Isaya 13
13
Txiprofeto txo wukela Bhabhilona
1Mahungu ya ma nga woniswa Isaya mwana Amosi, madingano ni Bhabhilona.
2Gwimbani m'jeke txitimwi ka mmango wa kwa mbi na txilo;
va dhaneni ngu dipswi do guleka,
mi va dyoweta ngu dianza,
kasi kuva txi wulela ngu sike sa vathangeli.
3Ni leletete va sawuleki vangu,
ina, se ni dhani tindena tangu, ati ti tsakelako wuhombe wangu,
kasi ku ti txi maha mthumo wa kuhenya kwangu.
4Se ka pfala diguwa da vathu txitimwi ka mimango,
do fana ni da dibutho da hombe da vathu,
dipswi da mifumo ya matiko ma nga sengeletana.
Mkoma wa Mabutho a Tiyimbi, wa xola dibutho da yimbi.
5Se va ta ngu ditikoni da kule,
magwito ka nzuma,
i Mkoma ni matxhari a kuhenya kwakwe a tako kuta xasela ditiko dotshe.
6Pekani huwa nguko ditshiku da Mkoma di hafuhi;
di ta ngu ka wu wa Mtamo-wotshe kuta haxula.
7Mawoko otshe ma na pwata mtamo,
ni totshe timbilu ta vathu ti na rereka.
8Se va na dhukiswa ve thava, va txi guma mtamo,
ve xanisekisa ku nga wamsikati a di hafuhi ni kuveleka;
va na wonana, ve xamala,
ve dhunuka, ngu kuthava.
9Wonani, ditshiku da Mkoma data, do dhukisa,
da tshofu, ni kuhenya ko tura,
kasi kuhaxula ditiko, ni kulovisa vaonhi va dona.
10 # Wona ni ka: Mat. 24:29; Mar. 13:24-25; Luk. 21:25; Mtu. 6:12-13; 8:12. Nguko tinyeleti ta nzumani ni mitxawa ya tona, kha ti na mbi leka kuwoninga,
ditambo di na pfhupela kuhumani ka dona,
ni mtxima kha wu na mbi woninga.
11Se ni na tsayisa mafu ngu mhaka ya kubiha ka ona,
ni vabihi ngu mhaka ya sionho sawe,
ni na heta kutikulisa ka va makolo,
vanyamitamo ni vathu wo ti guleta ni na va veka hahatshi.
12Ni na maha ti to m'thu eva ni lisima ngutu,
kupinda nzalama ya yinene,
kupinda nzalama yo hehuka ya Ofiri.
13Ngu toneto, ni na dhudhumelisa nzuma,
ni mafu ma na khukha ha wukhaloni ka ona,
ngu mhaka ya kuhenya ka Mkoma wa Mabutho a Tiyimbi,
ngu ditshiku da kuhenya kwakwe.
14Mmwani ni mmwani a na fana ni mhoti yi yi tutumiswako,
va txi nga tivunta to pwata m'dyisi;
mmwani ni mmwani a na tshumelela ka va ka kwawe,
votshe va na tutumela ditikoni kwawe.
15Votshe vale va no manwa va na pindiswa,
ni votshe vale va no ñolelwa va na dawa ngu ditxhari.
16Vanana vawe va na phwaraselwa va txi si wona;
tinyumba tawe ti na honyolelwa,
ni vasikati vawe va na pfinyetelwa.
17Wonani, ani ni na va wusela Vamedhi, ava va si khataliko ngu silivhela,
hambi kuva ni mhaka ngu nzalama.
18Va na fula mazambi ngu malaho awe,
hambi vanana va va ku mndani, kha va na mbi pfelwa wusiwana,
maso awe kha ma na mbi felela vanana.
19Se Bhabhilona, ditiko do tshura,
kupinda matiko otshe,
adi Vakaldheya va ti dhumisako ngu dona,
di na fana ni Sodhoma ni Gomora, mbimo yi Txizimu txi nga ma haxula.
20Kha ku na mbi ngadi ku txi akwa kambe,
hambi kuwusetwa ngu liveleko ni liveleko;
hambi Muharabhi kha na mbi gwimba ditenda dakwe kona,
hambi vadyisi kha va na mbi dyisa sifuyo sawe kona.
21 # Wona ni ka: Mtu. 18:2. Kambe sihari sa txiwulani si na zumba kona,
tinyumba tawe ti na tala ngu sisukulu,
ni timbuwu ti na zumba kona,
ni tiphongo ti na ndaka-ndaka kona.
22Se vanyadhukwe va na emba ka tinyumba tawe ta wukoma ta maphanga,
ni maxolwa ka tinyumba tawe ta wukoma ta litsako;
se mbimo ya dona yi hafuhi ni masiku a kona kha ma na mbi engetelwa.
Currently Selected:
Isaya 13: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
