Jeremiya 33
33
Tximwani txithembiso txa themba
1Se dipswi da Mkoma di tile da wumbidi ka Jeremiya, a di ngadi seketwe banzani ka vawoneleli, di txi kha dona:
2Kuwomba Mkoma awu a thumako mthumo wakwe, awu a longiselako ni kumaha; i Mkoma ditina dakwe:
3Kwangula kwangu ni na kuxamula, ni na kukomba silo sa hombe, u si si ziviko. 4Nguko Mkoma, Txizimu txa Israyeli, a womba xungetano ni tinyumba ta diya didhoropa, ni xungetano ngu tinyumba ta vafumeli va ka Judha, ati ti nga khundumuselwa, kasi kuvhikela didhoropa ka maphala ni matxhari. 5Va wulete ka tona kasi kulwa ni Vakaldheya, aniko ti na tala ni sirumbi sa vathu va ni va dayako kuhenyani kwangu, ni txiviti txangu, ava ni nga sisela didhoropa diya khohe yangu ngu mhaka ya wubihi wawe. 6Wona, taku ni na tisa txitimwi ka dona, wutomi ni kuhanya, ni va kalamukisa, kambe ni na va komba wungi wa kuthutha ni ditshuri. 7Ni na wuyisa va vo ñolwa va ka Judha ni Israyeli, ni na va akisa nga kale. 8Ni na va basisa ka wubihi wawe wotshe awu va nga ni onhela ngu wona; ni txi va divalela sionho sawe sotshe asi va nga ni wukela ngu sona, asi va nga hambuka ngu sona masoni kwangu. 9Se adiya didhoropa di na va da ditina da litsako ni kudhumisa ni wudhumo, hagari ka otshe matiko a ha mafuni, ma no pfa wotshe wunene wu ni mmahelako; kambe va na xamala, ni kudhudhumela, ngu mhaka ya wotshe wunene, ni mhaka ya kotshe kuthutha, aku ni di ningako.
10 Mkoma a khene: Ka wukhalo wuwa (anu mi ku khanu njiwula, kha ku nga ni m'thu hambi txihari), ni madhoropani ka Judha, ni magondoni ka Jerusalema, aawa ma nga onhetelwa, ati to ku si maneki ni m'thu emo. 11Ku na pfala dipswi da mkulungwani ni da litsako, dipswi da mteki ni da mtekiwa, ni dipswi da va va ku kha vona:
Dhumisani Mkoma wa Mabutho a Tiyimbi,
nguko mnene, nguko wumbilu wakwe mbwa kala kupinduka;
ni mapswi a va va nehako miningelo ya kubonga Nyumbani ka Mkoma.
Nguko ni wuyisa ava va nga ñolwa ka wuwa wukhalo, va na nga mbimoni ka kale, kuwomba Mkoma.
12 Mkoma wa Mabutho a Tiyimbi a khene:
Ka wuwa wukhalo wu nga maha txiwula, wu singako ni m'thu hambi txihari, ni ka otshe madhoropa a wona, ku ngadi ku txi na vaho wukhalo wa vadyisi, ava va mahako ti to sifuyo sawe si txi zumba ka wona. 13Ka Madhoropa a mimangoni, ni madhoropani a tibalani, ni madhoropani ka mswa-ditambo, ni ditikoni ka Bhenjamini, ni madhawani ka Jerusalema, ni madhoropani ka Judha, sifuyo si ngadi si txi na pinda ngu manzani ka vabali, kuwomba Mkoma.
14“Wona taku, mata masiku, kuwomba Mkoma, ayo ni no tatisa mhaka ya yinene, ayi ni nga yi womba ngu nyumba ya ka Israyeli, mayelano ngu nyumba ya ka Judha.” 15Keyo masiku ni ka yoneyo mbimo ni na wusela Dhavhidha mpuka wo lulama; ene a na lamula ngu nongameto ni wululamo amu ditikoni. 16Judha a na hanyiswa kayo masiku, ni Jerusalema a na zumba ngu kuthutha. Va na m'dhana ngu ditina do kha vona, Mkoma ngene kululama kwathu. 17Nguko Mkoma a khene: Dhavhidha kha na mba dhuka e pwata m'thu a zumbako ha txikhaloni ka wukoma ka nyumba ya Israyeli; 18#Wona ni ka: Mit. 3:5-10. ni vaphaxeli i ku Valevhi kha va na mbi pwata wo tisa miningelo ya kuhiswa masoni kwangu, ni kuhisa miningelo ya sakudya, ni kuhumisa miphaxelo ditshiku ni ditshiku.
19Se dipswi da Mkoma di tile ka Jeremiya, di txi kha dona:
20 Mkoma a khene: I diku ma sikota kufunya txitumelelano txangu ni mitshikari, ni txitumelelano txangu ni wusiku, ati taku aho ku si nga ni wusiku ni mitshikari ka mbimo ya kona; 21se txitumelelano txangu ni Dhavhidha, txithumi txangu, txi nga funyeka, ti taku asi nja ngave ni mwanana wo fuma txituluni kwakwe ka wukoma; kumweko ni Valevhi i ku vaphaxeli va va ni thumelako. 22Ni na engetela mtengo wa liveleko la txithumi txangu Dhavhidha ni wa Valevhi i ku vaphaxeli, nga ku mtengo wa yimbi ya nzuma wu si balwiko, hambi ni mtxhefa wa linene.
23Se dipswi da Mkoma di tile kambe ka Jeremiya, di txi kha dona:
24“Ina u woni ti va ti wombako vathu, va txi kha vona: Tiveleko timbidi ati Mkoma a nga ti sawula, a ti lekile kani? Kambe va txhipisa vathu vangu, va txi nga kha va nga nga va vathu, masoni kwawe.” 25Mkoma a khene: Txitumelelano txi ni nga txi maha ni wusiku ni mitshikari txi txo lamba kutsana, ngako ni sa emisa milayo yo fumela nzuma ni mafu, 26ni na leka liveleko la Jakobe ni la Dhavhidha txithumi txangu, ti taku ni si dhuki ni teka hagari ka vanana vakwe awu a no fumela liveleko la Abrahama, Isaake ni Jakobe, nguko ni na wuyisa va vo ñolwa vawe ni txi va hawukela.
Currently Selected:
Jeremiya 33: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
