Isaya 14
14
Kuwuya ka vathu va ka Israyeli ditikoni kwawe
1Nguko Mkoma a na pfela wusiwana Jakobe, kambe a na sawula Israyeli, a txi mu veka ditikoni kwakwe. Valuveli va na va kumweko navo, va txi namarela ka nyumba ya va ka Jakobe. 2Se vathu va na va amukela ve va yisa makhaloni kwawe, sekoko nyumba ya va ka Israyeli, yi na va fumela, amu ditikoni ka Mkoma, veva tikhumbi ta txiwamna ni ta txisikati. Va na maha tikhumbi ta vale va nga ti va mahile tikhumbi, ni kufumela vale i nga ti vaxanisa vawe.
Mfumeli wa Bhabhilona ditikoni da vafi
3Se ku na humelela tito, ngu ditshiku di Mkoma a nota kuninga kuhumula ka mthumo wako, ni ka kuthava kwako, ni ka mthumo wo nemela, wule va nga kuthumisa, 4sekoko u na embelela ndando yo tseketsela mfumeli wa Bhabhilona, u txi khawe:
A gwitete hayi mxanisi,
ni didhoropa da nzalama di gwitisile kutxani!
5Se Mkoma a funyile ndonga ya vakubiha,
ni ndonga ya wukoma ya vafumeli.
6Ayile va nga ti peka vathu ngu yona ngu txiviti,
ngu txiruko txa kwa mbi guma,
va txi fumela matiko ngu tshofu,
se konkuwa, va tutumiswa,
kusina wu a va tsivelako.
7Konkuwa, ditiko dotshe se di kuhumulani ni kudikhani,
va huwelela ngu kutsaka.
8Hambi didhondo da mikipresi ni mikedhari ya Libhanoni
yi tsakela kuwa kwako, yi txi kha yona:
Kukhukhela kule u nga wa,
kha ku na wu a tako ku ta hi wilela.
9Xeyoli, kukhukhela hahatshi ko tshima, ku xanisekile ngu kulava awe,
kasi ku ku hingeta kutani kwako; ku ku wusete vafi, ni votshe vathangeli va ha mafuni,
kambe a va khukhisile ngu ha situluni ka wukoma,
votshe vafumeli va matiko.
10Votshe vava va na xamula, va txi kha vona:
Awe nawe u lwate ku nga athu,
u fani ni nathu.
11Kutikulisa kwako ku wisilwe ka diphala do hokoma,
kumweko ni diguwa da timbila tako,
se timbungu ti na maha ditaho ni txifenegelo txako.
12 # Wona ni ka: Mtu. 8:10; 9:1. U wisile kutxani ngu nzumani,
awe nyeleti ya mixo, dihorana da wuronga!
U rinzisilwe kutxani hahatshi,
awe m'wisi wa matiko!
13Nguko u ti ti khawe mbiluni kwako:
Ni na kwela ni txiya nzumani,
na guleta txikhalo txangu txa wukoma,
txitimwi ka tinyeleti ta Txizimu.
14Ni na kwela txitimwi ka marefu,
kambe ni na fana ni Nyatxitimwi.
15 # Wona ni ka: Mat. 11:23; Luk. 10:15. Hambi keto, u na yiswa mndiloni,
ka diphala do hokoma.
16Ava va kuwonako, va na kuwonisisa,
va txi kha vona:
Ngene m'thu wu a nga zinginisa mafu,
awu a nga zinginisa mifumo kani?
17Ngene a nga maha ti to ditiko di maha txiwula,
e xasela madhoropa a dona, kani?
Awu a nga lamba kuleka tikhumbi takwe
ti ti tshulela mitini ka tona kani?
18Votshe vafumeli va matiko, vona votshe, va tshotshilwe ngu txithavo,
mmweyo ni mmweyo m'tini kwakwe.
19Aniko awe u tshotshilwe kule ni mathitha ako,
u fana ni didhavi di di si vhuniko txilo,
kufana ni txyambalo txa va va nga dawa ngu ditxhari,
nga vale va relelako ka diphala do tala ngu marigwi,
kufana ni txirumbi txi kandetelwako.
20Khu na mbi tshotshwa kumweko navo,
nguko u haxute ditiko dako,
u dayela vathu vako,
lihunzu la va kubiha kha li na mbi khumbukwa.
21Longisani wukhalo wu vanana va no dawelwa ka wona,
va fela sihono sa vatate vawe,
kasi ku va si wuki ve fuma mafu,
hambi ku va sitate ditiko ngu madhoropa awe.
22Nguko ni na va wukela, kuwomba Mkoma wa Mabutho a Tiyimbi, ni na fuvisa ditina da Bhabhilona ni misalelwa ya kona, vanana ni vatukulu, kuwomba Mkoma. 23#Wona ni ka: Isa. 47:1-15; Jer. 50:1–51:64. Ni na di maha wukhalo wa sikhovha, ni txiziva txa mati a kusina, na di hiyela ngu diphiyelo di di lovisako, kuwomba Mkoma wa Mabutho a Tiyimbi.
Txizimu txi na khundumusa Asiriya
24 Mkoma wa Mabutho a Tiyimbi a xambanyile, a txi khene:
Ati ni nga ti pimisa ti na mahisa toneto;
se ati ni nga womba ti na mahekisa toneto.
25Ni na khundumusa Asiriya amu ditikoni kwangu,
ni mkandetela ngu mikondo amu ka mimango yangu,
kasi ku dikange dakwe di na maneka kule navo,
ni mrwalo wakwe wu na habukiswa ha makata kwawe.
26Ngu txona txikungo txi txi nga sungwa txitimwi ka otshe mafu,
adiya dianza di nga nawulutwa txitimwi ka matiko otshe.
27Nguko Mkoma wa Mabutho a Tiyimbi a tsanisile;
i mani koko a no kaneta kani?
Se a guletile diwoko dakwe;
i mani koko a ngadi tshumetelako msana kani?
Txizimu txi na khundumusa ditiko da Filistiya
28 # Wona ni ka: 2 Vafu. 16:20; 2 Mak. 28:27. Mahungu awa ma zivisilwe ngu dilembe dile mfumeli Akazi a nga fa ngu dona.
29U nga tsake, awe ditiko dotshe da Vafilista,
ngu kule yi nga funywa ndonga yile yi nga ti ku peka,
nguko amu ka mtwi wa mnyoka ku na huma txifofo,
se m'hando wa kona i nava mnyoka wo tura, wu purumako.
30Matiwula a sisiwana ma na dyiswa,
ni sisiwana si na otela ngu kudikha;
aniko ni na daya mkoloti wako ngu nzala,
ni misalelwa yako yi na hasamulwa.
31Peka huwa awe txike;
kwangula, awe didhoropa;
nyunguluka awe ditiko dotshe da Vafilista;
nguko ku na huma wutshi ngu Wutxani,
ka mbimo ya kona kha ku na mbiva ni wammweyo wo sala ekha.
32Ku na xamulwa txani koko ka mitumi ya vathu kani?
Va na kha vona: Mkoma a akile makhato a Siyoni,
kasi ku vathu vakwe, vale va
xanisekako ve mana wuthavelo.
Currently Selected:
Isaya 14: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
