Jobe 19
19
Xamulo ya Jobe
(Txipimo txa 19)
Anu mi ni ruketete
1Kambe Jobe a to xamula, a txi khene:
2Mi na funya muhefemulo wangu, kala yihi mbimo,
mi txi ni phatulela ngu mapswi kani?
3Se mi ni ruketete digumi da makhati;
kha mi nga ni tingana ku mi ni wukelako.
4Hambi kuva ngu ditshuri ni ti onhile,
mnandu wangu wu na zumba ni nani.
5Ngako mi txo ni wukela mi ni lwisa,
mi txi ni sola ngu wuhambunyeti wangu.
Txizimu txi ni xanisile ngu makhombo
6Ti ziveni nkonku taku, Njizimu txi nga ni poyila,
se txi ni ranganyeta ngu likoka la txona.
7Wona taku na banguluka: Na lwiswa! Aniko kha ni pfiwi;
na keta: Nyandayeyo! Aniko kha ku nga ni wululamo.
8Txizimu txi kete maphala ka nzila yangu,
se kha ni na kupinda;
amu ka tisoko tangu txi vekile txidema.
9Txizimu txi honyote wudhundo wangu;
txi thavisile m'bhoti ha msungo kwangu.
10Txi ni funyeletete ngu ka otshe madhawa, se ani na tsula;
txi dute themba yangu, ku nga mndonga.
11Txizimu txi mahile ti to ni hiswa ngu txiviti txa txona,
txi ni veka ku nga no va mmweyo wa valala va txona.
12Masotxhwa a txona ma tile ngu diganda,
me ta lulamisela nzila ya txona yo ni wukela,
se me zumba madhawani ka ditenda dangu.
Maxaka angu ni vangana, va tsute kule
13Txizimu txi vekile vanathu kule ni nani,
se avale va ni zivako va so ti lava ve ni nyenya.
14Maxaka angu ma ni lekile,
se avale ni zivanako navo va to ni divala.
15Vawuyi vangu, ni sithumi sangu sa txisikati va ni woni ni ti wa walo;
ni ti ta maha wa matiko masoni kwawe.
16Ni dhani txithumi txangu txa txiwamna, aniko kha txa ni xamula,
ni zile ni dila ngu txisofu txangu.
17Maheta angu ma nungeta msikati wangu;
ni kudila kwangu, ka vanana va mndani kwangu.
18Hambi vafana va ni txhipisa,
se ni txi no khukheleko, vo ni poyilela.
19Votshe va va zivako txihunja txangu va ni nyenya,
ni vale ni nga ti ti va randa, va ni wukela.
20Marambu angu ma namarete ka didhowo dangu ni ka nyama yangu,
ni to sala dwe ni didhowo da makwasa angu.
21Ni xanisekeleni anu vangana vangu,
ni xanisekeleni, nguko dianza da Txizimu di ni gwesile.
22Mi ni xupha ngu kutxani, kufana ni Txizimu,
mi si kolwi ngu nyama yangu kani?
Muemeli wangu wa hanya
23Mapswi angu konkuwa, ngu nga ma no mana kubhalwa!
Nga ku na bhalwa amu ka dibhuku!
24Eko ngu tshoka ya txikete, ni simbi yo nemela,
yotshe mbimo si txi lotelwa ha ka dirigwi!
25Nguko na tiziva taku Mtiruli wangu wa hanya,
niku ngu kugwitisa a na ema txitimwi ka mafu.
26Se msana ka ku di ti gumile didhowo dangu,
ni txi ngadi ni hanya nyamani kwangu, ni na wona Txizimu.
27Ni na muwona ani nipune,
se maso angu, na i si nga mamwani, ma na muwona;
ngu kumaha keto, mbilu yangu ya tshokoma mndani kwangu.
28Ngu ditshuri, mi ti ti dingana ku khanu: Eko hi mxuphela txani kani?
Nguko mtwi wa mnandu wa kona, wu maneka kwangu.
29Anu mipune, thavani ditxhari;
nguko txiviti txi tisa sitsayiso ngu ditxhari,
ku va mi txi na tiziva taku waho mlamuli.
Currently Selected:
Jobe 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
