Isaya 5
5
Thembwe ya miuvha ya Txizimu
1Konkuwa, ni na embelela ka txirandwa txangu,
dando ya txirandwa txangu,
ngu mhaka ya thembwe ya txona ya mv'hinya.
Txirandwa txangu txi ni thembwe ya m'vhinya ka tximangwana txo nona.
2 # Wona ni ka: Mat. 21:33; Mar. 12:1; Luk. 20:9. Se a to dima e thavisela marigwi,
e phaya mivhinya ya yinene ngutu;
e aka txitezi hagari ka thembwe,
a txi kelela dipipa do kamela ka dona mihando,
a txi verela ku yi veka mihando ya yinene;
aniko yi to veka mihando yo bava.
3Konkuwa koko, anu vaaki va Jerusalema,
ni nanu vavamna va ka Judha,
na mi kombela, lamulani hagari kwangu ni m'vhinya wangu.
4Njitxani tximwani txo dingana ku txi mahwa ka thembwe yangu
atxi ani ni nga mbi txi maha kani?
Ni ti verete kuvelekwa ka mauvha o tshamba,
se ku txi ta velekwa mauvha o bava kani?
5Konkuwa koko, na mi gela ti ni no maha,
ka thembwe yangu ya m'vhinya:
Ni na thavisa libhingo la yona, yi na maha lihawu;
ni na khundumusa diseta da kona, di na kandetelwa.
6Thembwe yi na maha txiwula,
kha yi na mbi sakatwa, hambi kudimwa;
kambe ku na mila txipopo ni mipa;
ni na leleta marefu ti to ma si nisi nzuma txitimwi ka yona.
7Nguko m'vhinya wa Mkoma wa Mabutho a Tiyimbi
ngu nyumba ya ka Israyeli,
ni vathu va ka Judha, mndonga wa kona wo tsakisa;
a ti ti verete kuve maha wululamo,
ku to maneka#5:7 Mwendo: kuthekela ka mnoha. kukhinyavezwa;
wukhaloni ka wululamo, ku to maneka tihuwa.
Wubihi wa solwa
8Dikhombo ka vale va ku ni tinyumba ni tinyumba,
va ku ni tithomba ni tithomba,
kuza ku si maneki ni wukhalo,
va txi zumbisa ku nga ova vona vokha ha mafuni!
9 Mkoma wa Mabutho a Tiyimbi,
a to khene tinzeveni kwangu:
Ngu ditshuri tinyumba tatingi ti na maha marumbi,
tinyumba ta hombe, totshura ti na pwata vathu.
10Se digumi da tindima ta vhinya
ti na humisa digarafawu;#5:10 Digarafawu: Mpimo wa magumi mambidi kala magumi mararu a mifarasa ni mtxhanu.
ni omeri yimweyo ya mbewu yi na humisa efa yimweyo dwe.
11Dikhombo ka vale va wukako ni mixo ve londisela sa kusela,
va selako kala ni wusiku,
yiza vhinya yi txi va hisa.
12Sitende ni tiharipa ni singomana,
ni titshodi, ni vhinya, siho mu ka mibuso yawe ya hombe,
kha va khatali ngu mthumo wa Mkoma,
hambi kuwona mithumo ya manza akwe.
13Ngu kumaha keto, vathu vangu va na yiswa wukhumbini
ngu mhaka ya kwa mbi ziva,
vathangeli vawe va na fa ngu nzala,
ni dibutho da vathu di na oma ngu ditora.
14Ngu toneto, dithitha di engetete kunavela ka dona,
di asamile txisofu txa dona kupinda mpimo,
wudhumo wawe ni vathu vawe, ni kubomba kwawe,
ni votshe vale va tsakako va na ngirimela ka dona.
15Sekoko tinganakana ti na xowoka,
ni va va ti guletako, va na wa.
Ni maso a vale va ti guletako, ma na wiswa tingana.
16Aniko Mkoma wa Mabutho a Tiyimbi a na guletwa ngu kululama,
se Txizimu txo Sawuleka, txi na sawulekiswa ngu wululamo.
17Sekoko sinvutana si nadya kona,
kufana ni kuva si txi dya libalani ka sona;
ni vawuyi va na dya ka makhalo a vamatiko.
18Dikhombo ka vale va ndindako wubihi ngu dijoke,
va ndindako sionho ngu majoke a kutikulisa,
o ndinda ngu ona sikotxikani!
19Va txi kha vona: A na kuluvete e heta mthumo wakwe,
kasi ku hi wu wona;
wu nate wudhota wa Msawuleki wa Israyeli,
kasi ku hi na wuziva!
20Dikhombo ka vale va ku kha vona to biha ndinene,
se ta tinene va txi ndo biha!
Va tekako txidema ve txi maha kuwonekela,
ni kuwonekela ve kumaha txidema,
so bava ve si maha so lombela,
se so lombela ve si maha so bava!
21Dikhombo ka vale va alakanyako to va txharihile,
ni kutithemba kupinda mpimo.
22Dikhombo ka vale i ku tindena kuselani ka vhinya,
ni vathu va va ku ni mtamo
kupatelani ka wusuke wo bava ngutu.
23Dikhombo ka vale va emelako m'bihi ngu kuxavelela,
se awule wo lulama ve mlambela kululama!
Txizimu txi na tsayisa vathu va txona
24Ngu toneto, va na loviswa, kufana
ni titshava ti txi hiswa ngu mndilo,
va na fana ni kuhiswa ka mwasi wa kuoma,
se mkoloti wawe wu na sina,
ni siluva sa kona si na puruma ku nga lithulu;
Nguko va lekile Mlayo wa Mkoma wa Mabutho a Tiyimbi,
ve eyisa dipswi da Msawuleki wa Israyeli.
25Ngu kumaha keto, kuhenya ka Mkoma,
kuturile txitimwi ka vathu vakwe,
se a nawulutile dianza dakwe, e va daya;
mimango yi to zinginika,
sirumbi sawe si hangalaka,
ku nga nzokoro hagari ka tinzila;
hambi keto, kuhenya kwakwe ku toya masoni,
ni dianza dakwe di ngadi nawulukile.
26A na guleta m'jeke wo dhana matiko a kule,
a na va vetela mloti, ti to ve khukha magwito ka mafu,
se vona va nata ngu kukuluveta.
27Kha ku na mbi va ni kukarala hagari kwawe, hambi kurereka;
kha ku na wu a no khudhahela, hambi kuotela;
kha va na mbi txhatxha tibhande siwununi kwawe,
hambi kubhenula tingoti ta tikathula tawe.
28Tingove tawe ti na hinda ngutu,
ni malaho awe otshe ma dombilwe;
sitsendo sa mahantxhi awe si fana ni marigwi,
madangarita a sikotxikani sawe ma fana ni txihuhuri.
29Kubhonga kwawe kufana ni ka ngonyamo;
va na bhonga kufana ni singonyamwana;
Ina, va na bhonga va txi ñola mipfimba yawe,
kha ku na wule a no yi txhatxhisa.
30Ka ditshiku donedo, va na bhonga txitimwi kwawe
kufana ni mavimbi a linene;
se awule a no wona mafu,
a na wona txidema ni kuxaniseka,
kuwonekela ku na vhalelwa ngu txidema.
Currently Selected:
Isaya 5: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
