Ezra 7
7
Ezra a txi hoka Jerusalema
1Se ti di pindile totsheto, ka mbimo ya kufuma ka Aritasasta, mfumeli wa Persiya, Ezra mwana Seraya, mwana Azariya, mwana Hilikiya, 2mwana Salumi, mwana Zadhoki, mwana Ayitubhe, 3mwana Samariya, mwana Esriya, mwana Merayoti, 4mwana Zeraya, mwana Uzi, mwana Bhuki, 5mwana Abhisuwa, mwana Finiyasi, mwana Eleyazari, mwana Aroni, mphaxeli wa hombe. 6Ezra wuwa a to kwela ngu Bhabhilona; kambe i ti mabhalani wamnene wa Mlayo wa Mosi, wo ningwa ngu Mkoma, Txizimu txa Israyeli; kuve dianza da Mkoma, Txizimu txakwe, di ti ti txitimwi kwakwe, mfumeli a mningile sotshe sile a nga ti ti mkombela. 7Vokari hagari ka vanana va ka Israyeli, ni va vaphaxeli, ni va Valevhi, ni va vaembeleli, ni va vaxayisi va matimba, ni vanetine, ka dilembe da wutxhanu ni mambidi a mfumeli Aritasasta. 8Sekoko ka mtxima wa wutxhanu, a tile Jerusalema, na i di dilembe da wutxhanu ni mambidi da mfumeliyo; 9nguko ka ditshiku do khata da mtxima wo khata, ngu dona i ku makhato a kukhukha kwakwe Bhabhilona; se ka ditshiku do khata da mtxima wa wutxhanu va to hoka Jerusalema, dianza da dinene da Txizimu di ti txitimwi kwakwe. 10Nguko Ezra a ti ti vekisete mbiluni kwakwe, kulava Mlayo wa Mkoma, kasi ku wu londeta, ni kugondisa kona Israyeli, sileleto sa kona, ni madingano a kona.
Dipapilo da Aritasasta
11Dipapilo dile mfumeli Aritasasta a nga ninga mphaxeli Ezra, m'bhali wa mapswi, wa sirumo sa Mkoma, ni sileleto sakwe txitimwi ka Israyeli:
12Aritasasta, mfumeli wa vafumeli, ka mphaxeli Ezra, mabhalani wa Mlayo wa Txizimu txa nzumani, kuthutha ko hetelela! 13Nipune na ruma taku, ka mfumo wangu, ni wihi ka vathu va ka Israyeli ni vaphaxeli, ni Valevhi, a ti lavako kutsula ni nawe Jerusalema, a na tsule. 14Eko u rumwa ngu mfumeli ni madhota akwe a mtxhanu ni mambidi, kuya maha bhalela kona Judha ni Jerusalema, madingano ni Mlayo wa Txizimu txako, wu ku manzani kwako. 15U teka silivhela ni nzalama yile, mfumeli ni madhota va nga ningela ka Txizimu txa ka Israyeli txi txi zumbako Jerusalema, ngu kuranda kwawe. 16Kumweko ni silivhela ni nzalama mi nga yi manako ka dotshe ditiko da Bhabhilona, ni sile vathu ni vaphaxeli va nga ningako, ngu kuranda kwawe, Nyumbani ka Txizimu txawe, txi txi zumbako Jerusalema.
17Maleyo u na xava ngu yona marole, sihambana ni sinvutana, ni miningelo ya kona ya sakudya ni ya kuhiswa, u txi ya si ningela txitimwi ka txiluvelo Nyumbani ka Txizimu txanu, txi txi zumbako Jerusalema. 18Ni tihi tile awe ni vananu mi no ti wonisa tona kumaha, ngu silivhela ni nzalama ka sile si nga sala, mi na maha madingano ni kuranda ka Txizimu txanu. 19Se siya sile u nga ningwa ku si thumisa Nyumbani ka Txizimu, u na si tshumetela masoni ka Txizimu txa Jerusalema. 20Simwani sile si no laveka Nyumbani ka Txizimu txako, u no lava ku si ningela, u na dihela ngu tithomba ta nyumbani ka mfumeli.
21“Kambe ani nipune, mfumeli Aritasasta, na ruma ka votshe vaxayisi va tithomba va ku mtxhatuko ka mnambo taku, ni tihi tile a no mi kombela mphaxeli Ezra, mabhalani wa Mlayo wa Txizimu txa nzumani, ti na mahwe ngu kukuluveta.” 22Kala dizana wa titalenta, 100 wa tipimo ta fulaho, 100 wa mifarasa ya vhinya, ni 100 wa mifarasa ya mtona, ni mnyu wawungi. 23Ni tihi tile ti no leletelwa, madingano ni kuruma ka Txizimu txa nzumani, ti na mahiswe toneto Nyumbani ka Txizimu txa nzumani, nguko txi ndi na tela txani txiviti txitimwi ka mfumo wa mfumeli ni ka vanana vakwe kani? 24Kambe ha mi zivisa ngu mhaka ya votshe vaphaxeli, ni Valevhi, ni vaembeleli, ni vaxayisi va matimba, ni Vanetine, ni vathumi va Nyumbani ka Txizimu, va si dinganiko kuresiswa, hambi kutheliswa mbasani.
25Se awe Ezra, madingano ni wuzivi wa Txizimu txako, wu ku manzani kwako, veka vatsimbitisi ni vale va no lamula votshe vathu va ku mtxhatuko ka mnambo, ka vale va zivako milayo ya Txizimu txako, mi gondisa ni vale va si yi ziviko. 26Ni wihi a no mbi xayisa mlayo wa Txizimu txako ni mlayo wa mfumeli, a na lamulwe koneho, mwendo ngu dawa, mwendo ngu dihiswa, mwendo kuñolelwa siya sakwe, hambi kukhotelwa.
Ezra e dhumisa Txizimu
27A na dhumiswe Mkoma, Txizimu txa vatate vathu, a nga thela timhaka tongeto mbiluni ka mfumeli, kuva hi tshurisela Nyumbani ka Mkoma, kona Jerusalema. 28Nani a ni mahete wumbilu wakwe masoni ka mfumeli, ni ka madhota akwe, ni ka votshe vakoma va mtamo va mfumeli; ngu kumaha keto ni to tihita, madingano ni dianza da Mkoma di nga ti txitimwi kwangu, ni pata vathangeli vokari va ka Israyeli, ve kwelela ninani.
Currently Selected:
Ezra 7: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
