Jobe 29
29
KUTIEMELA KO GWITISA KA JOBE
(Sipimo sa 29 kala 31)
Txizimu txi ti ti woningeta nzila yangu
1Se Jobe a to simama ni txidinganiso txakwe, a txi khene:
2A! Ngu nga ku na mana mahanyelo a mitxima yile yi nga pinda,
ku nga masiku ale Txizimu txi nga ti ti ni xayisa!
3Mbimo yile txi nga ti ti phatimisa dilambu da txona ha msungo kwangu,
se ani, ngu liwoningo la txona, ni ti ti tsimbila mtemani;
4kufana ni masiku a wuphyani kwangu,
mbimo yile txihunja txa Txizimu txi nga ti ti ditendani kwangu,
5mbimo yile a ngadi ni nani awu wa Mtamo-wotshe,
na vanana vangu va di madhawani kwangu;
6ni txi ngadi ni kuwula mikondo yangu ngu mafura,
na ku txi ngadi kututuma sinambwana sa mafura ngu marigwini;
7mbimo yile ni nga ti ti huma ngu txike txa didhoropa,
ni txi rumisa taku ve ni vekela txitulu txangu.
8Majaha ma ti ti ni wona me sisala;
se avale va tanga ya hombe va ti ti khukha va txi ema;
9vathangeli va ti si wombi dipswi ni da dimwedo,
se va ti ti veka manza ha sisofu;
10vathangeli va to malala ve pwata ni txo womba,
ni tidimi tawe ti namarela mikanani kwawe;
Ani ni ti ti tate wa sisiwana
11nzeve yile yi nga tiengisa, yi to ni katekisa;
diso dile di nga ni wona, di to ni fakazela;
12nguko ani ni ti ti txhatxhisa txikulungu, txi nga ti ti dila,
ni vale vo felwa ngu vaveleki, ve pwata wa ku va xayisa.
13Txikatekiso txa wule a nga ti ti lova, txi ni hokete,
se ani ni ti ti tshumela ni tsakisa mbilu ya noni.
14Ni ti ti fenengela ni kuambala wululamo,
wululamo wangu wu ti ti fana ni didhamba ni m'bhoti.
15Ani ni ti ti diso da dibhofu,
ni mikondo ya txilima;
16ni ti ti tate wa sisiwana,
ni londisela timhaka ta vale ni nga si va zivi;
17kambe ni ti ti phatula titshaya ta vabihi,
ni va kambisa sile va nga ti si lumile ngu makwasa.
Votshe vathu va ti ti ni wonisisa
18Ani ni ti ti khani:
Ni na fela txisakani kwangu,
se masiku angu ma na engetekelana nga mafu.
19Mikoloti yangu yi ti ti nava hafuhi ni mati,
se mwando wu ti ti zumba txitimwi ka madhavi angu;
20kudhundeka kwangu ku ti ti wusetwa,
ni wulaho wangu wu ti ti tsana manzani kwangu.
21Va txi nipfa, va ti ti verela va di malate,
va ti ti pfisisa sileleto sangu.
22Ni txi heta kuwomba mapswi angu,
va ti si xamuli,
se ditshuri dangu di ti ti jomba txitimwi kwawe;
23nguko va ti ti ni verelisa kufana ni mati a nzuma;
kambe va ti ti tula sisofu nga vo nengela mati o swela kuwa.
24Ni txi va tsakela, va ti ti si kholwi,
va si lavi ni kuwona khohe yangu;
25ngani ni txi sawula nzila yawe,
ni ti ti khalahatsha nga mthangeli;
ni zumbisa ku nga mfumeli hagari ka masotxhwa akwe,
kufana ni wule a thavelelako vale va dilako.
Currently Selected:
Jobe 29: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
