Jeremiya 34
34
Dipswi ka mfumeli Zedhekiya
1Dipswi di di nga ta ka Jeremiya ngu ka Mkoma, ahawa Nebhukodhonosori, mfumeli wa Bhabhilona, ni yotshe yimbi yakwe, ni yotshe mifumo ya mafu, aawa ma nga ti fumwa ngu ngene, ni otshe matiko ale ma ngalwa, me wukela Jerusalema, ni otshe madhoropa a kona, di txi kha dona: 2A womba tiya Mkoma, Txizimu txa Israyeli: Tsula u ya gela Zedhekiya, mfumeli wa ka Judha, u txi khawe: Mkoma a khene:
Ni na ningela diya didhoropa manzani ka mfumeli wa Bhabhilona, ene a na di hisa. 3Kambe awe khu na mba huluka manzani kwakwe, kambe u na ñolwa u txi ningelwa manzani kwakwe; u na wonana ni mfumeli wa Bhabhilona, ene a na womba-womba ni nawe khohe ni khohe, se u na tsula Bhabhilona. 4Hambi keto engisa dipswi da Mkoma, awe Zedhekiya mfumeli wa ka Judha, Mkoma a womba tiya ngu ngawe: Khu na mbi dawa ngu ditxhari. 5U na fa ngu kuthutha; u na tshotshiswa kuhiswa nga tile va nga mahiswa tona vatate vako, vafumeli va kaleko ava va nga ti masoni kwako; va na kudilela, va txi kha vona: Yowe! Mkoma! Nguko ngani ni wombako dipswi, kuwomba Mkoma.
6Se mprofeti Jeremiya a to gela Zedhekiya, mfumeli wa ka Judha, totshe timhaka tiya, va di Jerusalema, 7mbimo yile yimbi ya mfumeli wa Bhabhilona yi nga lwa ni Jerusalema, ni madhoropa otshe a ka Judha, ale ma nga ti sate, yi wukela Lakixe ni Azeka; nguko madhoropa awa o tsana, ngu awa ma nga sala, hagari ka madhoropa a ka Judha.
Tikhumbi to txhatxhiswa
8Ayiya i mhaka ya Mkoma yi nga ta ka Jeremiya, msana ka kuva mfumeli Zedhekiya a di mahile txitumelelano, ni votshe vathu va nga ti Jerusalema, ati taku ve huwelela kutxhatxheka; 9kasi ku mmweyo ni mmweyo e txhatxha txithumi txakwe txatxiwamna ni txatxisikati, ngako i di Muhebheru wa txiwamna mwendo Muhebheru wa txisikati, kasi ku si nga ni wu a thumisako Mujudha-kulowe nga khumbi. 10Manganakana ni vathu votshe va va nga wulela ketxo txitumelelano, va to tumela ti taku mmweyo ni mmweyo a txi txhatxha txithumi txakwe txatxiwamna ni txatxisikati si txi ti tsulela, va si si thumisi kambe; va to engisa ve si txhatxha. 11Aniko koko, ngu msana va to ti laya, se ve tshumeta sithumi sa txiwamna ni sa txisikati, asile va ngadi si txhatxhele, va txi si khonela wukhumbi vavamna ni vavasikati.
12Di tile koko dipswi da Mkoma ka Jeremiya, ngu ka Mkoma, di txi kha dona: 13A womba tiya Mkoma, Txizimu txa ka Israyeli:
Ni mahile txitumelelano ni vakokwani vanu ditshikwedo ni nga va humisa ditikoni ka Egipta, nyumbani ka wukhumbi, ni txi khani: 14#Wona ni ka: Eks. 21:2; Dhewut. 15:12. Kugumani ka mtxhanu wa malembe ni mambidi, mmwani ni mmwani a txhatxha muhebherukulowe a wu a nga ti xavisa kwakwe; a na kuthumela mtxhanu wa malembe ni dimwedo, sekoko u na mleka e txhatxheka; aniko vakokwani vanu kha va ni engisa hambi kutula tinzeve. 15Anu mi ti ti tshumete, mi maha ati ti nga lulama masoni kwangu, ngu kupeka nyiwo ngu kutxhatxheka, mmwani ni mmwani ka mwaakelani wakwe; mi ti mahile txitumelelano kumweko ni nani ka yiya nyumba, yi dhanwako ngu ditina dangu. 16Aniko mi tshumelete msana, mi txi txhipisa ditina dangu, mmweyo ni mmweyo a txi wuyisa txithumi txakwe txatxiwamna ni txatxisikati, asi mi nga ti si txhatxhile si txi ti tsulela; mi si khonete kambe wukhumbi, ti taku si txi mi thumela.
17Ngu konaho, Mkoma a khene: Anu kha ma ni engisa, kha ma peka nyiwo ya kutxhatxheka mmweyo ni mmweyo ka mmwani, ni mmweyo ni mmweyo ka mwakelani wakwe. Wonani, na mi bikela kutxhatxheka, kuwomba Mkoma, ni txhatxha matxhari, ni mtungu, ni nzala; na mi ningela mi txi xaniswa ka yotshe mifumo ya mafu. 18Kambe ni na ningela vathu vava va nga hambunyeta txitumelelano txangu, va nga mbi xayisa sileletelo sa txitumelelano txi va nga txi maha masoni kwangu, aha va nga bhanda dirole ngu hagari ve pinda ngu hagari ka sipande sa kona; 19i ku manganakana a ka Judha ni a Jerusalema, ni tinduna ni vaphaxeli ni votshe vathu va ditiko ava va nga pinda ngu hagari ka dirole. 20Ni na va ningela manzani ka valala vawe, ni manzani kava va va xuvelako kufa, sirumbi sawe si na dyiwa ngu sinyana sa nzuma ni sibanda sa mafu. 21Zedhekiya mfumeli wa ka Judha, kumweko ni vathangeli vakwe ni na va ningela manzani ka valala vawe ni manzani ka vava va xuvelako kufa, i ku manzani ka mfumeli wa Bhabhilona, awu a nga khukha kwanu. 22Wona, ni na va leletela ti taku ve wuya ka diya didhoropa, kuwomba Mkoma, va na lwa nado, ve di khozisa, va txi di hisa ngu mndilo; ni madhoropa a ka Judha ma na maha txiwula, ku si maneki wo zumba ka wona.
Currently Selected:
Jeremiya 34: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
