Jeremiya 7
7
Jeremiya Dithepeleni
1Dipswi da Mkoma di nga ta ka Jeremiya, di txi kha dona: 2Ema ha txikeni ka Nyumba ya Mkoma, na u txi peka nyiwo eho ngu mhaka yiya, u txi khawe: Engisani mhaka ya Mkoma, anu motshenu va ka Judha, mi wulelako ngu sike siya ku ta khozela Mkoma. 3Mkoma wa Mabutho a Tiyimbi, Txizimu txa ka Israyeli, a khene:
Txhukwatisani mahanyelo anu ni mithumo yanu, sekoko ni na mi tumela kusimamisa mi aka ka wuwa wukhalo. 4Mi nga thembeni timhaka ta makuhu, mi txi khanu: Dithepele da Mkoma, Dithepele da Mkoma, Dithepele da Mkoma ngu dona diya!
5Nguko ngako mi txi txhukwatisa mahanyelo anu ni mithumo yanu, ngako mi txi lamula ngu kululama hagari ka m'thu ni mwakelani wakwe, 6ngako mi si xanisi muwuyi, txisiwana ni noni, ngako mi si theketi mnoha wa va va singako ni mnandu ka wuwa wukhalo, hambi ni kulondetela simwani sizimu, miva ni makhombo ngu kota yawe; 7sekoko ni na mi maha mi aka ka wuwa wukhalo, ka ditiko di ni nga ninga vatate vanu kala kupinduka.
8Anu mi themba timhaka ta makuhu ti si mi vhuniko txilo. 9Ina mi ngadi mi txi napa, mi daya, mi maha wugango, mi xambanya makuhu, mi hisa miphaxo yo bhumula ka Bhahali, ni kulondetela simwani sizimu asi mi si si ziviko kani? 10Sekoko mi ta ema masoni kwangu nyumbani muwa, kudhanwako ngu ditina dangu, mi txi khanu: Athu hi hulukile! Na kuve mi ngadi mi txi maha otshe manyaleyo. 11#Wona ni ka: Mat. 21:13; Mar. 11:17; Luk. 19:46. Ina nyumba yi yi dhanwako ngu ditina dangu, yi mahile phako ya makhamba masoni kwanu kani? Kunene, nani ni ti woni, kuwomba Mkoma. 12#Wona ni ka: Jox. 18:1; Mas. 78:60; Jer. 26:6. Tsulani koko ka wukhalo wangu wu nga ti manekela Silo, aho di nga ti zumbile kona ditina dangu kukhatani, mi txi ya wona ti ni nga maha, ngu mhaka ya wubihi wa vathu vangu va ka Israyeli. 13Kona kuwa koko, mi di mahile totshe tiya, kuwomba Mkoma, ni wombile kwanu i di ngadi mixo, ni mi gela, aniko kha ma engisa; ni to mi dhana, kambe kha ma xamula. 14Ngu konaho, ni na maha ka yiya nyumba yi dhanwako ngu ditina dangu, yona yi mi yi thembako, ni ka wukhalo wu ni nga wu ningela kwanu ni ka vatate vanu, ku nga ti ni nga maha ka Silo. 15Ni na mi tutumisa masoni kwangu, ngako ni hinganako ni ti tutumisile tindiyanu totshe, lihunzu lotshe la ka Israyeli.
Txieyiso txa vathu
16Ngu konaho, u nga va kombelele vava vathu, u nga dhuke u guleta dipswi ngu vona ngu mikombelo, u nga ni kombele txilo, nguko na mba kuengisa. 17Ina khu ti woni ti va ti mahako madhoropani ka va ka Judha kani ni mu ka magondo a Jerusalema kani. 18#Wona ni ka: Jer. 44:7-9. Vanana vo sengeletela tikhuni, vatate ve dhivela mndilo, ni vavasikati va vhuva mpupu kasi kumahela simbwanda txizimu txa txisikati, txi dhanwako ku mfumeli wa txisikati wa nzumani; na va txi ningela miningelo ya sakusela ka simwani sizimu, kasi ku ni wusela kuhenya. 19Kasi ngani va ni henyisako kani? Kuwomba Mkoma. Kha va njo ti wusela tingana vona vapune kani? 20Ngu konaho, Mkoma Nyamne wa sotshe, a khene: Ni na tshakunuta kuhenya kwangu ni txiviti txangu ka wuwa wukhalo, txitimwi ka vathu ni txitimwi ka sihari, ni txitimwi ka mindonga ya txitinga ni mihando ya mafu, si na tura si si koteki kutimwa.
