Jeremiya 32
32
Jeremiya a txi xava thembwe
1Ndiye mhaka yi nga ta ka Jeremiya ngu ka Mkoma, ngu dilembe da wugumi da Zedhekiya, mfumeli wa ka Judha, i ti dilembe da digumi ni mtxhanu ni mararu a Nebhukodhonosori. 2(Ka yoneyo mbimo tiyimbi ta mfumeli wa Bhabhilona ti to randela Jerusalema. Mprofeti Jeremiya a ti ti seketwe nyumbani ka vawoneleli va nyumba ya mfumeli wa ka Judha. 3Nguko Zedhekiya, mfumeli wa ka Judha, a ti ti msekete, a txi khene: U profetela txani u txi khawe: Mkoma a khene: Wona taku na ningela didhoropa diya manzani ka mfumeli wa Bhabhilona, se ene a na di teka; 4hambi ene Zedhekiya, mfumeli wa ka Judha kha na mbi huluka manzani ka Vakaldheya; kambe a na ningelwa manzani ka mfumeli wa Bhabhilona, kuva a txi womba-womba nayo, ve wonana ngu maso; 5a na yisa Zedhekiya aniya Bhabhilona, a na ya zumba kona kala ni txi mu endela, kuwomba Mkoma. Ngako mi txilwa ni Vakaldheya ina kha mi na mbi humelela kani)?
6Jeremiya koko, a ti khene: Dipswi da Mkoma di tile kwangu, di txi kha dona: 7Wona ti to Hananeli, mwana Salumi, tatanyani wako, a nata kwako, a txi ta khene: Ti xavele thembwe yangu yi ku Anatote, nguko u ni fanelo ku yi tirula u txi yi xava. 8Sekoko Hananeli, mwanana wa tatanyani wangu, a tile kwangu amuwa Banzani ka vawoneleli, nga ti Mkoma a nga womba, a txi khene kwangu:
Xava thembwe yangu yi ku Anatote, ditikoni ka Bhenjamini, nguko u ni madingano a kudya thomba, ni a ku yi tirula, njiavelo yona thembwe yiya. Sekoko ni to pimisa ti to ndipswi da Mkoma.
9Ni to xava thembwe ya Hananeli, mwana tatanyani wangu, ayi yi ku Anatote, ni to mpimela male, ya digumi ni mtxhanu ni mambidi da maxekele a silivhela. 10Ni to bhala dipapilo da mxavo, ni txi di tsanisa na ni di ni tifakazi; sekoko ni to pima male txikaloni. 11Ni to teka dipapilo da mxavo, adi di nga tsaniswa ngu mthangeli ni mlayo, ni di di nga mba tsaniswa; 12ni to henjeleta dipapilo da mxavo ka Bharuke mwana Neriya, mwana Mahaseya, masoni ka Hananeli, mwana tatanyani wangu, ni masoni ka tifakazi ti ti nga sayina dipapilo da mxavo, ni masoni ka votshe Vajudha vava va nga ti khalahatshile dizumboni ka vawoneleli. 13Sekoko ni to laya Bharuke masoni kwakwe, ni txi khani:
14A womba tiya Mkoma wa Mabutho a Tiyimbi, Txizimu txa Israyeli: Teka mapapilo awa, dipapilo di di nga tsaniswa, ni di di nga mbi sekwa, u txi ma beta ka khadi ya dibumba, kuva ma txi na xayiseka masiku o tala. 15Nguko a womba tiya Mkoma wa Mabutho a Tiyimbi, Txizimu txa ka Israyeli: Mi ngadi mi txi na xava tinyumba, ni tithembwe, ni mipeto, ka diya ditiko.
Mkombelo wa Jeremiya
16Se msana ka kuva ni di ningete dipapilo da mxavo ka Bharuke, mwana Neriya, ni to kombela ka Mkoma, ni txi khani:
17O! Mkoma Txizimu! Ngawe u nga maha nzuma ni mafu ngu mtamo wako wa hombe ni diwoko dako di nga nawulutwa; kha ku na txilo txi tandako kwako: 18Ngawe u nga mahela wumbilu magumi a mazana, u tshumeta wubihi wa vatate tikhanani ka vanana vawe msana kwawe; u wa hombe, Txizimu Nyamitamo, ditina dako u Mkoma wa Mabutho a Tiyimbi. 19U wa hombe mu ka makungo, u ni mtamo mu ka kumaha, maso ako ma wona otshe mahanyelo a vathu, kasi kuninga ka mmwani ni mmwani madingano ni mahanyelo akwe, ni madingano ni mihando yakwe. 20Awe u mahile sikombiso ni sixamaliso ditikoni ka Egipta, ni txitimwi ka Israyeli, ni hagari ka vamwani vathu kala ni nyamsi kuwa; u ti mahete ditina di u ku nado ka diya ditshiku; 21u to humisa vathu vako va Israyeli ngu ditikoni ka Egipta ngu sikombiso ni sixamaliso, ngu dianza da mtamo di nga nawulutwa, ni kuxamalisa ko thisa. 22U va ningile ditiko di u ngadi xambanya ka vatate vawe ati taku u na va ninga dona, ditiko di di khulungako masi ni wulombe; 23va tota ve ta di khozisa, aniko kha va engisa dipswi dako, hambi kutsimbila ngu mlayo wako; ni totshe ti u nga ti va layile ku ti maha, kha va ti maha; uza u txi va humisela otshe makhombo awa.
