Jobe 21
21
Xamulo ya Jobe
(Txipimo txa 21)
Kha ni dhukiswi ngu ni wihi m'thu
1Sekoko Jobe a to xamula a txi khene:
2Engiselani kha kwati ditshuri dangu;
kambe tona tiya ti na mahe to mi thavelela.
3Ni xanisekeleni, ani ni na womba-womba;
se msana ka kuva ni ti wombawombile, ni mimeleni.
4Ina ani na dhuka ni ti bika ka m'thu wokari kani?
Hambi i di kova toneto, moya wangu wu si xaniseki ngu txani kani?
5Ni woneni mi xamala;
se mi veka dianza ha txisofuni,
6Nguko ni txi ti alakanya tiya, na xaniseka,
se nyama yangu ya dhudhumeliswa ngu kudhukiselwa.
Vabihi va embelela, ve tsaka
7Kasi va hanya ngu kutxani vaonhi,
va kumbako, ni kutikarata ngu mtamo kani?
8Liveleko lawe li anda masoni kwawe;
se ni vanana vawe masoni kwawe.
9Tinyumbani kwawe ku ni kuthutha, kha va nga ni kuthava;
ni ndonga ya Txizimu kha yi nga txitimwi kwawe.
10Madhuna awe ma velekisela, kha ma phazami,
tihomu tawe ta veleka kha ti txhisi.
11Va humisa vanana vawe ku nga mtxhambi,
na va txi ndaka-ndaka.
12Va guleta mapswi nga kutuma ka txingomana, ni haripa, ni misengele.
13Kuhumelelani kwawe, va heta masiku awe,
se ngu mbimo yayidotho ve relela dithithani.
14Se va veka ni ku kha vona ka Txizimu:
Khukha hawa kwathu;
nguko kha hi naveli kumana wuzivi ka tinzila tako.
15I mani wa Mtamo-wotshe, wa ku na za hi mthumela athu kani?
Niku ti na hi vhuna txani kumaha mikombelo kwakwe kani?
16Wonani koko taku, tithomba tawe kha ti ti ngu manzani kwawe;
wu nave kule ni nani wudhota wawe.
Muonhi a na mane txitsayiso
17Nzikhati singani kumahekako ti to me timeka malambu a vaonhi,
ku txi ta kwawe kukhudumuswa kwawe kani?
Se Txizimu kuhenyani ka txona, txi abana navo kupandiseka!
18Nguko ku nga mwasi masoni ka moya,
ni ku nga mtungu wu wusako txihuhuri.
19Txizimu txi vekela vanana vawe kulwa ka txona,
se ka vaonhi txa va ninga hakhelo,
kuva va txi na txi ziva.
20Maso awe ma wona kufuviswa kwawe,
se ene a sela kuhenya ka wule wa Mtamo-wotshe.
21Nguko ngutsaka muni a ndi no kumana
nyumbani kwakwe msana kwakwe,
ngako a txi wilelwa mitxima yakwe kani?
22Ina Txizimu txi ndi na gondiswa kuziva,
eko txona txi lamulako sotshe sa nzumani kani?
23Mmwani afa a di ngadi tsani ngu kuhetelela mtamoni kwakwe,
na a ti malate, a txi thuthelo.
24Titshumbu takwe ti tate ngu masi, ni marambu akwe ma ni moloko wo rawula.
25Se mmwani afa na moya wakwe wu di mu ka xomulo,
a sa nga nga duketa kupfa ta tinene.
26Ngu wumbidi wawe va otela lithuluni.
Se ve tshulelwa ngu timbungu.
Vangana vangu, kuthavelela kwanu diphanga
27Wonani taku ani na ziva kha kwati maalakanyo anu,
ni mipimiso yanu yo biha ayi mi ni wukelako ngu yona.
28Nguko mi na khanu: Yi hani nyumba ya mthangeli,
niku di hani ditenda dile
a nga txi zumba ka dona muonhi kani?
29Ina kha ma wotisa ka vale va pindako ngu nzila,
niku kha mi zivi sikombiso sawe kani?
30Taku wo biha a xayiselwa ditshiku da kuhasamulwa,
ni kuguletwa ngu ditshiku da txiviti kani?
31I mani a no sola nzila yakwe masoni kwakwe kani?
Niku i mani a no mninga hakhelo ya tile a mahako kani?
32Ngu kugwitisa wa yiswa dithithani,
eya hungala kona mule ka diyiva.
33Mati ma khulungako mkovani ma mtshambela, kambe a ndindela kwakwe votshe vathu;
na kuve asi se vaho ene, ku ti ti ni vo mbi balwa.
34Se mi sikotisa kutxani koko ku ni thavelela ngu ta walo kani?
Ina, nguko amu ka mixamulo yanu ku ni makuhu.
Currently Selected:
Jobe 21: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
