Jeremiya 31
31
Kuwuya ka vathu va Israyeli
1Ka yona yile mbimo, kuwomba Mkoma, ni na va Txizimu txa totshe tihunzu ta ka Israyeli, vona va na va vathu vangu. 2Mkoma a khene:
Vathu va va nga huluka matxhari, va mani wuxinji txiwulani; ni na ya ninga Israyeli kuva e humula. 3Mkoma a wonekile kwangu ngu kule, a txi khene: Ni ku randile ngu lirando li li si gwitelwiko; na ku xayisela wuxinji wangu. 4Ni na kuaketa, u na va u di akilwe, awe wotuma wa Israyeli; u na tshumela u txi ti longisela sikhiti, u txi huma kuya sinya ngu kutsaka. 5U nga txi na phaya sivhina mimangoni ka Samariya; ava va phayako va na dya mihando ya kona. 6Nguko ku na hoka ditshiku dile vawoneleli va mimangoni ka Efrayime va no dhana ngu dona, va txi kha vona: Khukhani, ahiyeni Siyoni ka Mkoma, Txizimu txathu.
7Nguko Mkoma a khene:
Embelelani ngu litsako ka Jakobe,
giringani ngu mhaka ya wu i ku mfumeli wa matiko;
embelelani tindando, mi txi khanu:
Mkoma, hanyisa vathu vako,
i ku misalelwa ya Israyeli.
8Ni na va wuyisa ngu ditikoni ka Wuphemba,
ni txi va sengeleta ngu magemeta-mitshi ka mafu;
kumweko navo, ku ni mabhofu ni silima,
vo khosa,#31:8 Txirumbu txa hombe. Ni vale va lumwako, va ku hafuhi ni kuveleka.
va na wuya i ti didhendele#31:8 Mabutho a vathu. da hombe.
9Va na wuya va txi dila,
ni txi va heleketa na va txi khongela;
ni na va thangela minamboni ka mati,
ngu nzila yo basa, eyo va na kwa mbi huma ka yona;
ngu ku ni ku tate ka Israyeli,
matiwula angu ngu Efrayime.
10Engisani Dipswi da Mkoma anu matiko,
zivisani sitondolo sa kule, mi txi khanu:
Awu a nga hangalasa Israyeli
a na mu sengeleta, a txi mu xayisa
nga m'dyisi ka tinvuta takwe.
11Nguko Mkoma a txhatxhisile Jakobe,
a txi mtirula ka dianza di ku ni mtamo kupinda ene.
12Vanata va txi embelela ngu litsako
aniya mmangoni ka Siyoni,
ve tutumela wunene wa Mkoma,
amu ka fulaho, ni vhinya, ni mafura,
amu ka tihambana ni marole,
dihika dawe di na fana ni thembwe
yi yi nga nakaniswa, kha va na mbiswa ve dhindirika.
13Sekoko mahorana ma na ti zilimukisa ngu kusinya,
majaha ni sikosana ma na tsaka kumweko;
nguko ni na phemberusa kudila kwawe kuva litsako
ni na va tangalisa ni txi va tsakisa mu kuxanisekani kwawe.
14Ni na khurisa mimoya ya vaphaxeli ngu mafura,
sekoko vathu vangu va na khura ngu silo sa sinene sangu,
kuwomba Mkoma.
Txizimu txi ni wumbilu ka Israyeli
15 Mkoma a khene: Huwa ya pfala aniya Rama,
ya xomulo ni kudila ka txiviti,
i Rakeli a dilelako vanana vakwe
wa lamba kuthavelelwa
nguko vanana kha va nga ngadi ho.
16 Mkoma a khene:
U ngaswe u txi dila,
maso ako ma nga thekete mirongo;
nguko mithumo yako yi na dihelwa, kuwomba Mkoma;
va na wuya ngu niya ditikoni ka valala.
17Kuthemba kuho kwako ngu mbimo yi yitako,
ka liveleko lako, kuwomba Mkoma,
nguko vanana vako va na wuyela ditikoni kwawe.
18Ni pfite Efrayime atxi titsetsa, a txi khene:
U ni tsayisile, ni txi kwapwa kufana ni txidhunana
txa kwa mbi tolovela dikange,
ni hunduluse, ni na hunduluka,
nguko ngawe Mkoma, Txizimu txangu.
19Msana ka kuva ni di hundulukile, ni to ti sola;
sekoko aha ni nga tiziva wutumbu,
ni pekwa nyonga;
ni so koyo tingana, ni txi kanganyiseka,
nguko ni rwate txisolo txa wuphya wangu.
20Ina Efrayime hi nga mwanangu a randekako kani?
Txirandwa ngu mbilu kani?
Nguko hambi ni txi m'wukela,
na khumbula ngu kupinda mpimo
mbilu yangu ya bhibhikela ngu mhaka yakwe,
kambe ni na m'hawukela,
kuwomba Mkoma.
