Popular Bible Verses from Isaya 43

Share

Wonani taku ni na maha mhaka ya yiphya, se konkuwa ti huma hakubasani; ina kha mi na mbi tiziva kani? Wonani taku ni na dola nzila txiwulani, ni minambo ligwangwani.

Ngako u txi txhatuka matini, ni na va ni nawe, hambi u txi txhatuka minambo, kha yi na mbi kumita; ngako u txi pinda ngu ha mndiloni, khu na mbi hya, hambi m'dhikila kha wu na mbi kuhisa.

Mi nga alakanyeni timhaka ti ti nga pinda, hambi kupimisa timhaka ta kale.

Se konkuwa, kuwomba MKOMA, wule a nga kuvanga, awe Jakobe, kambe a nga kuwumba awe Israyeli, a khene: U nga thave, nguko ani ni ku tirute; ni kudhani ngu ditina dako; awe u wangu.

Ngako u nga randeka masoni kwangu, kambe u dhundekile, se ani ni ku randile, niza ni ningela vathu ngu mhaka yako, ni ningela matiko kasi ku kuhanyisa.

Nguko ani ngani MKOMA Txizimu txako, Msawuleki wa Israyeli, Mtxhatxhisi wako; ni ningete Egipta kuva mtxhatxhisi wako, ni Etiyopiya, ni Sebha, ka wukhalo wako.

U nga thave koko, nguko ni ni nawe, ni na wuyisa vanana vako ngu wutxani, ni kusengeleta kukhukhela mswa-ditambo.

Ani, ani nipune, ngani ni pfhitako sihambunyeto sako, ngu kuranda kwangu, se sionho sako kha ni si alakanyi.

Anu mi tifakazi tangu, kuwomba MKOMA; txithumi txangu txile ni nga txi sawula; kasi ku mi na tiziva, mi kholwa kwangu, ni ti to mi pfisisa taku ani ngani nipune, ni ti to hahanze kwangu kha ku khali ku va ho tximwani txizimu, ni msana kwangu kha ku na mbi vaho tximwani Txizimu.

Ani, ani ngani MKOMA, se hahanze kwangu, kha ku nga ni M'hanyisi.

Na ku si se vaho ditshiku, ani ngani; kambe kha ngaho wu a sikotako kuhuluka manzani kwangu; Ngako ni txi thuma, i mani a no ni tsimba kani?

Sihari sa txitinga si na ni thumela, maxolwa ni vanana va mbuwu, nguko ni na thela mati txiwulani, ni minambo ligwangwani, kasi ku vathu vangu ve mana kusela, ka msawuleki wangu. Vathuvo ni nga ti wumbela, kasi ku va na ni dhumisa.

Ni na khani ka Wuphemba: Naheta! Ni Wulambwe ku khani: U nga lambe! Wuyisani vanana vangu ngu kule, ni vanana vangu vamahorana, ngu magwito ka mafu, ka votshe vale va dhanwako ngu ditina dangu, ni vale ni nga va wunja, kasi kuva wudhumo wangu; ani ni va wumbile, ina, ani ni va vangile.

MKOMA, a womba tiya, awu a nga dhoda nzila lineneni, ni lisoko amu ka mati a hombe; wule a nga tisa txikotxikani ni dihantxhi, dibutho da yimbi ni mtamo; vona va wite kumweko, kha va na mbiswa ve wuka; va fuvisilwe, va timekile kufana ni ngoti ya dilambu.

Ani ngani MKOMA, Msawuleki wanu, Muvangi wa Israyeli, Mfumeli wanu.