Isaya 23

Txiziviso txo wukela Tiro ni Sidhoni

1Mahungu a Tiro.

Pekani huwa, anu mi ku sitimelani ka Tarxixi,

nguko a xasetwe, aha koza ku si sali ni nyumba kwakwe,

se kha ku nga ni ko a nga wulela ni wammweyo;

kukhukhela ditikoni ka Kitimi, va zivisilwe tiya.

2Malalani anu vaaki va txitondoloni,

anu vanyamabhindu va Sidhoni;

mi tsimbilako ngu linene

3Se thomba yakwe i ti ti mbewu ya mnamboni,

yi nga ti tita ni mati amangi,

ni sa kufunyelwa mnamboni ka Nilo;

kambe ene i ti ti txikombiso txa matiko.

4Pfana tingana awe Sidhoni,

nguko linene, mkhokhola wa linene,

wa womba-womba wu txi kha wona:

Ani kha na pfa kupanda ka kuveleka, kambe kha na veleka,

kambe kha na nga wunja vanana, ni kulaya mahorana.

5Kufana ni vavaphya va Egipta,

ku nava ni kupanda ngako ku txi na pfala ta Tiro;

6Pindani mi tsula Tarxixi,

kambe pekani huwa anu vaaki va txitondoloni.

7Ina ngu dona didhoropa danu,

di mi nga ti ndaka-ndaka ngu ku di tsakela kani?

Adiya wukale wa dona i ku wa masiku a kale ngutu kani?

Nguko mikondo ya dona yipune yi na di maha di tsimbilela kuya kule.

8I mani a nga lulamisa txikungo txo wukela Tiro,

didhoropa da mibhoti,

adi vaaki va dona i ku vathangeli,

ni vanyamabhindu va dona i ku vo dhundeka ha mafuni kani?

9 Mkoma wa Mabutho a Tiyimbi, ngene a nga lulamisa txikungo txiya, kasi kuonha ku tikulisa ka sotshe siphatiphati, ni kuveka hahatshi vale vo dhundeka ngutu va ha mafuni.

10Tshawunyeta kufana ni Nilo, ngu ditikoni kwako, awe mwanana wa muhorana wa Tarxixi; kha ku ngadi ni libhande madhawani kwako.

11A nawulutile dianza txitimwi ka linene, kambe a vhinganyisile mifumo; Mkoma a rumile kuwukela Kanana, ati to ku txi khundumuswa mikhokhola yakwe.

12Se a txi khene: Khu na mbiswa u ndaka-ndaka kambe ngu kutsaka, awe muhorana wo tsindavetwa, mwana Sidhoni; khukha, tsula Kitimi, kambe hambi kona hale, khu na mbi mana kuhumula.

13Wona ditiko da Vakaldheya, vathu va va nga sanzi kuva i di vathu; Asiriya a di akete vale va nga ti ti zumba txiwulani; va to aka mikhokhola yawe, ni tinyumba tawe ta wukoma, aniko di khundumusilwe dotshe. 14Pekani huwa anu mi ku sitimelani ka Tarxixi, nguko mtamo wanu wa hoxotwa. 15Se ku na maheka ka dona ditshiku dile, taku Tiro e divalwa, amu ka mtxhanu wa magumi ni magumi mambidi a malembe, madingano ni masiku a mfumeli; aniko ngu magwito ka mtxhanu wa magumi ni magumi mambidi a malembe, Tiro a na fana ni ndando ya digelegele.

16Teka haripa u horolokela didhoropa, awe digelegele u nga divalwa ngu votshe;

veta kha kwati, embelela, u wuyelela ko tala, kasi ku va na kualakanya.

17Nguko i nava magwito ka mtxhanu wa magumi ni magumi mambidi a malembe, aawa Mkoma a no endela Tiro ka ona, se dona di na tshumelela ka wugwili wa dona wa wugelegele, kambe di na va ni wukwewu ni yotshe mifumo yi yi kuho txitimwi ka mafu. 18Se wukwewu wa dona wu na lumba Mkoma, ni wugwili wa dona wa wugelegele; kha ku na mbi va ni thomba hambi kutsiwa; aniko wukwewu wa dona wu na lumba ava va zumbako masoni ka Mkoma, kasi ku veva ni sakudya so enela, ni syambalo sa lisima.

Currently Selected:

Isaya 23: BEC2016

Highlight

Copy