Isaya 46
46
Kuxulwa ka sizimu sa Bhabhilona
1Bheli a wisilwe, Nebho a namile,
sithombe sawe si vekwa txitimwi ka sihari, txitimwi ka sihari sa hombe;
mirwalo ya tithundu tanu, ya karalisa sihari sa hombe so karala.
2Si namile kumweko, si txiwa;
kha sa sikota ku tihulukisa ka mrwalo,
aniko moya wa sona wu wulete wukhumbini.
3Ni engiseni anu va nyumba ya Jakobe,
ni motshenu mi nga sala va nyumba ya ka Israyeli;
anu ni nga mi khutarela ngu mawoko kukhukhela mndani,
ni mi beleka kukhukhela mndani ka mame.
4Se kala mi txi kumba, ni na va ani wammweyo,
ni na mi gula kala mi huma tinvi;
ani ni mi vangile, kambe ni na mi gula,
ni mi tisa, ni ku mi xayisa.
5I mani mi no ni fananisa nayo, niku mi na ni dinganisa ni mani,
mi ni fanaisa kuva hi fana kani?
6Va xakela nzalama amu ka tithavangu,
ve pima silivhela ngu sikalo;
va hakela mtshuli, se ene e maha txizimu,
masoni ka txona va nama ve khizama.
7Va txi pakata, ve tsula veya txi veka ka wukhalo wa txona;
txi zumba kona hale, kha txi khukhi;
se ngako va txi dila ka txona, kha txi na xamulo ni ya yimweyo,
hambi kutxhatxhisa ni wammweyo kuxanisekani kwakwe.
8Alakanyani eto, se mi tsana;
mi ti vekisa timbiluni kwanu, anu vahambunyeti.
9Alakanyani timhaka ti ti nga pinda ta kale ngutu:
Taku ani ngani Txizimu, se kha ku na tximwani Txizimu,
kha ku nga ni tximwani txo fana ni nani;
10ni zivisa magwito kukhukhela makhatoni,
ni kukhukhela kale ngutu atile ti sanziko kumaheka;
ni ku khani: “Makungo angu ma na tsana,
se ni na maha kotshe kuranda kwangu”;
11Ni dhanako makoti#46:11 Makoti: Mfumeli wa Siro. kukhukhela Wutxani,
ni m'thu wule a no maha kuranda kwangu,
a nata ngu ditikoni ka kule;
nguko ni wombile, kambe ti na mahisa toneto;
ani ni tsanisile, ni na ti maha.
12Ni engiseni anu vo banga timbilu,
anu mi ku kule ni wululamo.
13Na tshuketisa wululamo wangu,
kambe kha wu na mbi va kule,
ni kuhanyisa kwangu kha ku na mbi swela;
aniko ni na veka kuhanyisa kwangu kona Siyoni,
ni wudhumo wangu kona Israyeli.
Currently Selected:
Isaya 46: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
