Jeremiya 35
35
Jeremiya ni va ka Rekabhi
1 # Wona ni ka: 2 Vafu. 23:36; 24:6; 2 Mak. 36:5-7. Di tile dipswi ka Jeremiya ngu ka Mkoma, ka masiku a Jehoyakimi, mwana Josiya, mfumeli wa ka Judha, di txi kha dona:
2Tsula ka nyumba ya va ka Rekabhi, u txi ya womba-womba, u va heleketa Nyumbani ka Mkoma, ka wumwewo wa makhalo, u txi ya va ninga vhinya ve sela.
3Sekoko ni to teka Jazaniya, mwana Jeremiya, mwana Habhaziniya, ni vanawe ni vanana vakwe votshe ni yotshe nyumba ya ka Rekabhi, 4ni to va tsulisa Nyumbani ka Mkoma, ka wukhalo wa vanana va Hanani, mwana Igdhaliya, i ku m'thu wa Txizimu, awule wu nga ti gwatamile ni wukhalo wa vathangeli, wu ku txitimwi ka wukhalo wa Mahaseya mwana Salumi, muwoneleti wa txike. 5Ni to veka tifukwana to tala ngu vhinya masoni ka vanana va nyumba ya ka Rekabhi, ni magombe, ni txi khani kwawe:
Selani vhinya.
6Aniko va to xamula va txi kha vona:
Kha hi na mbi sela vhinya, nguko Jonadhabhe, mwana Rekabhi, tate wathu, a hi layile a txi khene: Mi nga dhuki mi sela vhinya, anu ni vanana vanu. 7Mi nga dhuki mi aka tinyumba, mi nga phayeni timbewu, mi nga phayeni mivhina, hambi ku va naso; aniko mi na zumba matendani, masiku anu otshe, kasi mi txi na hanya masiku o tala, ka ditiko di mi luvelako ka dona. 8Hi engisile dipswi da Jonadhabhe, tate wathu ka totshe ti a nga hi laya ka tona; ti taku hi si seli vhinya ni ditshiku dimwedo, athu ni vasikati vathu, ni vanana vathu va txiwamna ni va txisikati; 9hambi ni kuaka tinyumba kuva hi zumba ka tona; kambe kha hi na txivhina mwendo thembwe, hambi ni mbewu. 10Aniko hi zumbile matendani, hi engisa ni kumaha totshe eto Jonadhabhe, tate wathu, a nga hi laya tona. 11Ku to maheka taku, mbimo yile Nebhukodhonosori, mfumeli wa Bhabhilona, a nga ta ka ditiko diya, hi ti khathu: Ngonani, hiya Jerusalema, hi thava yimbi ya Vakaldheya, ni yimbi ya Vasiriya; ngukonaho hi na ya zumba Jerusalema.
12Sekoko dipswi da Mkoma di tile ka Jeremiya di txi ta kha dona: 13Mkoma wa Mabutho a Tiyimbi, Txizimu txa ka Israyeli, a khene: Tsula u txi ya va gela vathu va va ka Judha, ni vaaki va Jerusalema, u txi khawe: Ina kha mi na mbiswa mi amukela gondo ngu kupfa timhaka tangu kani? Kuwomba Mkoma. 14Timhaka ta Jonadhabhe, mwana Rekabhi, ati a nga laya vanana vakwe ti to va si seli vhinya, va ti xayisile; kha va sela kala ni nyamsi kuwa; nguko va engisile mlayo wa tate wawe; ani koko nitako ni txi womba kwanu, ni phindula ni mi gela, aniko anu, kha ma ni engisa. 15Se ni mi rumete sithumi, i ku vaprofeti, va txi phindula, ve rumela va txi kha vona: Hundulukani, konakuwa, mmweyo ni mmweyo nzilani kwakwe ko biha, mi txi txhukwatisa mithumo yanu ya yinene, kambe mi nga londeteleni simwani sizimu; kasi ku si thumela; se ngu kumaha keto, mi na zumba ka ditiko di ni nga mi ninga, anu ni vatate vanu; aniko kha ma riya tinzeve, hambi ku ni engisa ani. 16Nguko vanana va Jonadhabhe, mwana Rekabhi, va xayisile sirumo sa tate wawe, asile ene a nga va laya, aniko vathu vava kha va ni engisa, 17Mkoma, Txizimu txa Mabutho a Tiyimbi, Txizimu txa ka Israyeli, a womba tiya:
Wona, ni na neha txitimwi ka Judha, ni ka votshe va zumbako Jerusalema, dotshe dikhombo ni ngadi womba kwawe; nguko ni khala ku va gela, aniko kha va engisa; ni va dhani, aniko kha va xamula.
18Se ka nyumba ya va ka Rekabhi, Jeremiya a ti khene: Mkoma wa Mabutho a Tiyimbi, Txizimu txa ka Israyeli, a womba tiya:
Ngako mi nga engisa sirumo sa Jonadhabhe, tate wanu, mi txi xayisa yotshe milayo yakwe, ni kumaha totshe ti a nga mi leleta, 19Mkoma wa Mabutho a Tiyimbi, Txizimu txa ka Israyeli, a womba tiya:
Kha ku na mbi pwateka wamwamna ka Jonadhabhe, mwana Rekabhi, awu a no ema masoni kwangu ka otshe masiku.
Currently Selected:
Jeremiya 35: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
