Jobe 23
23
Xamulo ya Jobe
( 23 ni 24)
Ni lava kuziva taku ni nga mana hani Txizimu
1Hambi keto Jobe a to xamula, a txi khene:
2Kala ni nyamsi, kutitsetsa kwangu ka ni maha ni vilela;
kuvhiluka ka ngumbe yangu kutshimile kupinda huwa yangu.
3O! I ti ku no ziva ko mana kona Txizimu!
Sekoko ni ndi na hoka wukhaloni ka txona ko lamula.
4Ni ndi na xawutela ngu nzila ya yinene mhaka yangu,
kambe txisofu txangu txi ndi na tala ngu mawombo.
5Ni ndi na ziva mapswi ale txi ndi no ni xamula,
kambe ni ndi na ti pima ti txi ndi no ni gela.
6Ina madingano ni wuhombe wa mtamo wa txona txi ndi na lwa ni nani kani?
Ahim-him! Kukhata txi ndi na ni emela.
7Koneyo awule wo lulama
a ndi na womba-womba natxo,
se ani ni ndi na ti txhatxhisa do gwita ka mlamuli wangu.
Ani ni xota Txizimu
8Wona taku ni txi thangela, kha txi nga ho koneyo;
se ni txi tshumela niya msana, kha ni txi mani.
9Ngako txi txi thuma ka dianza da txibhabha, kha ni txi woni;
txi txi sisala ka dianza da txinene, kha ni txi woni.
10Kambe Txizimu txa ziva nzila yangu;
txi na ni dukete, ni na huma kufana ni nzalama.
11Mikondo yangu yi tsani, ka nzila yile txi nga tsimbila ngu yona;
ni vekisile nzila ya txona, kambe kha ni na mbi hambuka ka yona.
12Ka sileleto sa txisofu txa Txizimu, kha ni zivi ka nga hambuka.
Se mapswi a mkanani ka txona ni ma dhundile kupinda si nidyako.
Txizimu txi na maha ngu ngani a ti txi ti lavako
13Se ngako Txizimu txi txi wukela wokari,
sekoko i mania waku a nga txi jikisa kani?
Ati ti lawako ngu moya wa txona, txi na maha toneto.
14Nguko txi na maha ati ti nga vekelwa ani
kambe ndingi to fana ni tiya txi ku nato.
15Ngu mhaka yeto, na xomuleka masoni ka txona;
kambe ngako ni txi wonisisa toneto, na thaviswa ngu txona.
16Nguko Txizimu txi sahile mbilu yangu,
se awu wa Mtamo-wotshe a ni xanisile.
17Nguko kha na dhukiswa
ku si se va ni txidema,
kambe txidema kha txa sisa khohe yangu.
Currently Selected:
Jobe 23: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