24Hi nga wona maguma! Va tete ku ta wukela didhoropa, kasi ku ta di teka, se didhoropa di ningetwe manzani ka Vakaldheya, va valwako navo ngu ditxhari, ni nzala, ni mtungu; se ati u nga womba ti mahekile, ngu tona ti u ti wonako. 25Mkoma Txizimu, hambi ti di ngeto, u ti nga khawe kwangu. Ti xavele thembwe yiya, uva ni tifakazi, kuve didhoropa di ningetwe manzani ka Vakalddheya.
Xamulo ya Txizimu
26Sekoko dipswi di tile ka Jeremiya ngu ka Mkoma, di txi kha dona:
27Ngani Mkoma Txizimu txa vathu votshe; ina txi ho atxi ni nga txi tandako kani? 28Ngu konaho, Mkoma a khene: Wona, ni na ningela diya didhoropa manzani ka Vakaldheya, ni manzani ka Nebhukodhonosori mfumeli wa Bhabhilona, a na di teka. 29Vakaldheya va randelako didhoropa diya, va na wulela ka dona va txi di hisa ngu mndilo, va txi hisa ni tinyumba totshe ati ku hiselwako ka tona mabaselo a Bhahali, ni kuningela miningelo ya kusela ka simwani sizimu, va txi ni henyisa. 30Nguko kukhukhela ha wuphyani kwawe, vanana va ka Israyeli, ni vanana va ka Judha, va mahi va wubihi dwe masoni kwangu, nguko vanana va ka Israyeli va ni henyisile ngu mithumo ya manza awe, kuwomba Mkoma. 31Nguko adiya didhoropa di vhilusile kuhenya kwangu ni txiviti txangu kukhukhela ditshikwedo va ngadi aka kala nyamsi kuwa; kuva ni txi na di thavisa masoni kwangu. 32Ngu mhaka ya wubihi wotshe wa vanana va ka Israyeli ni vanana va ka Judha, awu va nga wu maha kasi ku ni henyisa, vona ni vafumeli vawe, ni vathangeli vawe, ni vaphaxeli vawe, ni vaprofeti, ni vathu va ka Judha ni vaaki va Jerusalema. 33Va ni tshuralete, kha va ni engisa; hambiko ni nga va gondisa kambe ni kambe, kha va engisa ti taku va kawukwa. 34Aniko va to mahetela manyala awe, nyumbani mu kudhanwako ngu ditina dangu, va txi di nyenyezisa. 35#Wona ni ka: Levh. 18:21; 2 Vafu. 23:10; Jer. 7:30-31; 19:1-6. Bhahali va mu akete makhalo o guleka, mkovani ka mwana Hinomi, ve hisela Moloke vanana vawe, va txiwamna ni va txisikati; eto ni nga mba va ruma tona, hambi kumaneka mapimoni kwangu ti taku, va maha manyala awe, ve maha ti to Judha a txi onha.
Txithembiso txa themba
36Ngu konaho, konkuwa Mkoma, Txizimu txa Israyeli, a khene koko xungetano ngu didhoropa diya, mi di wombako, mi txi khanu:
Di ningetwe manzani ka mfumeli wa Bhabhilona ngu ditxhari, ni nzala, ni mtungu. 37Wonani, ni na mi tshanganisela ngu matikoni kotshe, ayo ni nga va tutumisela ka ona kuhenyani kwangu ni txiviti txangu ni dikhulo da hombe; ni na tshumela ni va wuyisa ka wukhalo wuwa, ni va maha ve zumbiseka. 38Vona va na va vathu vangu, nanani ni nave Txizimu txawe. 39Ni na vaha mbilu yimweyo ni va gondisa nzila yimweyo ya ku ni thava kala kupinduka; va na kateka vona ni vanana vawe msana kwawe. 40Ni na maha navo txitumelelano txi si gwitelwiko, ati taku kha ni na mbi va tshuralela, ni si leki ku va katekisa; ni veka txithavo txangu timbiluni kwawe, ti taku va si ngadi ve ni tshuralela. 41Ni na zilimukiswa ngu vona, ni txi va katekisa, kambe ni na va zimeka ditikoni muwa ngu mbilu yangu yotshe ni muhefemulo wangu wotshe.
42Nguko Mkoma a khene: Ngako ni nga tisa dotshe dikhombo diya da hombe txitimwi ka vathu vava, ngu toneto, ni na tisa txitimwi kwawe, otshe makatekwa awa ni nga va thembisa. 43Ku nga txi na xavwa tithembwe ka diya ditiko, adiya anu mi ku khanu: Njiwula, kha ku na m'ti hambi txihari ka dona, di ningetwe manzani ka Vakaldheya. 44Va na xava tithembwe ngu male, ve bhala mapapilo a mxavo, ve ma tsanisa, ve dhana tifakazi, amu ditikoni ka Bhenjamini ni madhawani ka Jerusalema, ni madhoropani ka Judha, ni ka madhoropa a mimangoni, ni madhoropa a tibalani, ni madhoropani ka mswa-ditambo; nguko ni na wuyisa vo ñolwa, kuwomba Mkoma.
Currently Selected:
Jeremiya 32: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