21Ti emisele sikombiso, guleta siwindi,
veka mbilu yako amu ka ditshuri,
ka nzila yile u nga tsimbila ngu yona;
wuya awe wotuma wa Israyeli,
wuya madhoropani kwako.
22U na peperukela kala yihi mbimo mwananawe, wo bharuka kani?
Nguko Mkoma a vangile tximaha txa txiphya ha mafuni:
Wamsikati a na vhikela wamwamna.
Kuhumelela ka vathu va Txizimu
23 Mkoma wa Mabutho a Tiyimbi, i ku Txizimu txa Israyeli, a khene:
Mi ngadi mi txi na womba dipswi diya ka Judha ni madhoropani kwakwe, mbimo yi ni no heta wukhumbi wawe:
Mkoma a na kukatekisa, awe m'ti wa kululama,
awe mmango wo sawuleka!
24Judha a na va konaho kumweko ni madhoropa akwe otshe, kumweko ni vadimi, ni vadyisi va mitxhambi. 25Nguko ni tsakisile muhefemulo wo karala, ni wotshe muhefemulo wo xaniseka ni wu khurisile.
26Ka tona tiya ni vhumukile ni wona, se wukohe wangu wu ni tshambete.
27Wona taku mata masiku, kuwomba Mkoma, eyo ni no phaya nyumba ya ka Israyeli ni ya ka Judha, ngu mbewu ya vathu kumweko ni mbewu ya sihari. 28Ku na maheka ati to, nga kule ni nga va emela kasi kudula ni kugangela, ni kuvhinganyisa, ni kukhundumusa, ni kuxanisa, ngu toneto ni na va wonelela, kasi kuaka ni kuphaya, kuwomba Mkoma. 29Ka ona masiku ale, kha va na mbi ngadi va txi kha vona:
Vatate va dyite mauvha amambisu,
aniko makwasa a vanana ma ngava ni wutsila.
30Ngu kuhambana nito, mmweyo ni mmweyo a na fa ngu wubihi wakwe, se votshe vathu vale va no dya mauvha amambisu va na telwa ngu wutsila.
31Wona taku, mata masiku, kuwomba Mkoma, aawa ni no maha txitumelelano txatxiphya ka ona, ni nyumba ya ka Israyeli, kumweko ni nyumba ya ka Judha. 32Hi nga txitumelelano txo fana ni txi ni nga maha ni vatate vawe, ka ditshiku dile ni nga va ñola ngu dianza, kasi ku va humisa ngu ditikoni ka Egipta, se vona va txipisile txitumelelano txangu, hambiko ani ni ngadi va thembisile, kuwomba Mkoma. 33#Wona ni ka: Vaheb. 10:16. Aniko atxiya njitumelelano txi ni no maha ni nyumba ya ka Israyeli, msana ka masiku ale, kuwomba Mkoma: Ni na veka mlayo wangu mndani kwawe, ni wu bhala timbiluni kwawe; ni na va Txizimu txawe, se vona va na va vathu vangu. 34Kha ku na mbi maneka wo gondisa mwakelani, hambi mmwani ka mwanawe, ku khene:
Zivani Mkoma; nguko votshe va na ni ziva, kukhukhela ka wam'dotho wawe kala ka wa hombe, kuwomba Mkoma; nguko ni na divalela wubihi wawe, kha ni na mbiswa ni txi alakanya sionho sawe.
35 Mkoma a khene,
awu a ningako ditambo kuwoninga ditshiku,
ni kuleletela mtxima ni tinyeleti ha wusikuni,
a bhandako linene ni kudhindisa mavimbi a lona;
ditina dakwe Mkoma wa Mabutho a Tiyimbi.
36Va txi hambana ni sileleto siya masoni kwangu, kuwomba Mkoma,
mbewu ya ka Israyeli ni yona yi na leka kuva ditiko masoni kwamgu, ngu ha ku si gwitiko.
37 Mkoma a ti khene:
Ku txi koteka kupimwa kudemba ka tinzuma,
ni kutumbulwa kutshima ka sitshuwa sa mafu,
nani ni na lamba yotshe mbewu ya ka Israyeli,
ngu totshe ti va nga ti maha, kuwomba Mkoma.
38Wona mata masiku, kuwomba Mkoma, aawa didhoropa diya di no aketetwa di lumba Mkoma, kukhukhela ka txitezi txa Hananeli kala ka Txike txa Dikhonani. 39Se m'hingano wa lipimo wu na ya masoni kala tximangwanani ka Garebhi, wu na jika wu ya Gowa. 40Se wotshe mkova wo tshotshela ka wona sirumbi ni dikhuma, ni kotshe tithembweni kala ka txinambwana txa Kedroni, kala ka dikhona da Ditimba da Mahantxhi kuya wutxani, si na sawulekiselwa Mkoma, kha si na mbi dulwa, hambi kukhundumuselwa kambe, kala kupinduka.
Currently Selected:
Jeremiya 31: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
