Jeremiya 25
25
Vathu va na tekwa va txi ya mahwa tikhumbi
1 # Wona ni ka: 2 Vafu. 24:1; 2 Mak. 36:5-7; Dhan. 1:1-2. Dipswi diya di nga ta ka Jeremiya xungetano ngu vathu va ka Judha ngu dilembe da wumune da kufuma ka Jehoyakimu, mwana Josiya, mfumeli wa ka Judha, i nga ti dilembe do khata da kufuma ka Nebhukodhonosori, mfumeli wa Bhabhilona. 2Dipswi diya mprofeti Jeremiya a nga gela ditiko dotshe da ka Judha ni ka votshe va zumbako Jerusalema, a txi khene:
3Kukhukhela ka dilembe da digumi ni mararu da kufuma ka Josiya, mwana Amoni, mfumeli wa ka Judha, kala ka diya ditshiku, mndani ka magumi mambidi a malembe ni mararu, Mkoma a ti womba-womba ni nani, ni di txhumayete kwanu i di ngadi mixo, aniko anu kha ma engisa. 4Kambe Mkoma a mi rumete sithumi sakwe sotshe, i ku vaprofeti; aniko anu kha ma engisa, hambi kuhuphuta tinzeve, kuva mi txi tipfa. 5Va txi kha vona: Hundulukani mmweyo ni mmweyo ka nzila yakwe yo biha, kuva mi zumba ka ditiko diya Mkoma a nga mi ninga ni vatate vanu, kukhukhela kaleko kala kupinduka. 6Mi nga londiseleni simwani sizimu, mi txi si thumela ni ku si khizamela, mi nga vhilukiseni txiviti txangu ngu mithumo ya manza anu, kasi ani ni si mi maheli kubiha. 7Hambi ka eto kha ma ni engisa, kuwomba Mkoma, ti taku mi vhinjukisa kuhenya kwangu ngu mithumo ya manza anu, mi txi ti tota dikhombo mipune.
8Ngu konaho, Mkoma wa Mabutho a Tiyimbi a khene: Ngako mi nga mbi engisa timhaka tangu, 9ni na rumela kuya dhana tixaka totshe ta vathu ta Wuphemba, kuwomba Mkoma, ni ka Nebhukodhonosori, txithumi txangu, i ku mfumeli wa Bhabhilona; ni na va leka velwa ni ditiko diya, ni vazumbi va kona, ni matiko otshe o gwatamelana nado; ni na va lovisela magwito, ni na va maha txidiwukiso, ni txiruko, ni marumbi a kala kupinduka. 10#Wona ni ka: Jer. 7:34; 16:9; Mtu. 18:22-23. Ni na malata hagari kwawe dipswi da kutsaka ni kusakana, dipswi da va va tekanako, diguwa da marigwi a txitshindo, kumweko ni liwoningo la dilambu. 11Dotshe diya ditiko di na va marumbi ni txidiwukiso; ni matiko awa, ma na thumela mfumeli wa Bhabhilona, mndani ka mtxhanu wa magumi ni magumi mambidi a malembe.
12Aniko ngako ku di pindile mtxhanu wa magumi ni magumi mambidi a malembe, ni na tsayisa mfumeli wa Bhabhilona ni ditiko da kona, ngu mhaka ya kuwekela kwawe, kuwomba Mkoma; ni ditiko da Vakaldheya ni na di maha diva txiwula, kala kupinduka. 13Ni na maha kedo ditiko totshe timhaka ti ni nga womba ka dona, totshe tiya ti nga bhalwa ka diya dibhuku, ati Jeremiya a nga profeta ngu otshe matiko awa. 14Nguko ni vona va na khoziswa ngu matiko amangi, ni vafumeli va hombe; ni na va tshumetela kudingana ni simaho sawe, ni mithumo ya manza awe.
Kutsayiswa ka matiko
15Nguko Mkoma, Txizimu txa Israyeli, a ti khene kwangu:
Teka dijingo diya da vhinya da kuhenya manzani kwangu, u seta otshe matiko ni no kurumela ka ona. 16Va na sela hawa koza ve dhedherekela, ni kubharuka, ngu mhaka ya ditxhari di ni no di rumela hagari kwawe.
17Ni to teka didjingo manzani ka Mkoma, ni txi di ningela ka otshe matiko me sela, awa Mkoma a nga ti ti ni rumete ka ona. 18I Jerusalema ni madhoropa a ka Judha, ni vafumeli va kona ni tinduna tawe, ti taku si txi maha marumbi, ni txidiwukiso, ni txiruko, nga ti ma ku ngu tona nyamsi.
