Jobe 24
24
Vabihi vapa
1Ti komba ku timbimo kha ta vekwa ngu wu wa Mtamo-wotshe,
ngu kutxani va si woniko masiku akwe vale va m'zivako kani?
2Vaho vale hambi mihingano va yi thavisako;
vepa mitxhambi, se ve yi dyisa.
3Va teka mbongola ya wo felwa ngu vaveleki;
ve ñola homu ya noni ve vekisa ngu yona.
4Va hambukisa nzilani avale vo pwata;
se sisiwana sa ha mafuni si sisala sotshe.
Sisiwana sa dyelelwa ngu vabiha
5Wonani to si fana ni timbongola ta txitinga,
so phindula si huma kuya xota sihari;
txiwula txa ninga sakudya ka sisiwana ni ka vanana va sona.
6Thembweni sa funyela sakudya sa sona,
ni kukamela mivhinya ya vaonhi.
7Va otela wusiku wotshe va sa ambala simaha,
ngu ku va va si nga ni so fenengela ve sisala pheho.
8Va nakaniswa ngu mati o khukhela mimangoni,
se va pwata ni ko thavela kona; va khutarelana ni marigwi.
9Mwanana wo felwa ngu tate, a thaviswa tshumbuni,
ve amukela txo vekiswa ngu txisiwana.
10Va maha ti to va simbwiri ve tsimbila va sa ambala txilo,
kambe va honyola sakudya ka vanyanzale.
11Mndani ka maguma awe va maha mtona;
va kamela sa kusela mapipani,
aniko va ngadi ni ditora.
12Madhoropani va keta vathu, ni moya wa vo dayiswa wa kwangula;
aniko Txizimu kha txi na mhaka ngu wuphukuphuku wawe.
Vabihi, sidayi, magelegele, makhamba
13Vona va hagari ka vale va lwako ni liwoningo;
kha va ti zivi tinzila tawe,
kambe kha va tsani tinzilani kwawe.
14Txidayi txa wuka ngu mabimbi-kutxa, txi daya txisiwana ni vo pwata
se ni wusiku txi ti maha dikhamba.
15Nga kule maso a digelegele ma ronolelako wuronga, di txi kha dona:
Kha ni na mbi wonwa ngu diso ni da dimwedo, di ti tsiva ni khohe,
16txidemani si riyela miti
yile si nga yi veka sivango ni mitshikari,
kha si zivi ka nga lavana ni liwoningo.
17Nguko ka sona sotshe, mixo, yi nga mtsudi wa lifo,
nguko si txi tumbulwa, si pfa kuthisa ka mtsudi wa lifo.
Kuwombawomba ka wuraru ka Zofari
(24:18-25)
Txizimu txa fuvisa vabihi
18Va deluka txitimwi ka mati;
thomba yawe yi ruketetwe txitmwi ka mafu;
kha va tshumeli ngu nzila ya mivhinya.
19Kuoma ni lisani sa phwisa mati a hunguva;
diyiva di na va fuvisisa toneto, avale va nga onha.
20Mndani mule ku nga va veleka ku na va divala,
timbungu ti na vadya ti txi pfa kutshamba;
kha va na mbi ngadi ve va alakanywa,
se wubihi wu na funyekisa ku nga mndonga.
21Va xanisa wule i ku txifule asi velekiko,
kambe kha va mahi ta tinene ka noni;
22ngu mtamo wawe va ndinda ni vale va mtamo ngutu;
se ngako vona va txi wuka, kha ku nga ni kuhanya ko tsana.
23Ngako Txizimu txi txi va ninga kuhumula, va omelela ka toneto;
sekoko maso awe ma tinzilani kwawe.
24Va guleka ngu mbimo yayidotho, ve kuluveta kumwalala;
va wuna kufana ni votshe vamwani,
se ve wilwa kufana ni titshoka ta m'buru.
25Se konkuwa ngako i si nga tona,
i mani a no ni kaneta ni kukhundumusa ditshuri dangu kani?
Currently Selected:
Jobe 24: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
