Jobe 11
11
Kuwombawomba ko khata ka Zofari
(Txipimo txa 11)
Txizimu txo kutsayisa kudotho kupinda ti ti ku dinganako
1Sekoko Zofari, wa Mnahama, a to xamula a txi khene:
2Ina kutala ka siwotiso kha si na mbi xamulwa kani?
Wamwamna wule wo wombawombela a na va ni ditshuri kani?
3Ka makuhu ako ina va na malala vathu khani?
Se awe u na dhiwulela kupwateka ni wammweyo wo kuthela tingana kani?
4Nguko awe u ti khawe: Gondo yangu yi sawulekile;
ni sawulekile masoni kwako.
5Ina ngu ditshuri Txizimu txi mlulamisete kuwombawomba
e tula txisofu e ku xamula,
6se txi di kumahile u ziva sihunja sa wutxhari, si nga talelwa ngu kutsana;
ngu kumaha keto, ziva taku
Txizimu txa ku tsayisa ka kudotho,
na kuve mnandu wako mbwo pinda mpimo.
Ina awe u nga tumbula sihunja sa Txizimu kani?
7Ina u na manela tinzila ta Txizimu,
uza u hokela kuhetelelani ka wa Mtamo-wotshe kani?
8Wutxhari wa Txizimu wu gulekile kufana ni kudemba ka nzuma;
se awe u nga kota txani ku txi maha kani?
Wuziviwo wu tshimile ngutu kupinda kuhokoma ka mndiloni;
awe u ziva ta txani kani?
9Wuziviwo wu laphile kupinda mafu;
ni kuanama ko pinda ka linene.
10Ngako Txizimu txi txi khundumusa,
ni kutsiva, mwendo kupata,
i mani a no txi tsimba kani?
11Nguko txona txa va ziva vathu va walo, txa wona vale va mahanyelo o biha;
ina kha txi na mbi va khawulisa kani?
12Aniko m'thu wa diphanga mbwo pwata mapimo;
ina, m'thu a velekwa kufana ni mbongola ya txitinga.
Leka txionho
13Ngako awe u di lulamisete mbilu yako,
nawuluta manza ako kwakwe;
14ngako wu ti ho wubihi manzani kwako, wu tshotshe kule ni nawe,
kambe u nga leke ta walo ti maneka matendani kwako,
15sekoko khohe yako yi na guleka yi si nga ni tingana;
u na tsana, khu na mbi va ni dijowa.
16Nguko u na divala mithumo eyo,
u na yi alakanya kufana ni mati ale ma nga pinda.
17Se wutomi wako wu na woneka wu txi guleka, kufana ni mitshikari;
hambi ku txo va ni txidema, ku na fana ni mixo.
18Kambe u na va ni kuthemba, nguko ku na vaho kuverela;
u na wona madhawani kwako, u humula ngu kuthutha.
19Se u na otela, ni wammweyo kha na mbi kuxamala;
votala va na swahutela khohe yako.
20Aniko maso a vo biha ma na pfhupela;
wuthavelo wa ona wu na mwalala;
kuverela kwawe, i nava kuhuma ka muhefemulo.
Currently Selected:
Jobe 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
