Jobe 30
30
Vathuvo va ni poyilela ni ku ni wukela
1Se konakuwa, mbanana vavadotho va ni sekako,
evo vatate vawe ni nga nyenya ku va veka kumweko
ni timbwa to wonelela mitxhambi yangu.
2Kona kambe wu ndi na ni vhuna txani mtamo wa manza awe,
mtamo wa vathu va wu nga hetwa ngu kukumba kwawe kani?
3Va rerilwe ngu kugoma ni nzala;
se va ti ti thavela ka makhalo a kuoma,
a txihala txa txisapa ni txiwula.
4Va ti ti hapha mazokoro sitingani,
kambe va ti ti dya mikoloti ya minzomi.
5Va ti ti tutumiswa hagari ka vathu,
(va ti ti viketwa nga makhamba),
6va txi ya zumba maphalani ka mikovani,
mibhalani ka mafu, ni tiphakoni ka marigwi.
7Va ti ti keta hagari ka sitinga,
se va ti ti tshangana kumweko sitxhotxhotani.
8I ti ti vanana va siphuku-phuku, vanana va vathu vo mbi na matina,
va ti ti tutumiswa ditikoni.
9Se kona kuwa, ani ni ndando yawe,
kambe va ni maha divingu dawe.
10Va ni nyenya, ve tutuma ve tsula kule ni nani,
kambe kha va emi ku ni thurela khoheni.
11Nguko Txizimu txi nawulutile ngoti ya txona txi ni khozisa;
ngu kumaha keto, va rinzile matomu awe khoheni kwangu.
12Majaha ma wukela ngu didhawa da txinene;
va retha mikondo yangu, ve lulamisa nzila yo ni fuvisa ngu yona.
13Va khulumetela nzila yangu; i ku wukulungu wangu;
vathu vo pwata ni wo va vhuna.
14Va ni telisa ku nga vo wulela ngu lifa la hombe
ve rindilikela hagari ka marumbi.
15Ni wetwe ngu kuthava;
vo nga moya va txi tutumisa kudhundeka kwangu,
se kutsaka kwangu kupindisa ku nga direfu.
Awe wa ni xanisa
16Se konkuwa, moya wangu wu thekete;
masiku a kuxaniseka ma ni talete.
17Ni wusiku na gogonywa ngu marambu angu,
kambe kubiha kuwa ku ni xomulako, kha ku humuli.
18Awe Txizimu, mtamo wa wubihi wangu wu mahile dibhaji dangu,
wu txi ni namarela nga dibhaji do kama.
19Txizimu txi ni rinzile amu ka lidhaka
ni za ni txi fanana ni lithulu ni dikhuma.
20Na dila kwako Txizimu, aniko awe khu ni xamuli;
ni emile, aniko khu ni engiseli.
21U ti mahile txigevenga u ni wukela;
ngu mtamo wa dianza dako, wa simama ku ni lwisa.
22Wa ni gula ngu txihuhuri,
u ni maha ni txi txi gadha, kambe wa ni nyekisa ni si vhuni txilo.
23Nguko ani na tiziva taku u na ni yisa kufani,
ni nyumbani mu kuverelako votshe vo hanya.
24Ina khu na mbi sanzeka dianza txitimwi ka m'thu wu a nga gwitelwa,
ngako ku txi pfala kudila kwakwe kani?
25Ina kha na dilela wule a nga ti ti xaniseka,
mwendo moya wangu kha wa xomuleka ngu wule wa txisiwana kani?
26Hambi keto, mbimo yile ani ni nga txi verela wunene, wu to ta kwangu wubihi;
ni mbimo yi ni nga txi verela liwoningo, ni to telwa ngu mtema.
Ni kombela kuvhunwa
27Mndani kwangu ku vhilukile, kha ku mani kuthutha;
masiku a kuxaniseka ma ni jumile.
28Ni hisilwe, aniko na i si nga ngu ditambo;
ni txi ema msengeletanoni, no dilela kulamulelwa.
29Ni ti mahile ndiya ya maxolwa,
ni txi ti maha mngana wa timbuwu.
30Didhowo dangu di to nzihala,
ni marambu angu ma hisilwe ngu lisani.
31Sekoko txitende txangu nja nyawudile,
ni msengele wangu, dipswi da vale va dilako.
Currently Selected:
Jobe 30: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
