Ezra 6
6
Kumanwa ka txileleto txa Siro
1Sekoko mfumeli Dhariyo, a to rumisa kuve xola ka wukhalo wule, ku nga ti ti vekwa ka wona tithomba ta Bhabhilona. 2Se kona Akimeta, ka nyumba ya wukoma, yi manekako ka ditiko da Medhiya, ku to manwa dibhuku, ku nga ti bhatwe txileleto ka dona, txo womba tiya:
3Ka dilembe do khata da kufuma ka Siro, mfumeli Siro a ningile txileleto txiya: Ngu didhawa da Nyumba ya Txizimu yiku Jerusalema, eyo nyumba yi na akwa ka wukhalo wule ku no ningelwa ka wona miphaxo, se makhato a kona ma nava ma di tsanisilwe. Kuguleka ka yona i nava ka mtxhanu wa magumi ni dimwedo a mikono, ni kuanama ka mtxhanu wa magumi ni dimwedo a mikono, 4ni tinzila tiraru ta marigwi a hombe, ni yimwani nzila ya mapulango a maphya; si na dihelwa ngu mfumeli.
5“Hahanze keto, siya sa nzalama ni sa silivhela sa Nyumbani ka Txizimu, asile Nabhukodhonozori a nga si thavisa ka dithepele di nga ti ti Jerusalema e si tsulisa Bhabhilona, si na tshumetwa kambe ka makhalo a sona, ka dithepele di ku Jerusalema, si wuletwa Nyumbani ka Txizimu.”
Txileleto txa Dhariyo
6Sekoko, Tatenayi, mfumeli wa mtxhatuko ka mnambo, Setari-Bhozenayi ni vangana vakwe, i ku Vafarisi, mi ku mtxhatuko ka mnambo: Khukhani eho. 7Va leke ka mthumo wa Nyumba ya Mkoma, kasi ku mfumeli wa Vajudha, ni vona Vajudha, ve aka Nyumba yiya ya Txizimu, ka wukhalo wa yona. 8Na leleta kambe nipune, ati mi fanelako kumaha ngu madhota a Vajudha, kasi kuve aka Nyumba ya Txizimu, i ku ti taku, ngu tithomba ta mfumeli, ni timbasani ta mtxhatuko ka mnambo, mi na hakela ngu sona vavamna vava, ti taku va si thelwi dikhodho. 9Se ku txi laveka marole, sinvutana sa vamatune ni vamakati, kuva si txi na hiselwa Txizimu txa nzumani, fulaho, mnyu, vhinya ni mtona, madingano ni txitoloveto txa vaphaxeli vale va ku Jerusalema, va na ningwe ditshiku ni ditshiku, ku va va si pwati txilo. 10Va txi na ningela mphaxo wo bhumula kha kwati ka Txizimu txa nzumani, ve kombelela wutomi wa mfumeli ni wa vanana vakwe. 11Kambe na leletela ani nipune taku ni wihi wamwamna wule a no phemberusa txileleto txiya, ku na thaviswa phande yimweyo nyumbani kwakwe, yi emiswa, na a ti hayekilwe ka yona, se nyumba yakwe yi na maha ditala. 12Sekoko Txizimu txi txi nga veka ditina da txona hale, txi na khundumusele votshe vafumeli ni vathu va kona, avale va no nawuluta mawoko o lava kuphemberusa ni kuhasamula Nyumba ya Txizimu, yi ku Jerusalema. Ani Dhariyo ni ningile txileleto, txi na londiswe ngu txikuluveta.
Kuhetwa ka Dithepele ni kutulwa ka dona
13Sekoko Tatenayi, mfumeli wa mtxhatuko ka mnambo, ni Setari-Bhozenayi, ni vangana vakwe, va to thuma ngu kukuluveta, madingano ni kuleleta ka mfumeli Dhariyo. 14Se madhota a Vajudha ma ti ti aka, na va txi humeleliswa ngu kuprofeta ka mprofeti Hagayi, ni Zakariya mwana Idho; va to aka nyumba ve heta, madingano ni kuruma ka Txizimu txa ka Israyeli, ni kuruma ka Siro ni ka Dhariyo, ni ka ku Aritasasta, mfumeli wa Persiya. 15Nyumba yiya yi to guma ngu ditshiku da wuraru ka mtxima wa Adhari, i nga ti ti dilembe da mtxhanu ni dimwedo da kufuma ka Dhariyo.
16Se vanana fa ka Israyeli, ni vaphaxeli, ni va ka Levhi, ni votshe vanana va wukhumbi, va to ningelisisa Nyumba yiya ya Txizimu ngu kutsaka. 17Se va to henjeleta ka mthumo wa kuningelisiswa ka Nyumba yiya ya Txizimu, 100 wa marole, 200 wa xihambana, ni 400 wa sinvutana, ni digumi da vamabhongwe ni vambidi, kasi kukombela kudivalelwa ka sionho sa votshe va ka Israyeli, ngu mtengo wa tihunzu ta va ka Israyeli. 18Va to veka vaphaxeli ngu mbimo yawe, ni va ka Levhi ngu mitxawa yawe, kasi kuthumela Txizimu, txi txi manekako Jerusalema, nga tile ti nga bhawla ka dibhuku da Mosi.
Pasika
19 # Wona ni ka: Eks. 12:1-20. Se avale va nga wuya ngu wukhumbini, va to maha Pasika, ka ditshiku da digumi ni mune ka mtxima wo khata. 20Nguko vaphaxeli ni va ka Levhi va ti ti sawulekile, va txi nga m'thu mmweyo dwe, se votshe va ti ti basile; va to daya txinvutana txa Pasika ya votshe vanana va wukhumbini, ni vanawe, vaphaxeli, ni vona vapune. 21Ngu kumaha keto, vanana va ka Israyeli vale va nga ti wile ngu wukhumbini, va dyite Pasika, ni votshe vale va nga ti ti dhawukanisa ni wubihi wa vathu va mafu, va txi xota Mkoma, Txizimu txa ka Israyeli. 22Se va to maha m'buso wa Mapawu o mbi Tshumbelwa, mndani ka mtxhanu wa masiku ni mbambidi, ngu kutsaka, nguko Mkoma a ti va tsakisile, na kambe a ti phemberusile mbilu ya mfumeli wa Asiriya e va dhunda, ni kutsanisa manza awe ka mthumo wa Nyumba ya Txizimu, Txizimu txa ka Israyeli.
Currently Selected:
Ezra 6: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
