Jobe 22
22
DBHULO DA WURARU
(Sipimo sa 22 kala 27)
Kuwombawomba ka wuraru ka Elifazi
(Txipimo txa 22)
Awe u mahile sionho so tala
1Sekoko Elifazi, Mutemani, a to xamula a txi khene:
2Ina eko m'thu a nga va ni txivhuno txokari ka Txizimu kani?
M'thu wamnene a na ti vhuna apune.
3Mwendo awu wa Mtamo-wotshe a tsakiswa ngu ku u lulama,
mwendo dibhindu dokari daku u hetelelisa tinzila tako kani?
4Mwendo wa kutsayisa ngu mhaka ya txithavo txi a ku natxo ngu ngawe,
hambi ti to e kuyisa kulamulwani kani?
5Ina wubihi weko hi nga wa hombe,
ni sionho sako sa kwa mbi guma kani?
6Nguko u zimile mseve ngu vananu, ku si nga ni txilo,
u va tshambute syambalo ve sala di simbwiri.
7Khwa ninga mati o sela ka wo karala,
se ka wa nzala u mtoni dipawu.
8Se mafu ma ti ti lumba wule wa mtamo,
se wamwamna wule a nga ti ti mahelwa txithavo a ti ti zumba ka ona.
9U hangalasile tinoni ti si nga ni txilo,
kambe mawoko a sisiwana ma funyeletetwe.
10Ngu toneto, ti ku riyelisako ngu titshenga,
se u xomutwe ngu kuxaniswa ko wuyelela,
11mwendo txidemani, emo u si woniko txilo;
se mati o tala ma ku fengeta.
U lava kutsimbila nzilani ka vabihi kani?
12Ina Txizimu kha txi nga txitimwi nzumani kani?
Wona tinyeleti tile ti ku txitimwi;
eto ti nga gulekisa tona.
13Se u khawe:
Txi ziva txani Txizimu ngu tona tiya kani?
Ina txi nga dhuka txi lamula amu txidemani kani?
14Marefu ngu ona wusisaleloni ka txona, kuva txi si woni;
se txona txa tsimbila-tsimbila nzumani.
15Ina u nga va u di tsimbite ngu txinzilana txa kale,
emo va nga tsimbila ngu kona vaonhi kani?
16Vona va thavisilwe ku si se hoka mbimo yawe;
ndambi yi to thekela txitimwi ka sitsaniso sawe.
17Va ti ti kha vona ka Txizimu:
Khukha ahawa kwathu.
Se nji txani a nga hi mahela,
awu wa Mtamo-wotshe kani?
18Wona, ene a tatile tinyumba takwe ngu silo;
ngu kumaha keto, wudhota wa vaonhi wu nave kule ni nani!
19Avale vo lulama va mu woni ve tsaka,
se awule wo mbi na mnandu a to va poyilela,
20a txi khene: Ngu ditshuri, vaonhi va khundumusilwe,
se mndilo wu tshokomisile vale va nga ti sate.
Lava kuthutha ni Txizimu
21Awe Jobe, ti pate koko ni Txizimu,
u na mana kuthutha,
ngu kumaha keto, wu nata kwako wunene.
22Tumela, na ku kombela, mlayo wa txisofu txa txona,
kambe veka mapswi a txona mbiluni kwako.
23Se ngako u txi tshumelela ka wu wa Mtamo-wotshe, u na akwa;
tsulisa kule wubihi wu wu ku ditendani kwako.
24Sekoko u na sengeletela nzalama kufana ni lithulu,
ni nzalama ya Ofiri, ku nga marigwi a sinambwanani.
25Kambe hambi wa Mtamo-wotshe, a nga maneka i ti nzalama kwako,
ni silivhela yo sengeletelwa.
26Sekoko u na ti tsakisa ka wu wa Mtamo-wotshe,
u nga guleta khohe yako ka Txizimu.
27Awe u na kombela ka Txizimu, se txi na ku engisa;
kambe awe u na maha ti u ti randako.
28U txi ti emisela ka mhaka yokari, txi na va mtsanisi wako,
se liwoningo li na phatima amu ka tinzila tako.
29Va txi kupeka, u na khawe: Ku nave ho kuwuswa!
Se Txizimu txi na hulukisa wule wo ti veka hahatshi.
30Se txi na hulukisa ni wule i singako wo pwata mnandu;
ina ene a na txhatxhiswa ngu kusawuleka ka manza ako.
Currently Selected:
Jobe 22: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
