Jobe 13
13
Ni lava kuwombawomba ni Txizimu
1Wonani taku totshe tiya, maso angu ma ti wonile,
tinzeve tangu ti ti engisile ni ku ti pfisisa.
2Ati mi ti zivako, na ti ziva nani.
Kha ni nga m'dotho kwanu.
3Se ni na womba ka wule wa Mtamo-Wotshe;
ni lava kutiemela masoni ka Txizimu.
4Kambe anu koko, mi vasiki va makuhu,
anu motshenu kha mi nga tiñanga ta txilo.
5Ti txi dingana ku mi malala ka totshe,
eto ti ndi nava wutxhari wanu!
Mi pimisa taku mi nga kanganyisa Txizimu kani?
6Engisani konkuwa kutiemela kwangu,
pfisisani mapswi a txisofu txangu.
7Ina mi nga dhuka mi womba kubiha ngu Txizimu,
se mi nuwela makuhu ngu txona kani?
8Mi na txi tumela kani?
Mi na txi lwela Txizimu kani?
9Ti ndi nava tinene ngako txi txi mi xola kani?
Mwendo mi na txi mimela nga mo mimela ni wihi m'thu kani?
10Ngu ditshuri txi na mi tsayisa,
ngako mi txi sawulela vathu ngu kusisala.
11Ina kuguleka ka Txizimu kha ku na mbi mi xamalisa kani?
Kuthisa ka txona kha ku na mbi wa txitimwi kwanu kani?
12Mapimo anu ma fana ni dikhuma;
kuguleka kwanu kufana ni kuguleka ka ndope.
Ni na emela mhaka yangu masoni ka Txizimu
13Malalani masoni kwangu, ni na womba-womba ani;
txi nate txitimwi kwangu ni txihi txi tako.
14Njitxani txi nga ni mahako ni ñola nyama yangu ngu makwasa,
se ni veka wutomi wangu manzani kwangu kani?
15Hambi txi txi ni daya Txizimu, ni na ema ka txona;
ni na emela totshe tinzila tangu masoni ka txona.
16Kambe toneto ti nava kuhanyiswa kwangu,
nguko m'bihi kha na mbi ta masoni ka txona.
17Engiselani kha kwati ditshuri dangu;
ngu tinzeve tanu, mitxhamuselo yangu.
18Wonani taku ni zumba ni di lulamisile mhaka yangu,
kambe na tiziva ku ni na manwa ni di wo lulama.
Awe Txizimu, u ni xanisela txani kani?
19I mani wu a no lwa ni nani kani?
Se ngako ni txi malala
ni ndi na bhindula moya.
20Maha silo simbidi ni nani;
sekoko kha ni na mbi sisalela khohe yako.
21Tsulisa kule ni nani dianza dako,
kambe u nga ni xamalise ngu kuthisa kwako.
22Ni dhane koko, ani ni na orovela;
mwendo ani ni na womba-womba, se awe u na ni xamula.
23Minandu yingahi, ni sionho singahi ni ku naso kani?
Ni mangale ngu mhaka ya sihambunyeto sangu ni sionho sangu.
24Ngu kutxani u sisa khohe yako,
u ni maha mlala wako kani?
25Ina u nga phwarasela dizokoro do guletwa ngu moya kani?
Se u na londisela asi si nga sala si di omile kani?
26Se u bhalela txani timhaka to bava u ni wukela,
u ni wuyisela sionho sa wuphyani kwangu kani?
27 # Wona ni ka: Job. 33:11. Kambe wa veka mikondo yangu sitshani,
u ni riyela kotshe tinzilani kwangu,
u veka sivango sa mikondo yangu,
28Hambiko ani ni ku tximaha txo sina, txi gumako,
ku nga txyambalo, txo dyiwako ngu sumba.
Currently Selected:
Jobe 13: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
