Jeremiya 8
8
1Ka yoneyo mbimo, kuwomba Mkoma, marambu a vafumeli ni a manganakana a ka Judha, ni marambu a vaphaxeli, ni marambu a vaprofeti, ni marambu a vazumbi va Jerusalema, ma na fumbulelwa mayivani kwawe; 2ma na hangalaswa masoni ka ditambo ni mtxima ni tiyimbi ta nzuma, asi va nga si randa ni ku si thumela, ni si va nga si londetela, ve si wotisa ni ku si khizamela; kha ma na mbi ngadi me sengeletwa, hambi kukelelwa, ma na maha sinoniso ha mafuni. 3Ni va va nga sala ka lixaka la wubihi wa ku nga eto va na randa kufa kupinda kuhanya, ka otshe makhalo awa ni nga va tutumisa ka ona, kuwomba Mkoma wa Mabutho a Tiyimbi.
Txionho ni txitsayiso
4Kambe u na va gela, u txi khawe:
Mkoma a khene: Ina m'thu a ngawa asi tshumeli e wuka kani? A nga phawuka asi tshumeli e wuya kani? 5Ngu kutxani vathu va Jerusalema ve timela da magwito kani? Va tsani mu ka kutimela, va lamba kuwuya. 6Ni riyile nzeve, ni engisela, aniko kha va wombi ditshuri; kha ngaho a hundulukako kubihani kwakwe, a txi khene:
Intxani ni nga txi maha kani?
Votshe va tutuma nga mahantxhi ma kuluvetelako kulwani.
7Hambi nyawukolwe wa ndengalengani,
wa ziva timbimo takwe.
Dituva, ni nyawukolwe ni mbeluvelu,
sa ziva mbimo yo tshumela ngu yona.
Aniko vathu vangu kha va zivi milayo ya Mkoma.
8Ngu kutxani mi ku khanu: Athu hi txharihile, hi ni Mlayo wa Mkoma kani? Wona mtenga wa makuhu a vabhali, wu hembile makuhu. 9Titxhari ti wite tingana, ta dhudhumela ni kuñolwa. Ti kanetile mhaka ya Mkoma. Mbuzivi muni ti ku nawo kani? 10Ngu konaho ni na ningela vasikati vawe ka vamwani, ni tithembwe tawe ka va va no ti honyola. Nguko votshe va ti ningetete mu ko navela, kukhukhela ka wam'dotho kala ka wa hombe, kukhukhela ka vaprofeti kala ka vaphaxeli, votshe va kanganyisa. 11#Wona ni ka: Eze. 13:10. Kha va theli kota ngu kuthuma txilonda txa m'horana wa vanana vangu, va txi kha vona:
Kuthuthile, kuthuthile, kuve kha ku na kuthutha. 12Ina va ni tingana ngu kumaha manyala kani? Kha va na tingana, hambi kupima ti taku nji txani kuwiswa tingana! Ngu konaho, va na wa kumweko ni va vawako, kambe va na humbwa ka mbimo ya kutsayiswa kwawe, kuwomba Mkoma.
13Ni na va lovisa va txi bhi, kuwomba Mkoma. Kha ku na mauvha mndongani ka m'vhina,
hambi makuwu mkuwuni,
ni ona mazokoro ma omile.
Asi ni nga va ninga si na pshwonyowoka kwawe.
14Ngu kutxani hi ku ngadi hi txi zumba hawa kani?
Ahi tshanganeni, hi txi wulela ka madhoropa o tsana, se eho hi txi malala;
nguko konakuwa, Mkoma Txizimu txathu, a hi malatile, e hi seta mati a nyongwa; nguko hi onhete Mkoma.
15Hi ti verete kuthutha, aniko kha ka maheka wunene,
hi verete ngu mbimo yo thumwa, kuve kuthava kuho!
16Diguwa da mahantxhi akwe di pfala Dhani;
mafu otshe ma zinginika ngu kuemba ka ona ka mtamo;
nguko va tile ve ta hetisa ditiko ni sotshe si ku ka dona,
didhoropa ni votshe va va zumbako ka dona.
17Nguko ni na rumela minyoka ni tixaru hagari kwanu, asi si nga mbi fumbwa, sona si na mi luma, kuwomba Mkoma.
Jeremiya a xanisekela vathu
18Ni na ti thavelelisa kutxani kupandiseka kwangu kani?
Mbilu yangu ya xaniseka.
19Hi nga pfa dipswi da txidilo
da mwanana wa txisikati wa vathu vangu,
adi di humako ditikoni ka kule, di txi kha dona:
Kasi Mkoma khangaho Siyoni kani?
Ina Mkoma wakwe kha nga kwakwe kani?
Ngu kutxani va nga vhinjukisa kuhenya kwangu
ngu sifananiso sawe,
ni sizimu sa vamatiko kani?
20Kuelula kupindile
ni mbimo ya kuhisa yi gwitetwe,
kuve athu kha ha hanyiswa!
21Ni karateka ngu mhaka ya txilonda
txa mwanana wa txisikati wa vathu vangu,
ni ni xomulo, ni ñotwe ngu kuthava.
22Ina kha ku nga ni mrende Gileyadhi,
mwendo kuwalo ñanga koneyo kani?
Ngu txani koko, a nga mbi kalamukiswa mwanana wa txisikati wa vathu vangu kani?
Currently Selected:
Jeremiya 8: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
