Jobe 20
20
Kuwombawomba ka wumbidi ka Zofari
(Txipimo txa 20)
1Sekoko Zofari, Mnamani, a to xamula a txi khene:
2Ta woneka taku mipimiso yangu,
ya ni maha ani ni kuluveta kuxamula.
3Ani ni pfite kukawukwa ko ni thela tingana,
aniko moya wa mapimiselo angu wu na ni xamulela.
Litsako la wo biha nda mbimo yayidotho
4Ina mwendo khu ti zivi awe
taku kukhukhela ka kaleko,
kukhukhela kule m'thu a nga vekwa ha mafuni,
5litsako la vaonhi kha li sweli,
ni kutsaka ka vakanganyisi nga mbimonyana kani?
6Hambi a ti laphike kuhoka nzumani,
se msungo wakwe wu hoka marefuni,
7a na lova kufana ni mitximba yakwe apune, ngu ha ku si gwitiko;
se ni vale va nga ti ti mu wona va na kha vona: Ahayi kani?
8A puruma kufana ni mloro, kha na mbi manwa,
kambe a na tutumiswa kufana ni txiwoniso txa ha wusikuni.
9Diso dile di nga mmona kha di na mbi ngadi di mmona,
hambi ni wukhalo wakwe kha wu na mbi ngadi wu mmona.
10Vanana vakwe va na lava kutsakisa sisiwana,
ni manza awe ma na wusa tithomba takwe.
11Marambu akwe ma tate ngu mtamo wa wuphya wakwe, aniko ma na otela ni nene lithuluni.
Wubihi, mbuxungu wo bava ngutu
12Hambi wubihi wu txi tshamba mkanani kwakwe,
se e sisa wubihi hahatshi ka lidimi lakwe,
13a veketa wubihi, kha wu leki,
a veketa mkanani kwakwe,
14hambi keto, sakudya sakwe si na txitxa mndani kwakwe;
si na maha nyongwa ya mnyoka mndani kwakwe.
15A mitile tithomba, aniko a na ti kosa;
Txizimu txi na si humisa ngu mndani kwakwe.
16A na sela wuxungu wa mnyoka;
lidimi la xaru li na m'daya.
17Kha na mbi ma wona mati o tutuma,
minambo ni sinambwana sa wulombe ni mafura.
18A na tshumeta mihando ya mithumo yakwe, kha na mbi yi mita;
madingano ni mtamo wa kutxitxa kwakwe, kha na mbi tsaka,
19nguko a tsindavetile sisiwana ni ku si leka,
niku a honyote nyumba yi a nga mbi yi aka,
20ngako a nga mbi mana kukhura mrumbuni kwakwe,
ka thomba yakwe yo tsakisa ngutu, kha na mbi wuyelwa ngu txilo.
21Kha na mbi salelwa ngu txilo txo dya;
ati tiku thomba yakwe kha yi na mbi va ya mbimo yo lapha.
22Kutalelwani kwakwe ngu thomba, a na xaniseka;
otshe manza a sikulungu ma nata txitimwi kwakwe.
Kuhenya ka Txizimu ku na thekelela txitimwi ka vo biha
23Hambi si diho so khurisa mrumbu wakwe,
kambe Txizimu txi na rumela kutura ka kuhenya ka txona,
se Txizimu txi na rumela kuhenya txitimwi kwakwe a txi ya kudyani.
24Hambi a nga tutuma e thava matxhari a tisimbi,
aniko wulaho wa txikete wu na mfula.
25A na dula txiholoma ha mmidi kwakwe,
aniko txiholoma txo phatima txi na huma ngu ka nyongwa yakwe;
se ku nava ni kuthava txitimwi kwakwe.
26Txotshe txidema txi na sisala txihunjani ka Txizimu.
Se mndilo wo mbi futetelwa wu na mlovisa,
kambe wu na tshokomisa sotshe sile si no sala ditendani kwakwe.
27Nzuma yi na kombekisa wubihi wakwe;
se mafu ma na m'wukela.
28Tithomba ta nyumbani kwakwe ti na thaviswa,
ka ditshiku da kuhenya ka Txizimu, totshe ti na thekelela.
29Atxiya, njiningo txa m'thu wo biha, txi tako ngu ka Txizimu,
ayiya i thomba yile Txizimu txi m'vekelako.
Currently Selected:
Jobe 20: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
