nga mbi fela mndani ka mame kani?
Ni nga mbi gwita ni txi ngadi ni huma ngu mndani kani?
12Ni amukeletwe txani ngu mazolo akwe kani?
Ngu kutxani a nga ni mamisa ngu titshumbu takwe kani?
13Nguko ni ndi na fa konkuwa ni humula;
ni ndi na otela,
ni mana kuhumula.
14Ni vafumeli ni madhota a ditiko,
va nga txi ti akela tinyumba ka makhalo a sisapa,
15mwendo ni vathangeli vale va nga ti ti ni nzalama,
va nga ti ti hiketa tinyumba tawe ngu silivhela.
16Mwendo ngu kutxhiswa ko sisala,
nga ni si nga ho kufana ni vanana vale
va nga mbi wona kuwonekela ka ditambo.
17Eho, vo biha va tandeka kukhulumetela;
se avale vo karala va humula kona.
18Eho, avale vo sungwa va humula kumweko
se kha di pfi dipswi da muwoneleli.
19 # Wona ni ka: Jer. 20:14-18. Koneho, ku ni wa hombe ni wam'dotho,
se khumbi ya txhatxheka ka nyamne wa yona.
20Ngu kutxani vaxaniseki va simamako ve hanya kani?
Va ningelwa txani liwoningo avale va sisiwana,
ni wutomi ka vale va ku xomuloni,
21 # Wona ni ka: Mtu. 9:6. va verelako lifo, aniko kha li hoki;
va kela va txi li lava kupinda ni thomba yo siswa.
22Va ndaka ngu litsako, ve dhunda,
va txi mana dithitha kani?
23Se li ningelwa txani liwoningo ka wamwamna wule,
nzila yakwe yi si wonekiko, a nga tsivelwa ngu Txizimu kani?
24Nguko ni sanzi kudya dipawu dangu, kuta kukarateka kwangu;
tihuwa tangu ti maha ngu kuthekela nga mati.
25Nguko atile ni nga txi ti thava, ti tile kwangu,
ni tile ni nga si ti tsaneli ti mahekile.
26Kha ni tizivi kuhumula ni kupfa kuthutha, hambi kuzumbiseka,
aniko kutile kwangu kukhulumetwa.
Currently Selected:
Jobe 3: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
