Jobe 31
31
Txizimu txi na ni veke txikaloni ko lulama
1Ni mahile txitumelelano ni maso angu;
ni nga navelisa kutxani muhorana kani?
2Nguko txi ndi nava txihi txyavelo txa kuta ngu ka Txizimu txitimwi,
mwendo thomba ya wule wa Mtamo-wotshe,
yitako ngu txitimwi kani?
3Ina hi nga kutimela ka m'bihi,
ni phango ka vale va mahako to biha kani?
4Ina Txizimu kha txi ti woni tinzila tangu,
niku ina kha txi baleli mazambo angu kani?
5Ngako ni di tsimbite ngu kukanganyisa,
ni kungako mkondo wangu wu di tutumete ka wukanganyisi.
6(Txizimu txi na ni veke sikaloni ko lulama, se txi na ziva kuthembeka kwangu);
Kha ni zivi kunavela, hambi kumaha wugango
7Se ngako ni txi dhuka ni leka nzila,
ni mbilu yangu yi txi xengwa ngu maso angu
ni kungako manzani kwangu ku ti namarete txokari,
8sekoko ni na phaye, mmwani a txi dya,
ni liveleko langu li na dulwe ngu mikolotini.
9Ngako mbilu yangu yi ti ndindekile ngu kunavela wamsikati,
ni kungako ani ni ti horolokete ha txikeni ka mwakelani,
10sekoko msikati wangu a na tsule eya sinza kumwani,
kambe vamwani va na otele nayo.
11Nguko eto ti ndi nave tingana,
to dingana kuya ka valamuli.
12Nguko mndilo wu tshokomisa kala kufani,
kambe wu ndi na lovisa sotshe si ni ku naso.
Yotshe mbimo ni lulamile, ni ni wumbilu
13Ku ngako ni di dyelete khumbi yangu ya txiwamna ni ya txisikati,
mbimo yi ti nga txi lwisana ni nani,
14sekoko ni ndi na txani ani, ngako Txizimu txi txi ni lamula kani?
Se txi txi ni wotisa mhaka yiya, ni ndi na xamula txani kani?
15Awule a nga ni wumba mndani ka mame, ina hi nga ene a nga wumba khumbi kani?
Ina kha hi maha ngu mamahelo mamwewo mndani ka mame kani?
16Ngako ni di zumbile ni sile si nga txi verelwa ngu sisiwana,
ni kupfhumisa maso a noni;
17mwendo ni dyite nokha sakudya,
se wo felwa ngu vaveleki kha dya txilo.
18(Nguko kukhukhela wanana wangu a kute ni nani, ni txi nga tate wakwe,
ni mtsimbitisile kukhukhela mndani ka mwamwangu);
19mwendo ni woni wokari a txi kelelelwa ngu so ambala,
hambi txisiwana txo pwata so fenengela;
20ngako txiwunu txakwe txi sa ni katekisa,
mwendo a sa futumetwa ngu matoya a sinvutana sangu;
21mwendo ngu dianza dangu ni pekile wo felwa ngu vaveleki,
ngu kuwona wa ku ni lwela ha txikeni,
22sekoko txiphanga txangu txi na we ngu ha ka dikata,
di na funyeke diwoko dangu ngu mu ka dirambu.
23Nguko txitsayiso txa Txizimu
i ti ti txidhusa kwangu,
se ani ni si sikoti kutsana ka wuhombe wa txona.
Kha ni zivi kwa mbi thembeka ka Txizimu
24Ngako ni ti vekile themba yangu ka nzalama,
ni kungako ni ti wombile ka nzalama ku khani: Awe u themba yangu;
25Ngako ni di tsakile ngu ku khani, thomba yangu i ti ti yayingi,
ni ti taku manza angu ma ti ti thumile so tala;
26ngako ni di woni ditambo di nga txi phatima,
mwendo mtxima wu txi tsimbila ngu kudhundeka;
27ngako mbilu yangu yi di ndindilwe txihunjani,
se txisofu txangu txi di pswopswile dianza,
28ni tona, tiya ti ndi nave tingana,
to dingana kuyiswa ka mlamuli;
ngutu koko, ni ndi na kaneta Txizimu txi txi ku txitimwi.
Kha ni zivi kulwisa, mwendo kupeka, hambi kukanganyisa
29Ngako ni di tsakisilwe ngu kuxaniseka ka wule a ni vengako,
ni ku mwendo ni bhumile mbimo yi a nga welwa ngu to biha,
30(kambe kha na onha ngu txisofu txangu,
ni txi kombelela kufa kwakwe ngu wubihi);
31ni kungako vathu va ditendani kwangu va sa kha vona:
A! I mani a nga mbi khura ngu nyama yakwe!
32Mluveli a ti si oteli nzilani ni wusiku;
matimba angu ni ti ti tulela vatsimbili.
33Se ngako ni di khubhunyetile sihambunyeto sangu ngako ni ku m'thu,#31:33 M'thu: Vamwani va kha vona Adhamu.
ni sisa tingana tangu masoni kwangu,
34ni na dhudhumele masoni ka dibutho da hombe,
ni kuxowokiswa ngu mimwaya ya vathu,
se ani ni na malale, ni nga hume ha txikeni.
Ni gwitela hawa kutiemela kwangu
35O! Nga ku na mana wammweyo wo ni engisa!
Wona taku, kunavela kwangu nguku
awu wa Mtamo-wotshe, a txi ni xamula,
mlala wangu a na bhale txisolo dibhukuni.
36Na tsanisa taku ni ndi na di pakata,
ni ndi na di sunga, nga m'bhoti.
37Ni ndi na mkomba mtengo wa mazambo angu;
ni ndi na tshuketela nga mthangeli.
38Ngako mafu ma txi ni dhana, ni kungako ni txi dila ni khongela.
39Ngako ni ti dyite mihando ya mafu
ni si nga ni male,
ni daya vanyamne va kona,
40ngu fulaho ni na velekelwe mipa
ngu sevhadha ni velekelwa nyasavari.
Ma gumile mapswi a Jobe.
Currently Selected:
Jobe 31: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
