Jobe 12
12
Xamulo ya Jobe ka vangana vakwe
( 12 kala 14)
Nani na tiziva tona eto
1Sekoko Jobe a to xamula, a txi khene:
2Kha ditshuri nganu mokha mi ku vathu,
kambe wutxhari wanu mi na fa nawo.
3Nani ni ni mbilu yo fana ni yanu,
kha ni nga wam'dotho kwanu;
se i mani a si tiziviko timhaka to nga eto kani?
4Ani ni txisekiso ka vangana vangu;
ani na dhana Txizimu, se txona txa ni xamula;
wamnene ni wo lulama vo maha sisekiso.
5Ene njisase txa txisekiso, masoni ka vo zumbiseka,
awule mikondo yakwe yi ku hafuhi ni kuphariyetwa.
6Matenda a vaxaseli ma humute;
kambe vale va lwisako Txizimu kha va tsani;
Txizimu txa va ninga sotshe manzani kwawe.
Sihari si na m'gondisa
7Se hi nga wotisa koko ka sihari, tximwetxo ni tximwetxo txi na kugondisa;
ni ka sinyana sa nzuma, sona si na kuzivisa;
8mwendo u womba-womba ni mafu, ona ma na kugondisa;
hambi sihaka sa linene si na kuxawutela.
9I mani asi ti pimiko totshe tiya,
taku dianza da Mkoma di mahile tiya,
10ni ti to mihefemulo ya sotshe si si hanyako,
ni moya wa votshe vathu, si manzani ka Tizimu kani?
11Ina nzeve kha yi na kuxola mapswi,
nga mkanani kupfako sakudya kani?
Txizimu txa wisa, txa xula, ni kukhundumusa
12Wutxhari wu maneka ka vahombe,
se ni mapimo ngu kutala ka masiku.
13Txizimu txi ni wutxhari ni mtamo;
txi ni wudhota ni mapimo.
14Wona taku txi txi khundumusa, kha ku aketwi;
ni ka wule txi mtsivelako kha ku na mbi tulwa.
15Txizimu txa emisa mati, ku txi oma;
se txi txi ma tulela, ma onhetela mafu.
16Mtamo ni wutxhari si ka Txizimu;
mbwa Txizimu, wule a onhako, ni wule a onhisako.
17Txa teka madhota na ma di handilwe,
ni valamuli txa va xangisa.
18Txizimu txa txhatxha tingoti ta tikathula ta vafumeli,
txi sunga siwunu sawe ngu libhandi.
19Txizimu txa teka vathangeli va di handilwe;
vanyamitamo txa va thidhelisa.
20Ka vale vo thembeka, txa thavisa dipswi,
txi tshumetela mapimo vale vo kumba.
21Txa theketa kutxhipa txitimwi ka vathangeli,
txo dheseta siwunu sa va mtamo.
22Txizimu txa kombisa kutshima ka txidema,
se txi tisa mtsudi wa lifo kuwonekelani.
23Txa andisa vathu, txi gwita txi va lovisa;
txa hangalasa matiko txi tshumela txi ma wuyisa.
24Txa thavisa timbilu ta vathanglei va vathu va ha mafuni,
txi va peperukisela siwulani, ko pwata nzila.
25Txidemani va tsimbila va txi mbumbutela, ngu kupwata liwoningo,
se va txi dhedherekela nga madevi.
Currently Selected:
Jobe 12: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
