Isaya 43
43
Mkoma a thembisa kuhanyisa vathu vakwe
1Se konkuwa, kuwomba Mkoma, wule a nga kuvanga, awe Jakobe,
kambe a nga kuwumba awe Israyeli, a khene:
U nga thave, nguko ani ni ku tirute;
ni kudhani ngu ditina dako; awe u wangu.
2Ngako u txi txhatuka matini, ni na va ni nawe,
hambi u txi txhatuka minambo, kha yi na mbi kumita;
ngako u txi pinda ngu ha mndiloni, khu na mbi hya,
hambi m'dhikila kha wu na mbi kuhisa.
3Nguko ani ngani Mkoma Txizimu txako,
Msawuleki wa Israyeli, Mtxhatxhisi wako;
ni ningete Egipta kuva mtxhatxhisi wako,
ni Etiyopiya, ni Sebha, ka wukhalo wako.
4Ngako u nga randeka masoni kwangu,
kambe u dhundekile, se ani ni ku randile,
niza ni ningela vathu ngu mhaka yako,
ni ningela matiko kasi ku kuhanyisa.
5U nga thave koko, nguko ni ni nawe,
ni na wuyisa vanana vako ngu wutxani,
ni kusengeleta kukhukhela mswa-ditambo.
6Ni na khani ka Wuphemba: Naheta!
Ni Wulambwe ku khani: U nga lambe!
Wuyisani vanana vangu ngu kule,
ni vanana vangu vamahorana,
ngu magwito ka mafu,
7ka votshe vale va dhanwako ngu ditina dangu,
ni vale ni nga va wunja, kasi kuva wudhumo wangu;
ani ni va wumbile, ina, ani ni va vangile.
Mkoma ngene ekha i ku Txizimu
8Tisani vathu va i ku mabhofu, avale va ku ni maso;
ni maphazeve ale ma ku ni tinzeve.
9Matiko otshe ma na sengeletane,
ni vathu va na tshangane;
i mani hagari kwawe a nga sikotako kuzivisa tiya,
e hi maha hi engisa timhaka ta kale kani?
Kombisani tifakazi tanu,
kasi ku mi ti basisa, ni ti to ti pfiwa, ni ti to ku txi wombwa taku: Ditshuri!
10Anu mi tifakazi tangu,
kuwomba Mkoma;
txithumi txangu txile ni nga txi sawula;
kasi ku mi na tiziva, mi kholwa kwangu,
ni ti to mi pfisisa taku ani ngani nipune,
ni ti to hahanze kwangu kha ku khali ku va ho tximwani txizimu,
ni msana kwangu kha ku na mbi vaho tximwani Txizimu.
11Ani, ani ngani Mkoma,
se hahanze kwangu, kha ku nga ni M'hanyisi.
12Ani ni zivisile, kambe ani ni hanyisile, ni ti mahile ti pfala,
se txizimu tximwani kha txa nga vaho hagari kwanu,
anu koko mi tifakazi tangu,
kuwomba Mkoma; ani ni Txizimu.
13Na ku si se vaho ditshiku, ani ngani; kambe kha ngaho wu a sikotako kuhuluka manzani kwangu;
Ngako ni txi thuma, i mani a no ni tsimba kani?
Kuxulwa ka Bhabhilona
14 Mkoma, Mtiruli wako,
i ku Msawuleki wa Israyeli, a womba tiya:
Ngu mhaka ya ku mi randa, ni rumete valala Bhabhilona,
se votshe ni na va maha ve relela kota vo tutuma,
ni womba Vakaldheya, ka sitimela si va nga txi ti dhumisa ngu sona.
15Ani ngani Mkoma, Msawuleki wanu,
Muvangi wa Israyeli, Mfumeli wanu.
16 Mkoma, a womba tiya, awu a nga dhoda nzila lineneni,
ni lisoko amu ka mati a hombe;
17wule a nga tisa txikotxikani ni dihantxhi,
dibutho da yimbi ni mtamo;
vona va wite kumweko, kha va na mbiswa ve wuka;
va fuvisilwe, va timekile kufana ni ngoti ya dilambu.
18Mi nga alakanyeni timhaka ti ti nga pinda,
hambi kupimisa timhaka ta kale.
19Wonani taku ni na maha mhaka ya yiphya,
se konkuwa ti huma hakubasani;
ina kha mi na mbi tiziva kani?
Wonani taku ni na dola nzila txiwulani,
ni minambo ligwangwani.
20Sihari sa txitinga si na ni thumela,
maxolwa ni vanana va mbuwu,
nguko ni na thela mati txiwulani,
ni minambo ligwangwani,
kasi ku vathu vangu ve mana kusela, ka msawuleki wangu.
21Vathuvo ni nga ti wumbela,
kasi ku va na ni dhumisa.
Kwa mbi tsakisa ka Israyeli
22Hambi keto, khwa ni dhana awe Jakobe,
aniko u karate ngu ngani, awe Israyeli.
23Khwa ni tisela sifuyo sa sidotho sa miningelo ya kuhiswa,
mwendo ku ni dhunda ngu miphaxo yako;
kha na kunemetisela ngu miningelo,
hambi ku ku rera ngu dibaselo.
24Khwa ni xavela ngu male, litshava lo bhumulisa,
hambi ku ni khurisa ngu mafura a miphaxo yako,
kambe u ni ningile mthumo ngu sionho sako,
se u ni karalisa ngu wubihi wako.
25Ani, ani nipune, ngani ni pfhitako sihambunyeto sako, ngu kuranda kwangu,
se sionho sako kha ni si alakanyi.
26Xota ku ni alakanya, hi na wulela hotshe kulamulwani;
txhatxha mhaka yako,
kasi ku u na maneka di lulamile.
27Tate wako wo khata#43:27 Tate wako wo khata: Kuwombwa Adhamu. a onhile,
ni vatxhamuseli vako va ni onhete.
28Ngu mhaka yeto ni na nyenyezisa vahombe va wukhalo wo sawuleka,
kambe ni maha ti to Jakobe e loviswa,
ni Israyeli kuva e rukwa.
Currently Selected:
Isaya 43: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
