Eksodha 11

Mosi e zivisa mtungu wa wugumi

1 Mkoma a wombile ka Mosi a txi khene:

“Ni na wuyisa tximwani txixaniso txitimwi ka Faro ni ka Egipta. Konako a na mi leka mi txi khukha kona hawa. Mbimo yi ene a no mi ruma ti to mi txi tsula, ene kha na mbi mi leka dwe mi txi tsula, aniko a na mi tutumisa hawa. 2Ngu mhaka yeto, gela vathu ti to wamwamna a na kombele ka muakelani wakwe, wamsikati a na kombele ka muakelani wakwe,#11:2 Mwendo: sa lisima. siya sa silivhela ni sa nzalama.”

3 Mkoma a mahile ti to vathu vakwe va txi mana makatekwa, ditikoni ka Vaegipta, masoni ka mahalamu a Faro ni masoni ka vathu votshe.

4Mosi a wombile ka Faro a txi khene:

“Mkoma a khene: Hagari ka wusiku ni na pinda ngu hagari ka ditiko da Egipta. 5Votshe vanana va matiwula vo velekwa ditikoni ka Egipta va na fa, kukhukhela ka matiwula a Faro, awu a nga ti ni fanelo yo khalahatsha ha txikhaloni kwakwe ka wukoma, kala ka matiwula a txithumi txakwe atxi txi thumako ha txigayoni, hambi ni matiwula a sihari sakwe so fuya si na fa. 6Ngu konaho ditikoni kotshe ka Egipta ku na vaho tihuwa ta masaluko a hombe, aale ma si ziviko ku nga maheka, kukhukhela ka kale, kha ku na mbi vaho kambe ni ka tximwani txikhati. 7Aniko, hagari ka vanana va ka Israyeli, kukhukhela ka vathu kala ka sihari, hambi kudila ka yimbwa kha ku na mbi pfala kasi mi txi tiziva ti to Mkoma a mahile kuhambana hagari ka ditiko da Egipta ni ka vanana va ka Israyeli.

8Sekoko sotshe sithumi siya sako, si nata si txi ta khizama masoni kwangu, va txi kha vona:

Huma, awe ni vathu vako votshe ava va ku lodetako. Ngu msana ka toneto ni na huma ni tsula.”

Se Mosi a to khukha masoni ka Faro, na a di henyile ngutu.

9 Mkoma a to womba ka Mosi a txi khene:

“Faro kha na mbi mi engisa, kasiku sidiwukiso sangu si txi anda ditikoni ka Egipta.”

10Mosi ni Aroni va mahetete sidiwukiso sotshe masoni ka Faro. Aniko Mkoma a bangisile mbilu ya Faro, e va lambela kuleka vanana va ka Israyeli va txi tsula, va txi huma ditikoni kwakwe.

Currently Selected:

Eksodha 11: BEC2016

Highlight

Copy