Ezekhiyele 1
1
TXIWONISO TXO KHATA TXA EZEKHIYELE
(Sipimo sa 1 kala 7)
Txitulu txa Wukoma txa Txizimu
1Se ku to maheka tito, ngu dilembe da wugumi ni mararu, ka mtxima wa wumune, ka ditshiku da wutxhanu ka mtxima, na ani ni di hagari ka tikhumbi, hafuhi ni mnambo wa Kebhari, yi to tuleka nzuma, se ani ni wona siwoniso sa Txizimu. 2Ka ditshiku da wutxhanu ka mtxima (ka dilembe da wutxhanu da wukhumbi wa mfumeli Joyakimi), 3di tile dipswi da Mkoma di ta wombwa ka Ezekiyeli, mwana Bhuzi, mphaxeli, ditikoni ka Vakaldheya, hafuhi ni mnambo wa Kebhari, se koneho dianza da Mkoma, di ti ti txitimwi kwakwe.
4Ni to wonisisa, ni wona moya wa txihuhuri txa mtamo ngutu wu txi ta ngu Wuphemba, ni direfu da hombe, ni mndilo wu wu nga ti renzelekela, ni kuphatima madhawani ka kona, se ngu hagari ku ti ti ni txo fana ni koporo, txi nga ti ti huma ngu hagari ka mndilo. 5Se ngu hagari ka txihuhuri, ku to huma mune wa so fana ni sihari; si di ni zumbelo ya m'thu. 6Tximwetxo ni tximwetxo txi ti ti ni mune wa tikhohe, na kambe txi di ni mune wa tibhapi. 7Mikondo ya sona i ti ti mikondo yo lulama; se sikando sa mikondo ya sona si ti ti fana ni sitsendo sa dirole da makati, na si txi phatima kufana ni mxowo wa koporo yo swililika. 8Kambe si ti ti ni manza o nga a vathu, ngu hahatshi ka tibhapi ta sona, ka mune wa madhawa; se ngu kumaha keto, sotshe sa mune si ti ti ni tikhohe ta sona ni tibapi ta kona. 9Si ti ti manana ngu tibapi, tximwani ni tximwani; si ti si tshembereki mbimo yile si nga ti ti tsimbila; tximwetxo ni tximwetxo txi ti ti tsimbila txi di wonetete mu txiyako kona.
10Se khohe ya txona yi ti ti fana ni khohe ya m'thu; ka dianza da txinene, sotshe sa mune si ti ti ni tikhohe ta tingonyamo, ka dianza da txibhabha sotshe si ti ti ni tikhohe ta tihomu, ni khohe ya digama, sotshe sa mune. 11Se tikhohe ta sona ni tibhapi ta sona ti abanete txitimwi; tximwetxo ni tximwetxo txi ti ti ni tibhapi timbidi to patana ka timwani, se timbidi ti txi fenengeta mimidi ya sona. 12Kambe tximwetxo ni tximwetxo txi ti ti tsimbila txi di rendekete mu txiyako kona; si txi tsimbilela mu wu nga tikomba kona Moya; si si tshembereki mbimo yile si nga ti tsimbila.
13Se ngu kheno ka kufana ni sihari, si ti ti wonekisa ku nga makala a mndilo wo tura, kufana ni txisase; mndilo wu ti ti pinda ngu hagari ka sihari, kambe mndilo wu ti ti phatima, se ngu mu ka mndilo ku ti ti huma tinyangafula. 14Se sihari si ti tutuma, si tshumela si wuya, kufana ni tinyangafula.
15Se ni to wona sihari; ku to woneka didangarita ha mafuni, hafuhi ni sihari, ka totshe tikhohe ta mune. 16Zumbelo ya madangarita ni mthumo wa ona, ma ti ti fana ni mxowo wa marigwi a lisima; kambe otshe a mune ma ti ti fana; se zumbelo ya ona ni mithumo ya ona, ma ti ko ngako va ni didangarita hagari ka dimwani didangarita. 17Mbimo yile ma nga ti tsimbila, ma ti ti tsimbila ngu mune wa madhawa a ona; ma ti si tshembereki mbimo yile ma nga ti ti tsimbila. 18Madangariteyo i ti o guleka ngutu, kambe ma thisa; se madangarita awa a mune, ma ti ranganyetilwe ngu maso.
19Se mbimo yile si nga ti tsimbila sihari, madangarita awa ma ti ti tsimbila ngu hafuhi ka sona; si txi guleka sihari ngu ha mafuni, ni ona madangarita awa ma ti ko guleka. 20Amu wu nga ti ti ya kona Moya, ma ti ti ya koneyo; nguko Moya wu ti ti ma kurumeta; se madangarita ma ti ti guleka masoni ka sona, nguko Moya wa kuvangwa ka so hanya, wu ti ti mu ka madangarita. 21Si txi tsimbila sihari, ni ona madangarita ma ti ti tsimbila, se ngako si txi guleka sona ngu ha mafuni, ma ti ti guleka ni ona madangarita masoni ka sona, nguko moya wa sihari wu ti ti mu ka madangarita.
22Se txitimwi ka sihari, ku ti ti ni so fana ni ndengalenga, nga dirigwi da kuphatima ko xamalisa, di nga gwimbwa txitimwi ka misungo ya sona. 23Se ngu hahatshi ka ndengalenga ku ti ni tibhapi ta sona ta txinene, ti txi gwesana; ku di ni timbidi ti nga ti fenengeta didhawa da mmidi, ni timwani tatimbidi ti nga txi fenengeta dimwani didhawa. 24Se si txi tsimbila, ni pfite diguwa da tibhapi ta sona, kufana ni diguwa da mati amangi, nga dipswi da Nyamitamo, dipswi da kudhinda, ku nga sigingo sa dibutho; si txi ema, tibhapi ti txo relela. 25Se ku to pfala dipswi dokari ngu txitimwi ka ndengalenga, yile yi nga ti ti txitimwi ka msungo wa sona; si txi ema, tibhapi ti txo relela.
26Se txitimwi ka ndengalenga yile yi nga ti ti txitimwi ka misungo ya sona, ku ti ti ni txitulu txa wukoma txo nga dirigwi da safira; se txitimwi ka txile txo fana ni txitulu txa wukoma, ku ti ti ni txo fana ni m'thu, ngu txitimwi ka kona. 27Kambe ni to wona txo fana ni kuphatima, kufana ni ka mndilo ngu mndani ka txona, kukhukhela aha ko fana ni txiwunu kala txitimwi; ni kukhukhela aha ko fana ni txiwunu kuya hahatshi, ni woni txo fana ni mndilo, ni kuphatima madhawani ka kona. 28Kufana ni kuphatima ka wulaho wa nyazimu, ngu ditshiku da kuwa ka mati, ku ti ti phatima madhawani. Aawa i ti ti mawonekelo a kufana ni wudhundo wa Mkoma; se mbimo yi ni nga ti wona tiya, ni to wa ngu khohe yangu, kambe ni pfite dipswi da wu a nga ti ti womba-womba.
Currently Selected:
Ezekhiyele 1: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
