Ezra 5
5
1Se mprofeti Hagayi, ni Zakariya, mwanana wa Idho, va to profeta ka Vajudha vale va nga ti ti zumba Judha, ni Jerusalema; ve profetela ngu ditina da Txizimu txa Israyeli. 2#Wona ni ka: Hag. 1:12; Zak. 4:6-9. Sekoko ku to khukha Zorobhabheli mwana Salatiyeli, ni Jesuwa, mwana Jozadhake, ve khata kuaka Nyumba ya Txizimu, txi txi zumbako Jerusalema; va ti ti vhunwa ngu vaprofeti va Txizimu.
3Ka yona yile mbimo a tile kwawe Tatenayi, mfumeli wa mtxhatuko ka mnambo, ni Setari-Bhozenayi, ni vangana vakwe va txi ta kha vona: I mani a nga mi ruma kuaka nyumba yiya, ni kuwusa diguma kani?
4Sekoko hi lava kuziva tiya: Se mbamani matina a vavamna vava va nga aka nyumba yiya kani? 5Ngako maso a Txizimu ma nga ti ti txitimwi ka madhota a Vajudha, kha va nga va tsimba, kala kuza mhaka yi hoka ka Dhariyo, sekoko mhakeyo va to xamula ngu dipasi. 6Dipapilo da Tatenayi mfumeli wa mtxhatuko ka mnambo, ni Setari-Bhozenayi, ni vangana vawe, Vafarsaki, va nga ti ti mtxhatuko ka mnambo, va to di heleketa ka mfumeli Dhariyo.
7Va to mrumela matina, na ku ti bhatwe taku: Ku naveho kotshe kuthutha ka mfumeli Dhario. 8Ti na zivaneke ka mfumeli taku athu hi tsute ka ditiko da ka Judha, ka Nyumba ya Txizimu txa hombe, yi akwako ngu marigwi a hombe, se ka vekwetelwa mapulango txitimwi ka maseta; se mthumo wa kuluvetiswa ngu manza awe.
9Sekoko hi to wotisa madhota ku khathu: I mani a nga mi ruma kuaka nyumba yiya, ni kuwusa diguma diya kani? 10Hahanze ka tiya, hi wotisile matina awe, kuva hi ta kugeletela, ni kubhaletela matina a vale i ku vathangeli hagari kwawe. 11Vona va hi xamute va txi kha vona: Athu hi sithumi sa Txizimu txa nzuma ni mafu, ho aketa nyumba yi yi nga akwa kale ka malembe; nguko mfumeli wokari wa hombe wa ka Israyeli a yi akile e heta. 12Aniko msana kakule vatate vathu va nga wusela txiviti Txizimu txa nzuma, txi to va ningela manzani ka Nebhukodhonosori, mfumeli wa Bhabhilona, Mkaldheya, awule a nga khundumusa nyumba yiya, vathu va kona e va tsulisa Bhabhilona. 13Ngu konaho, dilembe do khata da Siro mfumeli wa Bhabhilona, mfumeli Siro a rumile ti to Nyumba yiya ya Txizimu yi akwa. 14Hambi siya sa nzalama ni sa silivhela sa Nyumbani ka Txizimu, Nabhukodhonozori a nga teka ka dithepele di di nga ti tiho Jerusalema, e si wuleta ka dithepele da Bhabhilona, mfumeli Siro asi thavisile dithepeleni ka Bhabhilona, si ningelwa ka wamwamna wule ditina dakwe i ku Sesbhazari, e m'veka kuva mfumeli. 15A to khene kwakwe: Teka siya si u tsula naso ka dithepele di di kuho Jerusalema, u ya akisa Nyumba ya Txizimu, kha wukhalo wa yona. 16Sekoko a to bwaka Sesibhazari e ta maha makhato a Nyumba ya Txizimu, txi zumbako Jerusalema; se kukhukhela ka koneho kala kuwa, ya akwa, kambe kha yi se guma.
17Konkuwa, ti txi woneka kha kwati ka mfumeli, ku na xolwe ka tithomba ta mfumeli, atile ti ku Bhabhilona, ngako i ti ditshuri kuruma ka mfumeli wa Siro, kasi kuaka yiya Nyumba ya Txizimu kona Jerusalema; se ka mhakeyo, mfumeli a na hi zivise kuranda kwakwe.
Currently Selected:
Ezra 5: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
