Eksodha 12
12
Makhato a m'buso wa Pasika
1Ditikoni ka Egipta, Mkoma a wombile ka Mosi ni ka Aroni, a txi khene:
2“Awuwa mtxima wu na va wo khata kwanu, wu na va wo khata mu ka dilembe. 3Wombani ka msengeletano wotshe wa ka Israyeli, mi txi khanu: Ngu ditshiku da digumi ka mtxima wuwa, mmwani ni mmwani a na ti tekele txinvutana tximwetxo ngu mwaya ni mwaya, txinvutana tximwetxo ngu m'ti ni m'ti. 4Aniko ngako mtengo wa vathu wa ha mwayani wu si dingani kuheta txinvutana, kulaveka va txi patana ni vaakelani vawe, mi txi bala mtengo wa vathu, madingano ni ti m'thu a dyisako tona. 5Txinvutana mwendo txihongwana txi na va txa matune, txo mbi limala, na i di txa dilembe dimwedo. Anu mi na sawula tximwetxo hagari ka tinvuta mwendo hagari ka tiphongo; 6mi na txi veketa kala ka ditshiku da digumi ni mune ka wona mtximewo, ni msengeletano wotshe wa nyumba ya ka Israyeli wu na txi daya ni#12:6 Txihebheru hagari ka minova ni minova. minova. 7Va na teka mnoha wa kona va txi wu tota aha ka tiphande timbidi ta misasimo ni ka mtshunzuti ha txikeni, ka tinyumba ti va no dyela ka tona. 8Ka wusiku wonewo, va na dya nyama yo bawulwa ha mndiloni; ni mapawu o mbi tshumbelwa. 9Mi nga dyeni ni txa tximwetxo txa tximbisu, hambi txo bhikwa ngu mati, aniko mi na dya so bawulwa ha mndiloni: Msungo ni masondo ni sa mndani. 10Ni txa tximwetxo txi nga sale kala mangwanani ka kona, ngako ku txi sala txokari, mi nata txi hisa mangwanani ka kona ni mixo ha mndiloni. 11Ngu toneto, mi no dyisa tona: Mi di sungile siwunu sanu, mi di ambate tikathula mikondoni kwanu, mi di ñote mitxheketelo manzani; kambe mi na dya ngu txikuluveta; nguko i Pasika ya Mkoma.
12Ka wusiku wonewo ni na pinda ditikoni ka Egipta kambe ni na daya otshe matiwula a vanana va ditikoni ka Egipta, kukhukhela ka vathu kala ka sifuyo; kambe ni na lamula sizimu sotshe sa Egipta, nguko ani ngani Mkoma. 13#Wona ni ka: Levh. 23:5; Mit. 9:1-5; 28:16; Dhewut. 16:1-2. Ti di ngeto, mnoha wu na va txikombiso txanu tinyumbani mu mi manekako ka tona: Ngako ani ni txi wona mnoha, ni na pinda ni txi ya masoni, ti to ku si maneki dikhombo hagari kwanu do lovisa, mbimo yi ani ni no peka ditiko da Egipta ngu lifo. 14Ditshiku diya di na va txialakanyiso, kambe mi na di vekisa di txi va ditshiku da m'buso wa hombe, do dhumisa Mkoma; ka tiveleko tanu di na vekiswa; di na va mthetho wa kala kupinduka.
M'buso wa Mapawu o mbi tshumbelwa
15Mndani ka mtxhanu wa masiku ni mambidi mi na dya mapawu o mbi tshumbelwa, kukhukhela ka ditshiku do khata kala ka ditshiku da mtxhani ni mambidi, mi na thavisa mtshumbelo tinyumbani kwanu, nguko awule a no dya dipawu do tshumbelwa a na wilwa hagari ka va ka Israyeli. 16Ka ditshiku do khata mi na va ni msengeletano wo sawuleka, ni ka ditshiku da mtxhanu ni mambidi mi na va ni msengeletano wo sawuleka; kha mi na mbi ñola ni wawumwewo mthumo ka masiku oneyo, hahanze ka mthumo wa kululamisa asi mmweyo ni mmweyo a no dya. 17Mi na vekisa m'buso wa mapawu o mbi tshumbelwa nguko ngu ka dona ditshikudo ni nga maha ti to dibutho danu da yimbi di txi huma ditikoni ka Egipta. Anu ditshiku diya mi na di vekisa ni tiveleko tanu, awuwa i mthetho wa yotshe mbimo. 18Ka mtxima wo khata, ka ditshiku da digumi ni mune da mtxima, ni minova, mi na dya mapawu o mbi tshumbelwa kala ni minova ya ditshiku da magumi mambidi ni dimwedo ka mtxima wonewo. 19Mndani ka mtxhanu wa masiku ni mambidi ku nga thuke ku txi maneka mtshumbelo tinyumbani kwanu; awule a no maneka a txi dya dipawu do tshumbelwa a na hambukiswa ka msengeletano wa ka Israyeli, hambi i di mluveli mwendo txizikwa txa ditiko. 20#Wona ni ka: Eks. 23:15; 34:18; Levh. 23:6-8; Mit. 28:17-25; Dhewut. 16:3-8. Ngu mhaka yeto kha mi na mbi dya dipawu do tshumbelwa: Ka makhalo otshe aale mi no maneka ka ona, mi na dya so mbi tshumbelwa.”
