Isaya 45
45
Txizimu txi sawula Siro, kasi kumaha ti txi ti lavako
1 Mkoma a wombi tiya ka mtotiwa wakwe Siro,
awule ni mñolako ngu dianza dakwe da txinene,
kasi ku ni xula matiko masoni kwakwe;
ni na thukunyula siwunu sa vafumeli,
kasi kutula matimba masoni kwawe, kambe matimba kha ma na mbi sekwa.
2Ani ni na thangela masoni kwako,
ni lulamisa tinzila to gombonyeka;
ni na funya matimba a suku,
kambe ni phatulela sikhoto sa tisimbi.
3Se ni na kuninga tithomba tile ti nga siswa, ni tile ti nga fenengetwa,
kasi ku u na tiziva tito,
ani ngani Mkoma, Txizimu txa ka Israyeli,
ni ku dhanako ngu ditina dako.
4Ngu kuranda txithumi txangu Jokobe,
ni Israyeli, msawulwa wangu,
ani kwako, ni na kudhana ngu ditina dako;
ni ku ningile txibongo txako,
hambi ku u nga si ni zivi.
5Ani ngani Mkoma, se kha ku na mmwani;
hahanze kwangu, kha ku na txizimu;
ani ni na kutsanisa, hambiko u si ni ziviko.
6Kasi ku ti na ziwa kukhukhela wutxani, ni kukhukhela mswa-ditambo,
tito, hahanze kwangu kha ku na mmwani;
ani ngani Mkoma, se kha ku na mmwani.
7Ani na maha kuwonekela ni va nga txidema;
ani na vanga kudikha, ni va nga dikhombo;
ani Mkoma, na maha totshe tiya.
8Anu tizuma nisani mwando,
ni marefu ma na nise kululama;
ma na tuleke mafu, se kuhuma kuhanyisa,
kululama ku na ninge mihando kumweko;
ani Mkoma, ni si vangile.
Mtamo wo hetelela wa Txizimu
9 # Wona ni ka: Var. 9:20. Dikhombo ka wule a lwisanako ni M'vangi wakwe, khadi hagari ka timwani tikhadi ta dibumba!
Ina dibumba di nga womba ka muwumbi wa dona, di txi kha dona: U maha txani, kani?
Mwendo mthumo wako, wu txi kha wona: Khu nga ni manza kani?
10Dikhombo ka wule a ku khene ka tate wakwe: U velekile txani kani?
Se ka wamsikati a txi khene: U hefemulete txani kani?
11A womba tiya Mkoma,
Msawuleki wa ka Israyeli, wule a nga m'va nga:
Ni wotiseni ta masiku ale matako;
mi na lava kuziva mhaka ya vanana vangu, ni mhaka ya mthumo wa manza angu.
12Ani ni vangile mafu,
kambe ni vangile m'thu ka ona;
ani ni m'vangile, manza angu ma nawulutile tinzuma,
se ni otshe mabutho a kona ni ma ningile mlayo wangu.
13Ani ni m'wisile ngu kululama,
se totshe tinzila takwe ni na ti lulamisa;
ene a na aka didhoropa dangu,
kambe a na txhatxha tikhumbi tangu,
i si nga ngu hakhelo hambi ngu siningo,
kuwomba Mkoma wa Mabutho a Tiyimbi.
14 Mkoma a wombisa tiya: Mthumo wa Egipta,
ni dibhindu da Vaetiyopiya, ni Vasabhi, vathu va txiemo txo lapha,
si na pinda sita kwako, si na kulumba;
va na kulondeta, va nata va di sungilwe ngu titxhini, kambe va nata khizama masoni kwako;
va na maha mikombelo yawe kwako, va txi kha vona:
Kha ditshuri Txizimu txi kwako,
kha ku na tximwani txizimu kambe.
15Ngu ditshuri awe u Txizimu txi txi ti sisako,
Txizimu txa ka Israyeli, M'hanyisi.
16Va nawa tingana, kambe va na kanganyiseka votshe;
va nawa kumweko vale va mahako sithombe.
17Aniko Israyeli wa hanyiswa ngu Mkoma,
ngu kuhanyisa ka kwa mbi guma;
ngu mhaka yeto kha mi na mbi wiswa tingana, hambi kukanganyiswa kala kupinduka.
18Nguko Mkoma a womba tiya, awule a nga maha tinzuma,
Txizimu txi txi nga wumba mafu txi ma vanga;
txona txi ma tsanisile, kha txa ma maha diphanga,
aniko txi ma vangile kasi ku vathu ve zumba ka ona:
Ani ngani Mkoma, kha ku na mmwani.
19Kha na womba-womba txihujani,
hambi ka wukhalo wa txidema wa ha mafuni;
kha na womba ka liveleko la Jakobe,
ni txi khani: Ni laveni walo;
ani ngani Mkoma, ni wombawombako kululama,
ni zivisako timhaka ta tinene.
20Sengeletanani, mi txita,
tshuketani kumweko,
anu mi nga huluka ka matiko;
kha va zivi ta txilo ava va rwalako sithombe so vatwa,
so mahwa ngu mapulango,
kambe va khozelako ka txizimu txaku kha txi sikoti kuhanyisa.
21Zivisanani mi tshuketa, mi maha txikungo motshenu;
i mani a nga zivisa tiya kukhukhela kale kani?
I mani kukhukhela kaleko a nga zivisa kani?
Ina hingani Mkoma kani?
Se kha ku na tximwani Txizimu hahanze kwangu;
Txizimu txo lulama, ni M'uhanyisi,
kha txingaho, hahanze kwangu.
22Hundulukelani kwangu mi na hanyiswa,
anu motshenu mihingano ya mafu;
nguko ani ni Txizimu, kha ku na tximwani.
23 # Wona ni ka: Var. 14:11; Vaf. 2:10-11. Ni xambanya ngu ngani nipune;
di humile ngu txisofuni kwangu dipswi do lulama,
kambe kha di na mbi tshumelela msana:
Ati to masoni kwangu, ma na khizama otshe mazolo,
se totshe tidimi ti na xambanya ngu ngani.
24Va na kha vona ngu ngani:
Kululama ni mtamo si ka Mkoma dwe;
va nata kwakwe, aniko kha va na mbiwa tingana,
votshe vale va no henya va txi mwukela.
25Aniko ka Mkoma li nava li di lulamile ni kutikulisa
lotshe liveleko la ka Israyeli.
Currently Selected:
Isaya 45: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
