Isaya 64
64
1O! I ti ku wo bhanda nzuma u txhika!
I tiku mimango yo zinginika masoni kwako!
2U txi nga mndilo wu hisako tikhuni, wu halisa mati,
kasi ku ditina dako di zivaneka ka valala vako,
ngu kumaha keto, matiko ma na dhudhumela masoni kwako.
3Mbimo yile u nga ti ti maha timhaka to thisa,
ti hi nga ti sa ti verela, u ti ti txhika,
se mimango yi ti ti zinginika masoni kwako.
4 # Wona ni ka: 1 Vak. 2:9. Nguko kukhukhela ka kale kha ka pfiwa,
hambi ngu tinzeve kha ka engiswa,
hambi ngu maso kha ka wonwa Txizimu tximwani,
txi txi mahako mithumo ka vale va txi thembako.
5Wa hingeta vale va tsakelako kumaha kululama,
avale va ku alakanyako amu ka tinzila tako,
wona taku, u hi henyete, nguko hi onhile;
6Kambe athu hotshethu hi fana ni m'thu wa kwa mbi basa,
kotshe kululama kwathu kufana ni txigwanda txa nzambwa;
se athu hotshethu ha mora kufana ni mazokoro,
ni minandu yathu ya hi handa kufana ni moya.
7Se kha ku na m'thu wu a dhanako ditina dako,
wu a wukako e namarela kwako;
nguko u hi sisete khohe yako,
se u hi leka hi lova ngu mhaka ya wubihi wathu.
8Kambe konkuwa, awe Mkoma, awe ngawe tate wathu;
athu hi dibumba, se awe u muwumbi wathu;
kambe athu hotshethu hi mthumo wa manza ako.
9Awe Mkoma, u nga henye ngutu,
u nga alakanye wubihi wathu kala kupinduka;
wona, athu ha kukombela, athu hotshethu hi vathu vako.
10Madhoropa ako o sawuleka ma mahile txiwula;
Siyoni a mahile txiwula,
Jerusalema a xasetwe.
11Nyumba yathu yo sawuleka ni wudhumo,
yile vatate vathu va nga txi kudhumisa ka yona, yi hisilwe;
ni sotshe simaha sathu so dhundeka ngutu si xasetwe.
12Ina u ndi na simama u ti ñola awe,
txitimwi ka yotshe xomulo yiya,
awe Mkoma, kani?
U ndi na malala, u hi xanisa kani?
Currently Selected:
Isaya 64: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
