Isaya 44
44
Mkoma ngene ekha i ku Txizimu
1Konkuwa koko, engisa awe Jakobe,
txithumi txangu, ni nawe Israyeli,
awe ni nga kusawula.
2 Mkoma wu a nga kuvanga,
e kuwumba kukhukhela mndani, ni ti to a na kuvhuna, a khene:
U nga thave awe Jakobe, txithumi txangu,
ni nawe Jesurumi, awe ni nga kusawula.
3Nguko ni na tshakunuta mati txitimwi ka txihala,
ni minambo txitimwi ka mafu a kuoma;
ni na thela moya wangu txitimwi ka liveleko lako,
ni makatekwa angu txitimwi ka vanana vako.
4Va na mila hagari ka mwasi,
kufana ni siphutu hafuhi ni sinambwana sa mati.
5Awuwa a na khene: Ani ni wa Mkoma;
awule a na ti dhana ngu ditina da Jakobe;
se awule mmwani a na bhala ngu dianza, taku:
Ani ni wa Mkoma;
se txibongo txakwe, a na teka ditina da Israyeli.
6 Mkoma, Mfumeli wa Israyeli, i ku Mtiruli wakwe,
Mkoma wa Mabutho a Tiyimbi, a khene:
Ani ngani wo khata, kambe ngani wo gwita,
hahanze kwangu, kha ku nga ni Txizimu.
7 # Wona ni ka: Isa. 48:12; Mtu. 1:17; 22:13. Se i mani a no dhana kufana ni nani, e zivisa eto, e ti txhatxhameta masoni kwangu, kukhukhela ku ni nga txhatxhameta vathu ngu ha ku si gwitiko kani?
Awu a zivisako asi si tako, ni si si ku ngadi si txi nata.
8Mi nga thaveni, kambe mi nga dhudhumeleni,
ina kha na mi maha mi tiengisa,
niku kha na mi zivisa kani?
Nguko anu mi tifakazi tangu.
Ina txiho tximwani Txizimu hahanze kwangu kani?
Ahim-him! Kha ku nga ni dimwani Dirigwi, ni di zivako.
Kukhozela sithombe ka solwa
9Votshe vathumi va sithombe so vatwa, kha va vhuni txilo, ni simaha sawe sile va tsakako ngu sona, hi nga sa txilo; tifakazi tawe tipune kha ti woni txilo, kambe kha ti pimisi, kala kuza vona ve kanganyiswa. 10I mani a wumbako txizimu, e tshula txithombe txo vatwa, txa kwa mbi vhuna txilo kani? 11Wonani taku, votshe vale va si londetako va nawa tingana; nguko vathumi va kona vapune va huma hagari ka vathu; va na sengeletane votshe va txi ema; va na thava, kambe votshe va na wa tingana.
12Mtshuli wa maha ditxhapu, kambe a thuma ngu makala a mndilo, se edi tshula ngu hamela, ni ku di vavela ngu mtamo wa diwoko dakwe; ene a ni nzala, kambe mtamo wakwe wa kelela, se kha seli mati, kambe wa karala.
13M'vati a nawuluta dipulango, se e bhala mindenda yo bhilivila, e vata ngu txivatelo, e pima ngu lipimo, kambe a maha txizimu txakwe txi fanana ni m'thu, madingano ni zumbelo ya m'thu, kasi ku txi veka nyumbani. 14A titekete mikedhari, mwendo kuteka mikipresi, mwendo mkusu, kambe wa ti karata kuthuma ngu mindonga ya txitinga; wa phaya msululwani, se mati a nzuma me wu kulisa.
15Sekoko m'thu a dhivela tikhuni ta mndonga, a txi ora ni kubhika dipawu,#44:15 Dipawu: Sakudya. kambe wa khanda txizimu, se e nama masoni ka txona, a vata txithombe ngu mndonga, e khizama masoni ka txona. 16A hisa hafu ya phande, se ngu yimwani hafu edya nyama, o yi yoka, edya e khura; kambe wa ti futumeta, a txi khene: “Se na pfa kufutumela, nguko ni ni mndilo!” 17Sekoko, ngu tikhuni tile ti salako, a khanda ngu tona txizimu, txithombe txo vatwa, e khizama masoni ka txona, e nama, e maha mkombelo wakwe ka txona, a txi khene: Ni hulukise, nguko awe u txizimu txangu.
18Kha va zivi txilo, hambi kupfisisa txilo; nguko va vhalekile maso, kasi ku va si woni, ni mbilu kasi ku va si pimi txilo. 19Se kha ku nga ni wammweyo kwawe a khatalako ngutu, a ku ni wuzivi mwendo mapimo, kasi ku khene: Hafu ni hisile, ni bhikile dipawu txitimwi ka makala a mndilo, kambe ni yokile nyama txitimwi ka ona, nidya; se ni nga maha manyala ngu yile yi nga sala kani? Ina ni nga khizamela phande ya mndonga kani?
20Adya dikhuma; mbilu yakwe ya wukanganyisi yi m'hambukisile, aha ko kha na kuhulukisa wutomi wakwe, hambi kuwomba ku khene: Ina kha ku nga ni makuhu ka dianza dangu da txinene kani?
Mkoma, M'vangi ni M'hanyisi
21Alakanya timhaka eto, awe Jakobe, ni nawe Israyeli,
ngako u ku txithumi txangu; ani ni ku vangile,
awe Israyeli u txithumi txangu; kha ni na mbi kudivala.
22Na hangalasa sihambunyeto sako kufana ni hunguva,
ni sionho sako kufana ni direfu;
tshumelela kwangu nguko ni ku tirute.
23Embelelani ngu kutsaka anu tinzuma, nguko Mkoma a mahile eto;
guletani anu makhalo a hahatshi ngutu ka mafu;
anu mimango embelelani ngu kutsaka;
se nanu sitinga ni mindonga yotshe yi yiku kwanu;
nguko Mkoma a tirute Jakobe,
kambe a dhumisilwe kona Israyeli.
24 Mkoma, Mtiruli wako, wule a nga ku wumba
kukhukhela mndani, a khene:
Ani ngani Mkoma, ni mahako sotshe,
ni atetako tinzuma, ni kunawuluta mafu ani nipune;
25ni khundumusako sikombiso sa vasiki va makuhu,
ni kuxangisa vahuti;
na tshumetela msana titxhari,
ni kuvhinganyisa gondo ya tona;
26ngani ni tsanisako dipswi da txithumi txakwe,
kambe na tatisa makungo a sirumwa sakwe,
ni wombako ka Jerusalema, ni txi khani:
Ku na akwa kwako,
se ka madhoropa a ka Judha ni khani:
Mi na aketwa, ni ti to ani ni na wusa marumbi anu;
27ni ku khani ka kutshima: Phwana!
Se ani ni na phywisa minambo yako;
28ni wombako ngu Siro, ni txi khani:
M'dyisi wangu, a na maha totshe ti ti ni tsakisako;
a txi khene kambe ka Jerusalema:
U na aketwa; se ni ka dithepele a txi khene: Ti akete.
Currently Selected:
Isaya 44: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
