Ezekhiyele 2
2
Txizimu txi dhana Ezekhiyele, kuva mprofeti
1Se a to ni gela ku khene:
Mwanana wa m'thu, khukha u txi ema, ni na womba-womba ni nawe.
2Sekoko Moya wu to wulela kwangu, mbimo yile a nga ti ti womba-womba ni nani, se ni to khukha ni ema, ni engisela ti a nga txi ni geletela.
3A txi khene kwangu: Mwanana wa m'thu, ani na kurumela ka vanana va ka Israyeli, ka matiko a vathu va txieyiso, vale va nga ni eyisa; vona ni vatate vawe va ni wukete, kala ka diya ditshiku. 4Se vanana mba tikhohe to thuvika, ni timbilu to banga; se ni kuruma ka vona, u na ya va gela ku khawe: Mkoma Txizimu a womba tiya. 5Aniko vona, mwendo va na tiengisa, mwendo kha va na mbi tiengisa (nguko mba nyumba yo kaneta), va na tiziva taku hagari kwawe, ku ti ti ni mprofeti wokari.
6Kambe awe mwanana wa m'thu, u nga va thave, hambi kuthava timhaka tawe; mwendo va ti maha sitxhotxhota ni mipa kwako, se awe u zumba ni tihume, u nga thave timhaka tawe, hambi kudhukiswa ngu tikhohe tawe, ngu ku i ku nyumba yo kaneta. 7Aniko awe u na va gela timhaka tangu, mwendo va na tiengisa, mwendo kha va na mbi tiengisa, ngu ku i ku vo kaneta.
8Kambe awe mwanana wa m'thu, engisa ti ni kugelako, u nga kanete, kufana ni nyumba yo kaneta; tula txisofu, u dya asi ni ku ningako.
9Sekoko ni to wona dianza di txi nawuluka dita kwangu, se ka dona ku ti ti ni dibhuku do petelwa. 10Se a to di tula masoni kwangu, dona di ti ti bhatwe mndani ni hahanze, kambe ka dona ku ti ti ni mibhalo ya sidilo, ni tihuwa ni makhombo.
Currently Selected:
Ezekhiyele 2: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