21 Mkoma wa Mabutho a Tiyimbi, Txizimu txa Israyeli, a khene: Patani miningelo yanu ya kuhiswa ni miphaxo yanu, midya nyama ya yona. 22Nguko kha na gela vatate vanu, hambi ku va laya ngu didhawa da miningelo ya kuhiswa ni miphaxo, ka ditshikudo ni nga va humisa ditikoni ka Egipta. 23Aniko, ati ni nga va laya, ngu ti taku: Engisani dipswi dangu, sekoko ni na va Txizimu txanu, anu mi na va vathu vangu; tsimbilani ngu tinzila ti ni nga mi laya ngu tona, kasi ku mi na zumbiseka kwati. 24Aniko kha va engisa hambi ku riya tinzeve; se va to tsula makungoni kwawe ni mu ka kubanga ka timbilu tawe to biha, va to tshumelela msana, kha vaya masoni. 25Kukhukhela ditshiku di vatate vanu va nga khukha ngu dona ditikoni ka Egipta kala kuwa, ditshiku ni ditshiku, i di ngadi mixo, ni rumete kwanu sithumi sangu sotshe, i ku vaprofeti. 26Aniko kha va ma engisa, hambi ku riya tinzeve; va to bangisa tithamo tawe, ve maha kubiha kupinda ni vatate vawe.
27Ngu konaho u na va gela totshe timhaka tiya, kambe kha va na mbi engisa; u na va dhana, va si ku xamuli. 28Sekoko awe u na womba kwawe, u txi khawe: Adiya, ditiko di si engisiko dipswi da Mkoma Txizimu txawe, hambi kuamukela silayelo. Kuthembeka kuwalo, ku thavisilwe sisofuni kwawe.
Txitsayiso ngu mhaka yo khozela sithombe
29Yola misisi ya msungo wako,
u txi yi tshotsha kule,
indaya peka huwa mimangoni,
nguko Mkoma a lambile ni kuleka lihunzu
li li nga wusa kuhenya kwakwe.
30Nguko vanana va ka Judha va mahile kubiha masoni kwangu, kuwomba Mkoma; va wuletile manyala awe mu ka nyumba yi yi dhanwako ngu ditina dangu, ve yi nyenyezisa. 31Makhalo o guleka a Tofeti va ma akile mkovani ka mwanana wa Hinomi, kasi ve hisela kona vafana ni mahorana awe ngu mndilo; eto ni nga mba laya, ni kualakanya. 32Masiku ma nata, kuwomba Mkoma, ka onayo ku no mba dhuka kudhanwa ku Tofeti, hambi ku mkova wa mwanana wa Hinomi, aniko ku na dhanwa ku mkova wa kudayela; nguko a na tshotshelwa kona Tofeti, ngu kupwata wumwani wukhalo. 33Sirumbi sa vanana vathu si na dyiwa ngu sinyana sa nzuma ni sihari sa txitinga; kha ngaho a no si dinda. 34#Wona ni ka: Jer. 16:9; 25:10; Mtu. 18:23. Madhoropani ka Judha, ni mu magondoni ka Jerusalema, ni na malata dipswi da kuzumbiseka, ni dipswi da litsako, ni dipswi da mteki, ni dipswi da mtekiwa; nguko ditiko di na maha dirumbi.
Currently Selected:
Jeremiya 7: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
