Jobe 27
27
Xamulo ya Jobe
(27:1-12)
Ni na simama kuthembekani kwangu
1Se Jobe a to simama ni karingani yakwe, a txi khene:
2Txizimu txi hanyako,
txi ni honyote ditshuri dangu,
wa Mtamo-wotshe a nga swihata moya wangu.
3Ku di nga diho kutsaka kwangu, ni kufuteta ka Txizimu tithonvuni kwangu,
4txisofu txangu kha txi na mbi womba-womba kubiha,
hambi lidimi langu kuangula ko kanganyisa.
5Ti nave kule ni nani taku, ni mi emela;
kala kuza nifa, kha ni na mbi dhuka ni leka ditshuri dangu.
6Ni na tsana ditshurini kwangu ni si di leki;
mbilu yangu kha yi na mbi ti sotela kuhanyani kwangu.
Valala vangu va na tsayiswe
7Mlala wangu a na tsayiswe kufana ni wo biha;
se ni wule a nga ni wukelako,
a na fanane ni muonhi.
8Nguko yi na va yihi themba ya mkanganyisi, wa likungo,
ngako Txizimu txi txi honyola moya wakwe kani?
9Ina Txizimu txi nga dhuka txipfa kudila kwakwe,
ngako a txi telwa ngu sikarato kani?
10Niku mwendo a tsakela wule wa Mtamo-wotshe,
hambi kukhumbuka Txizimu yotshe mbimo kani?
11Ni na mi gondisa ati ti tsimbilelanako ni dianza da Txizimu,
kambe kha ni na mbi mi sisela ti a ku nato awu wa Mtamo-wotshe.
12Wona taku, anu motshenu, se mi ti woni eto;
ngu kutxani koko mi lovako amu kukanganyisani kani?
Kuwombawomba ka wumune ka Zofari
(27:13-23)
Txizimu txa tsayisa vabihi
13Wona taku, i nave txyavelo txa kuta ngu ka Txizimu, i kuthomba ya m'bihi,
kambe i thomba yile vaxanisi va no yi amukela ngu ka wa Mtamo-wotshe.
14Ngako vanana vakwe va txi maha votala,
va na dawa ngu ditxhari,
ni vatukulu vakwe kha va na mbi khura ngu dipawu.
15Avale va no sala kwakwe, va na fa ve kelelwa,
kambe tinoni tawe kha ti na mbi va dila.
16Ngako ku txi sengeletwa silivhela nga lithulu,
ni kuveketela syambalo kufana ni ndope,
17muonhi a na si veketela, aniko si na ambalwa ngu wule wo lulama,
ni wule wo mbi na mnandu a na phakelwa silivhela.
18Ene a aka nyumba yakwe ku nga sumba,
ni kufana ni muwoneleli
a ti akelako m'dhuti.
19A otela a di ni tithomba to tala;
a txi tula maso,
se tithomba takwe ti hangalakete.
20Kuthisa ka mtalela nga mati;
se ni wusiku a txi pekwa ngu txingulu.
21A na huhiswa ngu moya wa wutxani e penga;
wu na m'hiyela ngu kubhubhula ka wona ka wukhalo wakwe.
22Se Txizimu txi na tisa txikarato txitimwi kwakwe, kha txi na mbi mtsetsa;
a na tutuma manzani ka txona.
23Vathu va bhwabhwatela manza, va txi mmimela,
kambe va txi veta miloti va di ha wukhaloni kwakwe.
Currently Selected:
Jobe 27: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
