Jobe 14
14
Wutomi wathu wu komile
1M'thu wo velekwa ngu wamsikati
masiku akwe madotho, kambe ma tate ngu sikarto.
2A mila ku nga txiluva, se msana keto e oma;
kambe wa tutuma kufana ni mtsudi, se e mwalala.
3Awe u tula maso ako txitimwi ka eneyo,
se u ni maha ni wulela ni nawe kulamulwani.
4(I mani wa wubihi waku a nga humisa so tshura kani? Lambi ni wammweyo!)
5Ngu ti to masiku akwe ma batwe
mtengo wa mitxima yakwe wu manzani kwako;
se awe u m'vekete mihingano, kha na ku yi ndaka.
6M'vayilele, ku va a txi na mana kuhumula,
kala kuza a txi nga muendi,
e tsakiswa ngu ditshiku da kona.
7Nguko mndonga wu verela kusandwa,
wu na thunga kambe,
niku kha li na mbi gwita linyempfu la kona.
8Ku si na mikoloti ya kona mafuni,
txitsha txa kona txi na sina lithuluni,
9mndongewo wu txi na pfa mati, wu na thunga,
ku na thunga mazokoro nga wo ngadi kuphawa.
10Aniko a txi fa m'thu, wa guma,
ina, a di ningete muhefemulo wakwe m'thu, ahani kani?
11Kufana ni mati a lineneni maphwako,
ni mnambo waphwa, wu txi oma.
12Ngu kumaha keto, m'thu wa otela asi wuki kambe;
kala kuza ku si maneki kambe nzuma,
kha na mbi wuka, hambi kukhukha ngu wukoheni kwakwe.
Ani ni na verela timbimo ta tinene
13U txo ni sisa dithithani,
u si ni wonekisi kala kuza kuhenya kwako ku ni vayilela,
u ni vekela m'hingano, ni ku ni alakanya.
14Ina m'thu a txi fa, a nga tshumela e hanya kani?
Otshe masiku a kulwa kwangu, ni na verela,
kala kuza kumaneka kutxitxa kwangu.
15U ndi na ni dhana, se ani ni ndi na kuxamula;
ninga wudhundo ka mthumo wa manzani kwako.
16Se konkuwa wa bala mazambo angu;
eko khu njo wonetela sionho sangu kani?
17Wuhambunyeti wangu wu lemilwe amu ka disaka,
se awe wa sengeletela wubihi wangu.
Awe wa heta themba yathu
18Nguko ngu ditshuri, mmango wawa wu txi khundumuka;
se dirigwi di khukha ka wukhalo wa dona.
19Mati ma kenya marigwi;
ndambi ya mita lithulu la mafu;
se awe wa maha ti to themba ya m'thu yi mwalala.
20Awe yotshe mbimo wa mu wukela, se ene wa pinda;
awe wa phemberusa khohe yakwe u txi mtsulisa.
21Vanana vakwe va dhundeka, na ene asi ti zivi;
mwendo kuminyeteka na asi ti pfi;
22aniko nyama yakwe, kwakwe ya pfa kupanda;
ni moya wakwe kwakwe wa dila.
Currently Selected:
Jobe 14: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