Pasika yo khata
21Sekoko Mosi a to dhana madhota otshe a ka Israyeli, a txi ta khene:
“Tsulani, mi ya sawula txinvutana mwendo txihongwana tximwetxo mtxhambini, madingano ni mtengo wa timwaya tanu, mi txi daya, nguko i Pasika. 22Sekoko tekani didhavi da hisopo, mi txi di nakanisa ngu mnoha wu wu ku mu ka dibhaziya, mi txi tota mtshunzuti wa txitimwi ni misasimo ya kona ngu mnoha wule wu ku mu ka dibhaziya; ni wammweyo wanu a nga hume ngu nyumbani kala ni mixo. 23Nguko Mkoma a na pinda, kasiku e peka Vaegipta ngu lifo: Se ngako a txi wona mnoha ka mtshunzuti wa txitimwi ni ka misasimo yimbidi, ene a na pinda ngu hahanze ka ditimba asi tumeli ti to txirumwa txa kudaya txi wulela nyumbani kwanu, txi ta mi daya. 24Mi na veketa mthetho wuwa wu txi va i di mlayo kwanu ni ka vanana vanu kala kupinduka. 25Mbimo yi mi no wulela ka ditiko di Mkoma a no mi ninga, nga ti ene a nga womba, mi na tama mi txi vekisa wona mphaxo wuwa. 26Ngako vanana vanu va txi mi wotisa tito: Mi alakanya txani ngu ona maphaxelelo awa kani? Mi na xamula mi txi khanu: 27#Wona ni ka: Vaheb. 11:28. Sekoko mi na khanu: Awuwa mphaxo wa Pasika ya Mkoma awu a nga pinda ngu masoni ka tinyumba ta vanana va ka Israyeli, mu ditikoni ka Egipta, mbimo yi a nga daya Vaegipta, aniko a hulukisile tinyumba tathu.” Sekoko va ka Israyeli va to ti namisa, va txi khizama, va txi khongela. 28Vanana va ka Israyeli va to khukha va txi tsula va txi ya maha toneto; nga ti Mkoma a nga womba ka Mosi ni ka Aroni, va to maha nga toneto.
Mtungu wa wugumi: Kufa ka matiwula a Vaegipta
29 # Wona ni ka: Eks. 4:22-23. Hagari ka wusiku, Mkoma a to peka ngu lifo otshe matiwula mu tinyumbani, ka dotshe ditiko da Egipta, kukhukhela ka mwanana wa Faro, awu a nga ti ni fanelo yo khalahatsha ka txikhalo txakwe txa wukoma, kala ka matiwula a mwanana wa khumbi, yi yi nga ti mkorani, ni matiwula otshe a sihari. 30Faro a to wuka ni wusiku, ni otshe mahalamu akwe, ni ditiko dotshe da Egipta; ku to pfala tihuwa ta hombe ta txidilo Egipta kotshe, nguko ku ti si nga ho nyumbani mu ku nga ti si nga ni txirumbi. 31Sekoko Faro a to dhana Mosi ni Aroni, ka wona wusikuwo e womba tiya:
“Khukhani, mi huma hagari ka vathu vangu, anu ni vanana vanu va ka Israyeli; tsulani, mi txi ya thumela Mkoma nga ti mi nga womba.” 32Tekani kambe mitxhambi yanu ya tinvuta ni ya tihomu, nga ti mi nga kombela, tsulani kambe ni katekiseni nani.
33Vaegipta va to kurumeta vathu va ka Israyeli ti to va txi huma ngu kukuluveta mu ditikoni kwawe, na va txi womba va txi kha vona:
“Hotshethu hi na fa.”
