Ezra 8
8
Ava va nga wuya ngu Bhabhilona
1Avava koko, mbathangeli va vatate vawe, ngu tihunzu tawe, ava va nga kwelela ni nani ngu Bhabhilona, kufumani ka mfumeli Aritasasta:
2Ka vanana va Finiyasi, i Jersoni; ka vanana va Itamari, i Dhaniyele; ka vanana va Dhavhidha i Hatusi; 3ka vanana va Sekaniya, ni ka vanana va Parosi i Zakariya, kumweko ninene va batwe kala 150 wa vavamna; 4ka vanana va Pathate-Mowabhe i Eliyohenayi mwana Zakariya, kumweko ni 200 wa vavamna; 5ka vanana va Sekaniya mwana Jahaziyeli kumweko ni 300 wa vavamna; 6se ka vanana va Edhimi, i Ebhedhi mwana Jonatani, kumweko ni mtxhanu wa magumi a vavamna; 7ngu ka vanana va Elamu, i Josaya mwana Ataliya, kumweko ni mtxhanu wa magumu ni magumi mambidi a vavamna; 8se ngu ka vanana va Sefatiya, i Zebhadhiya, mwana Mikayeli, kumweko ni mtxhanu wa magumi ni magumi mararu a vavamna; 9ka vanana va Jawobe, i Obhadhiya, mwana Jeyeli, a ti ni 218 wa vavamna; 10se ka vanana va Selomite, mwana Josifiya, ene, ni 160 wa vavamna; 11se ngu ka vanana va Bhebhayi, i Zakariya, mwana Bhebhayi, ni magumi mambidi a vavamna ni mtxhanu ni vararu; 12se ngu ka vanana va Azigadhe, i Jowanani, mwana Hakatani, kumweko ni 110 wa vavamna; 13se ngu ka vanana vo gwitisa va Adhonikamu, matina awe i ti ti awa: Elifeleti, Jeyeli ni Semaya, kumweko ni mtxhanu wa magumi a vavamna ni digumi dimwedo; 14se ngu ka vanana va Bhigvhayi, i Utayi, ni Zabhudhi, kumweko ni mtxhanu wa magumi a vavamna ni magumi mambidi.
Ezra e ruma kulondeta va ka Levhi
15Ni to va tshanganisa hafuhi ni mnambo wu wuyako Ahavha, hi to zumba konaho masiku mararu; ni to xola vathuni ni ka vaphaxeli, kha na mana ni wammweyo mwanana wa ka Levhi. 16Sekoko ni to rumela Eliyezeri, Ariyeli, Semaya, Elinatani, Jaribhe, Elinatani, Nathani, Zakariya ni Mesulamu, vathangeli, kufana ni Joyaribhe ni Elinatani, i nga ti titxhari. 17Se ni to va ruma kutsimbila ve lava Idho, mthangeli wa wukhalo wa Kasifiya, ni va ningile mapswi kuya womba ka mwanawe Idho ngu txisofu txawe, ni ka vanetine wukhaloni ka Kasifiya, kasi kuva txi hi tisela vathumi Nyumbani ka Txizimu txathu. 18Ngu dianza da dinene da Txizimu, va to hi tisela wamwamna wo ziva ngu ka vanana va Mali, mwana Levhi, mwanana wa Israyeli, i ku Serebhiya, ni vanana vakwe, ni vanawe, votshe digumi ni mtxhanu ni vararu. 19Se ni Hasabhiya, kumweko ni Jesaya, ngu ka vanana va Merari, ni vanana vakwe ni vanawe, i ti ti magumi mambidi. 20Ngu ka vanetine vale va nga ningelwa ngu Dhavhidha ni madhota kumaha mthumo wa va ka Levhi, i ti ti 220 wa vanetine, va nga dhanetelwa ngu matina awe.