19Hambi Faro, mfumeli wa Egipta, ni maxonga akwe, ni tinduna takwe, ni votshe vathu vakwe;
20ni vawuyi va kona; ni vafumeli votshe va ditiko da Uzi,
ni votshe vafumeli va ditiko da Vafilista, ni Axikeloni,
ni Gaza, ni Ekroni, ni votshe va nga sala Asidhodhi
21ni Edhomi, ni Mowabhi, ni vanana va Amoni;
22ni votshe vafumeli va Tiro ni Sidhoni,
ni vafumeli va sitondolo,
si ku mtxhatuko ka linene;
23ni Dhedhani, ni Tema, ni Bhuzi,
ni votshe vale va zumbako magwito ka makhona a ditiko;
24ni votshe vafumeli va Arabhiya,
ni votshe vafumeli va valuveli, vale va zumbako txiwulani;
25Zimiri, ni votshe vafumeli va Elame,
ni votshe vafumeli va Medhiya;
26ni vafumeli votshe va Wuphemba,
va hafuhi ni va kule, mmweyo ni mmweyo,
ni mifumo yotshe ya mafu, yi kuho ha mafuni,
ni mfumeli wa Xexaki, a na sela ngu didjingo diya, msana kwakwe.
27U na va gela, u txi khawe: Mkoma wa Mabutho a Tiyimbi, Txizimu txa Israyeli, a khene:
Selani mi txi leva, mi kosa, mi txi wa, mi si wuki kambe, ngu mhaka ya yimbi ni no yi rumela kwanu. 28Ngako va txi lamba kuteka didjingo manzani kwako va txi sela, u na khawe kwawe: Mkoma wa Mabutho a Tiyimbi a khene: Ngu ditshuri, txikolokolo mi na sela! 29Nguko hi nga wonani didhoropa di di dhanwako ngu ditina dangu, na khata ku di tsayisa; ina anu mi na lekwa mi si tsayiswi kani? Kha mi na mbi divalelwa, nguko ni na xomisa ditxhari, di na peka votshe vazumbi mafuni, kuwomba Mkoma wa Mabutho a Tiyimbi.
30Awe koko, u na profeta kwawe totshe timhaka tiya, u txi khawe kwawe:
Mkoma wa dhuma-dhuma ngu txitimwi,
wa pfalisa dipswi dakwe ngu nyumbani kwakwe ko Sawuleka;
ngu kuthisisela, a na dhuma e wukela dizumbo dakwe,
wa peka huwa ya litsako, nga mrukuti wa mauvha,
a txi wukela vazumbi votshe va ha mafuni.
31Dipswi dakwe di na pfala kala magwito ka mafu;
nguko Mkoma a ni dizunga ni matiko,
a na lamula yotshe nyama;
a na ningela vabihi ka ditxhari, kuwomba Mkoma!
32 Mkoma wa Mabutho a Tiyimbi a khene: Dikhombo di na ya ka ditiko dimwedo ni dimwani, txi na huma txingulu txo thaviseka ngu magwito ka mafu. 33Ava va nga dawa ngu Mkoma, va na mbambamela ha mafuni, kukhukhela ka likasa limwelo kala ka limwani likasa la mafu; kha va na mbi dilwa, hambi kusengeletwa, hambi kutshotshwa, va na maha fenze ha mafuni.
34Anu vadyisi, pekani huwa mi txi dila. Pulukutani dikhumani, anu vahombe va mtxhambi. Nguko masiku a kudawa kwanu ma hokile, ni na mi hangalasa, mi na wa, nga txiya txa lisima. 35Vadyisi va na pwata nzila yo pfodola ngu yona, ni vahombe va mtxhambi kha va na mbi huluka. 36Hi nga pfani kudila ka vadyisi, ni tihuwa ta kudila ka vahombe va mtxhambi! Nguko Mkoma wa vhinganyisela wudyiselo wawe. 37Hambi makhalo o dyela ka ona a kuthutha, ma loviswa, ngu mhaka ya kutura ka kuhenya ka Mkoma. 38Ene a humile m'dhutini kwakwe nga txingonyamwana, nguko ditiko dawe di mahile dirumbi, ngu mhaka ya kuthisa ka ditxhari da Mkoma, ni kutura ka kuhenya kwakwe.
Currently Selected:
Jeremiya 25: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
