Jobe 32
32
MAPSWI A ELIHU
(Sipimo sa 32 kala 37)
1Sekoko vavamna vale vavararu, va to ema kuxamula Jobe, nguko a ti ti lulamile, masoni kwawe. 2Se ku to tura kuhenya ka Elihu, mwana Bharakeli, wa Bhuzi, wa mwaya wa ka Ramu; Elihu a to henyela Jobe, ngu ku a nga txi ti emela apune masoni ka Txizimu. 3Kuhenya kuwa kwakwe ku to wukela vangana vararu va Jobe; ngako va nga ti ti pwata txa ku mkona ngu txona. 4Hambiko, Elihu kha kuluveta kuangula Jobe, nguko va ti ti ni tanga ya hombe kupinda ene. 5A di ti woni koko Elihu taku, se kha ku ngadi ni xamulo ka vavamna vale vavararu, kuhenya kwakwe ku to tura.
Kuwomba-womba ko khata ka Elihu
( 32 kala 33)
Kufuteta ka wu wa Mtamo-wotshe ka ninga wutxhari
6Se Elihu, mwana Bharakeli, wa Bhuzi, a to xamula, a txi khene:
Ani ni wa tanga yayidotho, kambe anu mi vahombe;
ni thavile, kha na tsana ku mi gela mawonelo angu.
7Ni ti ti khani: Va na womba-wombe vahombe,
malembe amangi ma na gondise wutxhari.
8Kha ditshuri ku ni moya ka m'thu,
se ni kufuteta ka wa Mtamo-wotshe ku na va mahe titxhari.
9Hi nga tanga ya hombe yi ningako wutxhari,
kambe hi nga vo kumba va pimisako to lulama.
10Ngu mhaka yeto, ni khani:
Hi ngani pfisisani, se nani ni na womba mapimiselo angu.
Njizimu txi dinganako kuninga xamulo ka Jobe
11Wonani taku, ni verela kupfa mapswi anu,
kambe ni mi engisete mi txi womba-womba,
mbimo yi mi nga ti lavetetela ditshuri.
12Mbimo yi ni nga ti mi engisela,
kuwonekile taku kuwalo ni wammweyo kwanu, waku a nga kona Jobe,
hambi kuxamula ditshuri dakwe.
13Ngu kumaha keto, mi nge khanu: Hi wu mani wutxhari,
Txizimu ngu txona txi nga mxula, na i si nga m'thu wokari.
14Se kha se womba mapswi okari kwangu o ni wukela,
kambe kha ni na mbi mxamula ngu maxamulelo anu.
Ni lava kuninga malakanyo angu
15Mo xamala, kha mi xamuli txilo kambe,
ma ma pwata mapswi.
16Ni verete koko, aniko kha ma womba-womba;
nguko se mi malate, kambe kha mi xamuli txilo.
17Nani ni na ti xamulela ngu dangu didhawa;
nani ni na womba malakanyo angu.
18Nguko ni taletwe ngu mapswi o womba;
moya wangu wa ni kurumeta.
19Wonani taku, mndani kwangu ko nga wusuke wu vilako,
wu si mani kupepa,
se ku na phuxuka nga misava ya yiphya.
20Ni na womba, ni phofula;
ni na tula txisofu txangu ni xamula.
21I tiku Txizimu txo ni ninga kwa mbi sawulela vathu,
hambi kuvengela ni wammweyo m'thu.
22Nguko kha ni tizivi kuthumisa livengo;
M'vangi wangu a ndi na ni teka.
Currently Selected:
Jobe 32: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