34Ti di ngeto, va ka Israyeli, va to teka fulaho yo vhuwa, yi sanzi kutshumbelwa, ni so vhuvela ka sona ve si sunga ni sijumba, kumweko ni madhamba awe, va to rwala ngu makata awe. 35#Wona ni ka: Eks. 3:21-22. Vanana va ka Israyeli va to maha nga ti Mosi a nga ti wombile, va to kombela ka Vaegipta#12:35 Mwendo: sa lisima. siya sa silivhela, siya sa nzalama ni syambalo. 36Mkoma a mahile ti to vathu vakwe ve mana mathomo masoni ka Vaegipta, aha ko Vaegipta va ti ti va ninga#12:36 Txihebheru va ti ti va ninga si va nga txi si kombela. si va nga ti si kombela: Ngu mhaka yeto, va ka Israyeli va handile ka Vaegipta so tala nga ti va nga kombelisa tona.
Kuhuma ka va ka Israyeli ngu Egipta
37Vanana va ka Israyeli va to khukha didhoropani ka Ramesesi, va txi tsula Sukote, vo dingana 600.000 wa vavamna, ku si balwi ni vafana. 38Ku to huma kumweko navo dibutho da hombe da vathu va tixaka to hambana, ni tinvuta ni tihomu, ni simwani sihari sasingi ngutu. 39Va to bhika mapawu o mbi tshumbelwa, a fulaho yi va nga teka ditikoni ka Egipta, nguko mpupu wo vhuwa wu ti sa tshumbelwa: Ngu mhaka ya ku va nga huma ngu kututumiswa ngu Vaegipta mu ditikoni kwawe, kambe kha va sikota kuema ku txi lulamiswa timbuva to dya ni nzila.
40 # Wona ni ka: Gen. 15:13; Vag. 3:17. Vanana va ka Israyeli va zumbile ditikoni ka Egipta mtengo wa 430 wa malembe. 41Ka ditshiku di ku nga ti guma 430 wa malembe, mabutho a tiyimbi ta Mkoma ma manekile ma txi huma ditikoni ka Egipta. 42Wusikuwo, Mkoma a nga pila a txi maha ti to vanana va ka Israyeli va txi huma ditikoni ka Egipta, wu fanete ku va i di wusiku wa kupila, ka votshe vanana va ka Israyeli, va txi khozela Mkoma, ka tixaka totshe ta liveleko lawe.
Milayo ya madingano ni Pasika
43 Mkoma a to khene kambe ka Mosi ni ka Aroni:
“Mlayo wa Pasika ngu wuwa: Ni wammweyo mluveli kha na kudya m'buso wa Pasika. 44Kambe ni yihi khumbi yile yi nga xawa ngu male, msana ka kuva yi di sinyisilwe wukwera, sekoko yi na dya m'buso wa Pasika. 45Dixonga ni txithumi txo holelwa ngu male kha va na mbi dya. 46#Wona ni ka: Mit. 9:12; Mas. 34:20; Joh. 19:36. M'buso wa Pasika wu na dyelwa nyumbani, kambe mi nga tekeni ka yoneyo nyumba txitsundu ni txa tximwetxo txa nyama mi txi huma natxo hahanze. Ni kambe mi nga funyeni dirambu ni da dimwedo. 47Wotshe msengeletano wa ka Isareli, wu na maha toneto ngu m'buso wa Pasika. 48Kambe ngako mluveli wokari wu a hanyako kumweko ni nanu, a txi lava kudya m'buso wa Pasika ya Mkoma, vavamna votshe va nyumba yakwe, va fanete kusinyiswa wukwera; ngu msana a na va a txi sikota kudya nene m'buso wa Pasika, kambe a na va a txi balwa taku njivelekwa txanu; ni wammweyo awu i ku dikhuna, kha na mbi dya m'buso wa Pasika ya Mkoma. 49Ku nava ni mlayo wumwewo dwe ka wu i ku lihunzu la ka kwanu, ni ka wule i ku mluveli wu mi hanyako kumweko nayo.”
50Se votshe vanana va ka Israyeli va to maha, nga ti Mkoma a nga ti leletisile tona ka Mosi ni Aroni. 51Ka ditshiku donedo Mkoma a humisile vanana va ka Israyeli ditikoni ka Egipta, ngu mthetho wa mabutho awe.
Currently Selected:
Eksodha 12: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
