Isaya 65
65
Txizimu txi na tsayisa vakaneti
1Ni lavilwe ngu vale va si khaliko ku wotisa ngu ngani;
ni manwi ngu vale va nga ti si ni lavi;
ka vathu vale va nga si dhanwi ngu ditina dangu,
ni txi khani: Ngani wuwa hawa!
2 # Wona ni ka: Var. 10:20-21. Ni nawulutile manza ditshiku dotshe,
ka vathu va i ku vakaneti,
va tsimbilako ngu tinzila to biha,
ve ti mahela ti ti ku mapimoni kwawe;
3vathu va va ni henyisako masoni kwangu yotshe mbimo,
va phaxelako va di tithembweni,
ve hisa dibaselo txitimwi ka sitini;
4ve khalahatsha hafuhi ni mathita,
ve heta wusiku wotshe ka makhalo a sihuja,
va txi dya nyama ya khumba,
ve nyamisa timbiya tawe ngu sakudya so yila.
5Se va txi kha vona: Khukha hawa,
u nga tshukete hafuhi ni nani,
nguko ani ni sawulekile ngutu kupinda awe.
Avava mbutshi tithonvuni kwangu,
mdilo wu wu turako ditshiku dotshe.
6Wona ti bhatwe masoni kwangu, taku:
Kha ni na mbi malala; aniko ani ni na hakela,
ni na rinza hakhelo masoni kwawe,
7sionho sanu, kumweko ni sionho sa vatate vanu,
kuwomba Mkoma, avale va nga hisa dibaselo mimangoni,
ni ku ni ruketela simangwanani;
ngu mhaka yeto, ni na tshumela ni va pimela
mithumo yawe ya kale, masoni kwawe.
8 Mkoma a womba tiya:
Kufana ni kungako ku txi manwa dosi amu ka txizangwa txa mauvha, va kha vona:
U nga txi xakele, nguko ku ni makatekwa ka txona,
ni na mahisa toneto ngu kuranda sithumi sangu,
kasi ku ni si va hoxoti votshe.
9Kambe ni na humisa lixaka ngu ka Jakobe ni ka Judha,
txidya-thomba txa mimango yangu,
se vasawuleki vangu va na ningwa ditiko,
ni sithumi sangu si na zumba ka dona.
10Se Saroni a na va txibala txa tinvuta,
ni mkova wa Akori wu na maha dizumbo da sifuyo,
sa vathu vangu va va ni lavako.
11Aniko kwanu mi nga leka Mkoma,
mi divalako mmango wangu wo sawuleka,
mi lugisako meza ya Gadhi,
se mi patelako vhinya yo lumba Meni,
12kambe ni na mi ningela ka ditxhari, motshenu mi na nama mi dayelwa,
nguko ni mi dhani, aniko kha ma xamula;
ni wombawombile, kambe kha ma engisa,
aniko mi mahile ti i ku to biha masoni kwangu,
mi sawute sile ani ni nga si si tsakeli.
13Ngu kumaha keto, Mkoma Txizimu a womba tiya:
Wonani taku sithumi sangu si na dya, aniko anu mi na fa ngu nzala;
wonani taku sithumi sangu si na sela, aniko anu mi na pfa ditora,
wonani taku sithumi sangu si na tsaka, aniko anu mi na wa tingana;
14wonani taku sithumi sangu si na embelela ngu kutsaka ka timbilu ta sona,
aniko anu mi na peka tihuwa ngu kupandiseka ka timbilu,
mi na yowe, ngu kuxaniseka ka moya;
15se mi na leka ditina danu di maha txiruko ka va sawuleki vangu;
Mkoma Txizimu a na mi daya;
se sithumi sakwe a na si dhana ngu dimwani ditina.
16Se awule a katekiswako ha mafuni
a na katekiswa ngu Txizimu txa ditshuri;
ni wule a xambanyako ha mafuni,
a na xambanya ngu Txizimu txa ditshuri;
Nzuma ya yiphya ni mafu a maphya
Nguko sixaniso sa kale si divatwe,
kambe si fenengetilwe masoni kwangu.
17 # Wona ni ka: Isa. 66:2; 2 Ped. 3:13; Mtu. 21:1. Nguko ani na vanga nzuma ya yiphya ni mafu a maphya;
se kha ku na mbi alakanywa timhaka tile ti nga pinda,
kambe kha si na mbi khumbulwa.
18Aniko mi na tsaka mi pfalisa, ngu ha ku si gwitiko, ngu si ni si vangako;
nguko wonani taku, ani na vangela litsako Jerusalema,
ni kuzumbiseka ka vathu vakwe.
19 # Wona ni ka: Mtu. 21:4. Se ni na tsaka kona Jerusalema,
ni pfalisa vathu vangu;
kha ku na mbi ngadi kambe kupfala wakwe dipswi da kudil,
hambi dipswi da huwa.
20Ka dona kha ku na mbi maneka kambe mwanana wo hanya masiku amadotho,
hambi txikosana txi txi no mbi hetisa masiku a txona,
nguko mwana a na fa a ti ni 100 wa malembe,
aniko muonhi wa 100 wa malembe a na ruketelwa.
21Se va na aka tinyumba, ve zumba ka tona;
va na phaya mivhinya, ve dya mihando ya kona.
22Kha va na mbi akela kuva txi ta zumba vamwani,
kha va na mbi phayela ku si ta dyiwa ngu vamwani,
nguko masiku a vathu vangu, ma na fana ni masiku a mndonga,
se vasawuleki vangu va na tsakela mithumo ya manza awe, kala ve kumba.
23Kha va na mbi thuma,
hambi kuveleka vanana kasi ku va xanisa,
nguko liveleko la va vo katekiswa ngu Mkoma,
kumweko ni lixaka vawe.
24Se ku na maheka ti to ni va xamula, va sanzi kupeka huwa;
va txi ngadi ve womba-womba ni na va engisa.
25Dixolwa ni txinvutana si nadya kumweko,
se ngonyamo yi na dya mwasi kufana ni homu;
se lithulu li na maha sakudya sa mnyoka.
Kha si na mbi maha wubihi mwendo kuonha txokari
ka wotshe mmango wangu wo sawuleka,
kuwomba Mkoma.
Currently Selected:
Isaya 65: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
