Jobe 28
28
Wudhundo wa wutxhari
(Txipimo txa 28)
Maso o tuleka ka totshe ti ti lavekako
1Kha ditshuri ku ni misiha, emo yi humako ngu kona silivhela, ni nzalama,
i ku wukhalo wu va yi nyekisako kona.
2Simbi yi thaviswa mafuni,
se ngu dirigwi kumahwa txikete.
3M'thu a tutumisile txidema txi tsula hahatshi ka mafu,
a txi ya lava marigwi txidemani, ka mtsudi wa lifo.
4Txinambwana txa thekelela,
kala hafuhi ka wule a zumbako hafuhi natxo,
aha ko kha ti koteki kutxhatuka ngu mikondo;
sekoko, m'thu wa jikisa mati me tsula.
5Mafu ale di humako ka ona dipawu,
hahatshi ma phemberukela nga mndilo.
6Marigwi a kona nga wukhalo wa safira,
kambe ma ni lithulu la nzalama.
7Ditshurido da timelelwa ngu nyamatate,
kambe kha ma di wona maso a mndilo.
8Kha ma zivi ka nga kandetelwa ngu vanana va sihari sa kutiguleta,
hambi ngonyamo ya tshofu, kha ya pinda ngu ka ona.
9M'thu wa khundumusela marigwi ngu manza akwe,
kambe wa rindilita mimango kukhukhela hahatshi ka yona.
10Wa dhoda minambo ngu mu ka marigwi,
se maso akwe ma tumbula sotshe somaha sa lisima.
11Kambe wa tsiva minambo, ku si humi ni da dimwedo dithtotho,
se a humisa hahanze asi si nga ti sisate.
Lisima la wutxhari
12Se wutxhari wu na manwa hayi kani?
Niku wu hani wukhalo wa mapimo kani?
13M'thu kha zivi lisima la wutxhari;
wutxhari kha wu maneki ka mafu a vo hanya.
14Kuhokoma ku kha kona: Wutxhari kha wu nga kwangu,
se linene ni lona li txi kha lona: Wutxhari kha wu nga kwangu.
15Kha yi na kuningelwa nzalama yo sefwa ngu mhaka ya wutxhari,
mwendo kutxitxisa silivhela ngu wutxhari.
16Hambi kuxava wutxhari ngu nzalama yo sefwa ya Ofiri,
hambi ngu onekisi, mwendo ngu safira.
17Ngu wutxhari kha yi na kuxavwa nzalama hambi kristali;
kambe wutxhari kha wu na kutxitxiswa ngu txiningo txa lisima, txa nzalama yo sefwa.
18Wutxhari wa maha m'thu e divala korali ni kristali;
nguko kumaneka ka wutxhari, ku txhuko, kupinda ka marubhime.
19Kha yi na mbi dinganiswa ni Topazi ya Etiyopiya,
kambe kha yi sikoti kuxavwa ngu nzalama ya yinene.
20Wutxhari wuta ngu hani koko,
niku wu hani wukhalo wa mapimo kani?
21Nguko wu sisilwe ka maso a votshe vo hanya,
kambe wu tsivetwe ka sinyana sa nzuma.
22Kumwalala ni lifo, si kha sona:
Hi pfite nduma yakwe ngu tinzeve tathu.
23Txizimu txa yi ziva nzila ya wutxhari,
kambe txona txa wu ziva wukhalo wa wutxhari.
24Nguko txona txa wona magwito ka mafu;
kambe txa wona sotshe si si kuho hahatshi ka nzuma.
25Mbimo yile txi nga ninga mtamo ka moya,
se txi teka tipimo ta mati txi veketela;
26mbimo yile txi nga veka mlayo ka mati a nzumani,
ni nzila ya nyangafula ya kudhinda.
27Sekoko Txizimu txi woni wutxhari txi wu zivisa;
txi vekile wutxhari ni ku wu tsanisa.
28 # Wona ni ka: Mas. 111:10; Mav. 1:7; 9:10. Aniko txi to kha txona ka m'thu:
Wona taku txithavo ka Mkoma, ngu txona i ku wutxhari,
se ni kuhambana ni wubihi, ngu kona i ku wuzivi.
Currently Selected:
Jobe 28: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