Kutitona ni kukhongela ka vathu
21Sekoko ni to huwelela kutitona hafuhi ni mnambo wa Ahavha, kasi hi txi ti namisa masoni ka khohe ya Txizimu txathu, hi txi txi kombela nzila ya yinene yathu, ya vanana vathu, ni ya totshe tithomba tathu. 22Nguko ni vile ni tingana kukombela masotxhwa ka mfumeli, ni vagadhi va mahantxhi ku hi vhikela ka valala nzilani, ngako hi nga ti ti wombile ka mfumeli ku khathu: Dianza da Txizimu txathu di txitimwi ka votshe vale va txi lavako ngu ta tinene, aniko mtamo wa txona ni txiviti txa txona, si txitimwi ka vale va txi lekako. 23Athu koko, hi to ti tona, ni kukombela totsheto ka Txizimu txathu, se txi to pfisisa mikombelo yathu.
Kuningelwa ka miningelo
24Sekoko ni to phawusa digumi da vaphaxeli ni vambidi vahombe: I ku Serebhiya ni Hasabhiya, kumweko ni vanawe va digumi. 25Se ni to va pimela silivhela ni nzalama, i nga ti siningo so lumba Nyumbani ka Txizimu txathu, asile si nga ningilwa ngu mfumeli ni madhota, ni vathangeli vakwe, ni votshe va ka Israyeli, va nga ti maneka koneho. 26Ni to va pimela manzani kwawe 650 wa titalenta ta silivhela, se ngu siya sa silivhela dizana wa titalenta, ni dizana wa titalenta ta nzalama. 27Ni magumi mambidi a majingo a nzalama ya 1.000 wa madhariko, ni mikamba yimbidi ya sikete sa sinene so phatima, so dhundeka kufana ni nzalama.
28Se ni to khani kwawe: Anu mi misawulwa ya Mkoma, ni mikamba yiya yi sawulekile, kumweko ni silivhela yiya ni nzalama yiya, sa kuningelwa ngu kutilava ka Mkoma, Txizimu txa vatate vanu. 29Se si woneleleni, ni ku si xayisa, an'ze mi txi ya si pimela masoni ka vahombe va vaphaxeli, ni va Valevhi, ni va misungo ka vatate va ka Israyeli, kona Jerusalema, sibhiyani ka Nyumba ya Mkoma.
30Sekoko vaphaxeli ni Valevhi va to amukela kunemela ka silivhela ni ka nzalama, ni ka mikamba, va txi si wuyisa Jerusalema, Nyumbani ka Txizimu txathu.
Kutshumela veya Jerusalema
31Se hi to khukha mnamboni ka Ahavha, ngu ditshiku da digumi ni mambidi ka mtxima wo khata, hi tsula Jerusalema; dianza da dinene da Txizimu txathu di ti txitimwi kwathu, di hi hulukisa manzani ka valala vathu, ni vale va nga ti hi riyela milawu tinzilani. 32Se hi tile Jerusalema, hi ta humula kona, masiku mararu. 33Se ngu ditshiku da mune, ku to pimwa silivhela, ni nzalama, ni mikamba, Nyumbani ka Txizimu txathu, ngu dianza da Meremote, mwanana wa mphaxeli Uriya; a ti ti ni Eleyazari mwana Fineya, kumweko ni Jozabhadhi mwana Jesuwa, ni Nowadhiya mwana Bhinuyi, va ka Levhi; 34Madingano ni mtengo ni kunemela ka sotshe sile; se sotshe si to pimelwa ngu mbimo yimweyo.
35Sekoko avale va nga wuyiswa ngu wukhumbini va ningete miphaxo yo hiswa ka Txizimu txa ka Israyeli: Digumi da marole ni mambidi, ngu mhaka ya votshe va ka Israyeli, mtxhanu wa magumi ni mune a tihambana ni mtxhanu ni yimweyo, mtxhanu wa magumi ni mambidi a tinvuta, ni digumi da vamabhongwe kota mningelo ngu mhaka ya txionho; sotshe si txi hiselwa Mkoma.
36Sekoko txileleto txa mfumeli txi to gelwa vaxayisi va wukoma, ni ka vafumeli va mtxhatuko ka mnambo; va to vhuna vathu ni Nyumba ya Txizimu.
Currently Selected:
Ezra 8: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
