Jobe 26
26
Jobe a sola Bhilidhadhe
(26:1-4)
1Sekoko Jobe a to xamula a txi khene:
2Eto u nga vhunisa tona wule a nga si nga ni mtamo,
kambe u tsanisile diwoko dile di nga si nga ni mtamo!
3Wona tile u nga layisa tona wule a nga si nga ni wutxhari.
Niku kha ditshuri, u mmahile e ziva ditshuri, nga tona tile di nga ti ti ngu tona!
4Se mapswi u ma wombile ka mani kani?
Niku i moya wa mani wu nga huma ngu kwako kani?
Kusimama ka kuwombawomba ka wuraru ka Bhilidhadhe
(26:5-14)
Wuhombe wa mtamo wa Txizimu
5Vafi va dhudhumela hahatshi ka mati,
ni vale va zumbako konemo.
6Ka Txizimu, mndiloni kuzumba ku di tulekile,
aniko kutimelani kha ku nga ni txo fenengela.
7Wuphemba ku gwimbwa ha ndengalengani;
txi leketeta mafu aha ko mbi na txilo.
8Txa ñolisa mati amu ka marefu o dhemela,
kambe direfu kha di bhandeki hahatshi ka mati.
9Txizimu txa sisa khohe ya txitulu txa txona txa wukoma,
se ngu txitimwi ka txona txi gwimba direfu.
10Txi vekile m'hingano txitimwi ka mati ngu madhawani ka kona,
ni magwito ka liwoningo ni ka txidema.
11Tiphande ta nzuma ta deka-deka,
ti xamala kuthisa ka Txizimu.
12Txa bhanda linnene ngu mtamo wa txona,
kambe ngu wutxhari wa txona, txa wisa kutikulisa ka lona.
13Ngu Moya wa txona, txi tshurisete nzuma;
ngu manza a txona, txi mahile mnyoka wo tsimbila ngu dibindi.
14Wona taku atiya ndikasa ta tinzila ta Txizimu;
kambe ndidotho ngutu ati hi khalako ku tipfa ngu txona!
I mani koko a ndi no ziva kudhinda ka mtamo txona kani?
Currently Selected:
Jobe 26: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
